Po'unde-unde 5
5
Pekakai tempono mo'oru
5:1-13
1Tiano petewawado anu mpenani. Saru pemaeno siloli. Penani po'unde-undeno i Daudi.
2Irongeomo pinauku, oo Ue,
Iperioomo pompemasusaku.
3Irongeomo peraaliku mepetulungi,
oo Mokoleku ka Ue Alaku,
hangano ndi Omiumo kupekakai.
4 Ue, i tempono mo'oru Irongeo suaraku,
itempono mo'oru kuwileo ihino aroaku ndi Omiu,
ka kupesisikori.
5Hangano Omiu komba Ue Ala anu memoikoo gau anu mosa'o;
mia mosa'o wineweuno nahi ta merato ndi Omiu.
6Anu laba mpau nahi tangka i aro-Miu;
I'o'aliaakono luwuno mia
anu moweweu mosa'o.
7Ipepate ira luwu mia anu mpegaupi
Ondae i Ue mokoburu-Do mongkita anu mo'uwu rea ka anu mompopo'oo.
8Sine ongkue, hangano pompehohawa-Miu anu langkai,
mewinso aku a laro raha-Miu,
menggolontu mesomba te'aro a raha-Miu anu mempori
saru melangkai Komiu.
9 Ue, Itaate akumo a laro moleoa-Miu
hangano iwaliku;
Ipokomereteomo pesalaa-Miu i aroku.
10 #
Rom. 3:13
Hangano paudo nahina anu pine'ala-ala,
laro aroado buke anu mosa'o,
burokodo kana kaburu menganga,
elodo buke pe'akala.
11Po'ineeomo domentembio salado, oo Ue Ala,
po'ineeomo dontedonta hangano sinongkado ondaedo;
Itadi iramo hangano hadiono halado,
hangano ondae me'ewa ndi omiu.
12Po'ineeomo luwuno mia anu mepekadudui ndi Omiu memawongko,
po'ineeomo domengkokora-kora memawongko ranta nahina tampulaano. Po'ineeomo Ikongkomi ira,
ranta anu mehohawao nee-Miu mawongko hangano Omiu.
13Hangano Omiu rumonsoo mia anu mentee, oo Ue;
Omiu kumaduduiako ira pe'aroa-Miu kana kanta.
Currently Selected:
Po'unde-unde 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
