Po'unde-unde 51
51
Mangakuakono hala
51:1-21
1Tiano petewawado anu mpenani. Penani po'unde-undeno i Daudi, 2#2Sam. 12:1-15tempono Nabi Nata aiwa ndi onae umarino mewowaliakono i Batiseba.
3Ipehohawa Akumo, oo Ue Ala, montonda pompehohawa-Miu,
Ipahihiomo halaku montonda pompehohawa-Miu anu langkai!
4Ipokomorina akumo luwu inso a nsalaku,
ka inso a halaku Ipokomempori akumo!
5Hangano kupokonto'orio polimpa'iku,
wela aku masusaakono halaku.
6 #
Rom. 3:4
Ndi Omiu, butu koa ndi Omiu kutehala
ka weweuo hapa anu pinemosa'o-Miu.
Ka mentee Komiu a laro pomputusi-Miu,
morina a laro mpobitaraa-Miu
7Menteeano, a laro sala mpoweweu kupine'anaako,
a laro hala domentiaakune ineku.
8Menteeano, Omiu memoikoo moleo aroa,
ka nahi teto'ori Omiu pauakune ponto'ori anu mentee.
9Saru hisopi Ipokomorina akumo inso a halaku, ka kugagi mempori,
Iwo'ohi akumo, ka kugagi mopute sekonopo seru baku!
10Po'ineeomo kurongeo po'undea ka mawongko,
po'ineeomo luwuno wuku anu pinuro-Miu wali mengkokora-kora mawongko!
11Iwuniomo rupa-Miu inso a halaku,
Ipahihiomo luwuno salaku!
12Ipokogagiomo aroa anu molino ndi ongkue, oo Ue Ala,
ka Ipokowo'ohuakonomo penaa anu moroso laro aroaku!
13Siimo Itadi aku inso i Aro-Miu,
ka siimo I'alao penaa-Miu anu mempori inso ndi ongkue!
14Ipokuleakunemo mawongkoa hangano pongkadudui-Miu,
ka Itumboakunemo penaa anu moroso!
15Ka aku paguruako ira pesalaa-Miu a mia anu mpoweweu polimpaia,
ka dompepokule ndi Omiu mia mentehala.
16Ipotola akumo inso a mpasua rea,
oo Ue Ala, Ue Ala tekaduduiaku,
ka eloku ta kokora-kora mawongko paleleo moleo-Miu!
17Oo Ue, I'ungkahiomo wiwiku,
ka ipaleleo ngangaku po'unde-unde ndi Omiu!
18Hangano Omiu nahi pemoikoo pesomba sinumbele;
ba kupesombaakono pesomba tinunu,
nahi Ipebeheo.
19Pesomba sinumbele ndi Ondae Ue Ala onaemo sumanga anu mopemasusa;
aroa anu tedoa mopemasusa ka buke pe'o'ole
nahi Komiu mokoburuakono, oo Ue Ala.
20Ipopokitaomo moikoa ndi Sioni montonda po'eheno aroa-Miu
Iwangu iramo rere watuno Yerusale!
21Ka Komiu memoikoo pesomba anu pototono,
pesomba tinunu ka pesomba anu tetunu luwuno;
sapi lakino ta pinesombaako a wawo meda pontunua pesomba ndi Omiu.
Currently Selected:
Po'unde-unde 51: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
