Po'unde-unde 50
50
Pesomba anu mentee ntu'u
50:1-23
1Penani po'unde-undeno i Asapi.
Anu Tedoa Pabawa, Ondae Ue Ala, mepau ka moboio tolino,
inso i sabaano oleo hawe a nsumooano.
2Inso i Sioni, tompaano tekosi,
Ondae Ue Ala meposaba mewanta.
3Ondae Ue Alato hawe ka nahi Ira mo'ia-ia,
i aro-Do api mensila'e,
angi mokora anu mongkokongiri mepuuri lumimbu Ira.
4Ondae mebooliakono langi i wawono,
ka a ntolino Ira bitarao bawaa-Do,
5”Wawa iramo ramai mia anu pinehohawa-Ku,
anu mowutu pedandia saru Ongkue me'empehiako pesomba sinumbele!”
6Langi paleleo moleo-Do,
hangano Ondaemo isa'a Ue Ala Puu mpobitara. Sela
7”Rongeomo, hei bawaa-Ku, Aku mepau,
hei Isaraeli, Aku mesakosii umewaikomiu:
Ongkuemo Ue Ala, Ue Alamu!
8Komba hangano pesomba sinumbelemu ka Kukuahakomu;
kombake pesomba tinunumu wela pinesombaako i aro-Ku?
9Siimo Kupo'ala sapi inso i rahamu
ke bembe lakino inso a wala mpinotuwumu,
10hangano Ongkuemo me'ueo luwuno kondehora a ntobu,
ka sowu-sowuno pinotuwu a ntorukuno.
11Kuto'orio luwuno manu-manu i laro meene,
ka hapa anu melelu a mpada Ongkue me'ueo.
12Tewala mokoninggo Aku, nahi paraluu Kupauakomu,
hangano Ongkuemo me'ueo tolino ka luwuno ihino.
13Bauno sapi lakinoke Kupongkaa,
ke reano bimba lakinoke Kupo'inu?
14Pesombaakonomo pesomba po'ude-unde ndi ondae Ue Ala
ka owahiomo tinangamu ndi ondae Anu Tedoa Mantande!
15Peboolimo ndi Ongkue i tempono ma'isoa,
Aku motolako, ka omue ko'umunde-unde Aku.” Sela
16Sine a mia mosa'o gauno Ondae Ue Ala mepau,
”Hapake orusuamu paresao pompakosi-Ku,
ka ngangamu wela pauo pedandia-Ku,
17kahinaano omue umo'aliaakono pongkuahako,
ka nahi uperioo pau-Ku?
18Tewala omue mongkita anu monako, omue mewali-waliakono,
ka mebawaa saru mia monsosabo.
19Ngangamu upo'ineeo mompau anu mosa'o,
ka a elomu metako pompopo'oo.
20Omue mentoro ka mepaukiakono pepaekompomu,
mosebeo anano inemu.
21Onaemo anu wineweumu, sine Ongkue mo'ia-ia;
potaemu nine Ongkue andio mengkena kana omue.
Kanandio-andio Aku mesakosii umewaiko ka wawao kara-kara andio i aromu.
22Pekokoongakonomo andio, hei omiu anu kumolupe Ira Ue Ala;
ka si Kupomperangkami, ka nahina anu motolao.
23Isema anu mompesombaako pesomba po'unde-unde, onae umunde-unde Aku;
mia anu mentee pesalaano,
Aku mopokitaakono tekaduduia inso ndi Ondae Ue Ala.”
Currently Selected:
Po'unde-unde 50: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
