Po'unde-unde 45
45
Penani a tempo petaoano mokole
45:1-18
1Tiano petewawado anu mpenani. Montonda nanino Sisi Bonse. Inso a nsuku Kora. Penani pompaguru; penani pompehohawa.
2Aroaku luluaako luwuno pau tekosi,
aku mohaweo powadiku ndi mokole;
eloku kana penano asa mia puu mpoburi anu pande ntu'u.
3Omue anu tedoa montama i olodo luwuno anano mia,
pe'aroa te'uwu a wiwimu,
onaemo pu'uno Doronsokomo Ue Ala ranta nahina tampulaano.
4Tanggoomo ponai a ntongamu, hei puu mpe'iwali,
a laro marambamu ka mewantamu!
5Pete'umalaomo ponangia hangano menteea,
peleluno mia anu moiko, ka moleoa!
Po'ineeomo kae ngkoanamu paguruakomu luwuno wineweu anu mongkokongiri!
6Luwuno ana mpanamu montaso, lumompahio huleno iwalino mokole;
luwuno tongku ntedonta a ntoto ngkarumu.
7 #
Ibr. 1:8-9
Kadera poparentaamu Ondae Ue Ala ueno, Ondae mpiha me'ueo ka nahina tampulaano,
ka tuko poparentaamu onaemo tuko menteea.
8Omue kumekewoio moleoa ka umo'aliaakono pinogau mosa'o;
onaemo pu'uno Ondae Ue Ala, Ue Alamu, umariomo Do'urapiakomu
lana po'unde lumaloi ira wali-wali pe'asa mpo'anggamu.
9Luwuno sangkamu mana mire, gaharu, ka sendana;
inso a langkanae tindu pemaeno katapi mokonsanaako;
10i olodo anu tedoa pinehohawamu hinawe ba opia ana beineno mokole,
i koanamu mentade kombiano mokole mesangka wulaa inso i Opiri.
11Rongeomo, hei ana beine, kitao, ka ta'oomo birimu,
kolupeomo tongkumu ka luwuno ihino rahano amamu!
12Po'ineeomo mokole gagi mawongko ntu'u aroano hangano tekosimu,
hangano onaemo uemu! Penggolontuumo ndi onae!
13Ana beine i Tirusi aiwa saru luwuno pompowee;
mia kaea i olodo palili ta mete'umalao aroamu.
14Tekosi ntu'u ipewinso ana beineno mokole,
sangkano meramba-rambaako wulaa.
15Saru sangka sinula mpesora-sora onae winawa ndi mokole;
domentondao ana beine,
ondae wali-walino anu winawa ndi onae.
16Saru mpo'unde ka mengkokora-kora mawongko ondae mewinawa,
ondae mpewinso a laro langkanaeno mokole.
17Luwuno anamu ta umeu ira uempu'umu
omue komotoro ira gagi langkai potorodo i asa wawontolino.
18Aku paleleo neemu mapa'api-api inule;
onaemo pu'uno luwuno tongku ira me'unde-undeko mpiha ka nahina tampulaano.
Currently Selected:
Po'unde-unde 45: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
