Po'unde-unde 55
55
Pekakai mo'ema pontulungi te'aro a iwali
55:1-24
1Tiano petewawado anu mpenani. Saru pemaeno katapi. Penani pompaguruno i Daudi.
2Ta'oomo biri-Miu, oo Ue Ala, a mpekakaiku,
siimo Ipewuni te'aro a mpo'emaku!
3Iperio akumo ka Isangki akumo!
Nahi kurodo a laro pompemasusaku,
4doito aku hangano peboolido iwali,
hangano magagano mia mosa'o gaudo;
hangano dome'aluakune marasaia,
ka saru bamburudo dompe'iwaliakune.
5Huleku mondende,
i'alu akumo mongkokongirino matea.
6Ongkue doito ka mondindi-ndidi,
mongkokongiria lumimbu aku.
7Onaemo ka kupotae, ”Ande-andeno kupinoweeako pani kana marapatii,
aku menee ka mo'ungke po'ianga anu nahina monsosanggoli,
8tendeano aku molai te'ola-olai
ka merato i pada one. Sela
9Aku ronga mo'ungke pelingoaku te'aro
a opue ka angi mokora.”
10Bansiomo elodo ka perawo-rawo iramo, oo Ue,
hangano kukitao pobobarasaia ka pe'u'uaa i laro kota!
11Meene wongi domelimbuo kota atuu a wawo luwuno rere watuno,
lambaha me'a'e;
12oo, ponsolangia gagi i larono,
pompopo'oo ka pompokonsiia nahi hori bintao tanalapano kota.
13Bakanaano iwali anu tumetewehi aku,
da kupokotembio;
tewala anu umo'aliaakune anu mompelangka-langkai ndi ongkue,
da kupokompewuniakono.
14Sine omue mia anu mengkena saru ongkue,
wali-waliku ka mia pine'ala-alaku:
15tedoa tekosi i ndi'ipua to mesambe'e,
mewinso a raha-Do Ue Ala a ntongano maroaa.
16Po'ineeomo matea sumapoi ira,
po'ineeomo dompetii kotuwu-tuwu a laro tolinodo mia mate!
Hangano mosa'oa kongko a mpo'iangado, oo i laro aroado.
17Sine aku mebooli ndi Ondae Ue Ala,
ka Ondae i Ue Ira kumadudui aku.
18I tempono ngkiniwia, mo'oru, ka ntonga oleo me'anaiki aku ka mompemahaki
ka Dorongeo suaraku.
19Dopotola aku saru teliahako
inso a mposapoi ndi ongkue,
hangano mpetumonda dome'ewai aku.
20Ondae Ue Ala anu mo'ia mompu'u tempo i ndi'ipua,
Ira rumonge aku ka me'uru-uru ira.
Hangano nahi dobehe mebalio tuwudo
ka nahi domedoitoako Ira Ue Ala. Sela
21Wali-wali atuu tumandeo kaeno te'aro ndi ondae anu tuwu manangai saru onae,
ka lumimpaio dandino;
22ngangano moloreopo sekono mantega,
sine onae montoo mesapoi;
pepauno molusaopo sekono lana,
sine menteeano ponai binuta.
23Peweengakonomo danggaramu ndi Ondae i Ue,
ka Ira mekariako!
Nahi Dopo'ineeo
mia mentee telelu.
24Omiu, oo Ue Ala, Komiu dumontaio mia lambaha
a aano sumuru anu ondalo;
anu mo'uwu rea ka anu mompopo'oo
nahi ta haweako entonga tinuwuno.
Sine ongkue andio, kongko mompe'ala-ala ndi Omiu.
Currently Selected:
Po'unde-unde 55: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
