Po'unde-unde 49
49
Me'uraa anu nahina tuduno
49:1-21
1Tiano petewawado anu mpenani, Inso a inuleno i Kora. Penani po'unde-unde.
2Rongeomo, hei luwuno tongku,
ta'oomo biri, hei luwuno palilino tolino,
3moiko anu motewe maupo anu maramba,
moiko anu kaea maupo anu mongkokolaro mperonga-ronga!
4Ngangaku ta mompau ponto'ori anu mentee,
ka pine'ihilarono aroaku mopoto'orio pengkonaano.
5Aku tuma'oo biriku a mpowadi,
aku pauo teweweuku saru memae katapi.
6Tembio ka kudoito a luwuno oleo masolaa
i tempono domengkadu aku puu pontowoki anu lambaha,
7anu mpe'ala-alao arataado,
ka mpo'undeakono hadiono kaeado?
8Nahina maupo te'asa mia mokompotolao koroino,
ke mompowee pontolosi ndi Ondae Ue Ala euno penaano,
9hangano tedoa masuli olino potolano penaano,
ka nahi pototono ranta nahina tampulaano –
10ka ipotilalo tuwu mpiha,
ka nahi kitao kekeno kaburu.
11Kitaomo: mia monto'ori mentee mate,
mia mebenge-benge ka monge-monge mbo'u memate mperonga-ronga
ka mebintao arataado tiano mia susua.
12Kaburu onaemo rahado ranta nahina tampulaano,
po'iangado mapa'api-api inule;
maupo dompompe'ue hadio wita a needo.
13Mia nahi pokompekorahako a laro mpehasilino,
onae kana pinotuwu anu ta mate.
14Kanatuumo poko'ariano mia anu me'ala-alao koroino onaeno,
tempo mateado mia anu mpo'undeakono paudo ondaedo. Sela
15Kana bimba domensinaari a laro ntolinodo mia mate,
ipakambi ira matea;
ondae ntetutu mpetii a laro ngkaburu,
rupado tepirego,
tolinodo mia mate gagi po'iangado.
16Sine Ondae Ue Ala Ira motolao penaaku,
manasa Ira dumii aku inso a pokungkuno tolinodo mia mate. Sela
17Siimo doito, tewala asa mia gagi kaea,
tewala marambano somborino tetiangi,
18hangano tempono imate luwuno atuu nahi ta wawao,
marambano nahi ta metii tumondao.
19Maupo potaeno onae me'ura tempono ituwu,
maupo dome'unde-undeo mia,
hangano moiko teweweuno,
20sine onae ta hawe a inuledo uempu'uno,
anu nahi ta hori mongkita mewine.
21Mia, anu a laro mpehasilino nahina pomperiono,
onae kana pinotuwu anu ta mate.
Currently Selected:
Po'unde-unde 49: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
