Po'unde-unde 44
44
Peraalino tongku anu tepokonsii
44:1-27
1Tiano petewawado anu mpenani. Inso a inuleno i Kora. Penani pompaguru.
2Oo Ue Ala, saru birimami isa'a kimerongeomo,
domentutuluomo uempu'umami ndi omami
wineweu anu Iweweuomo i tempodo,
i tempo se'eluno.
3Saru kae-Miu isa'a Isaari iramo tongku,
ka Itano ira;
Isolangi ira suku tongku,
Ipo'inee ira ntetiangi.
4Hangano komba saru ponai dompetorokio wita,
ka komba tokiado mompowee ponangia,
tendeano kae ngkoana-Miu ka tokia-Miu saru wantano rupa-Miu,
hangano Ipemoiko ira.
5Omiumo Mokoleku ka Ue Alaku
anu parentao ponangino i Yako.
6Sarumo Omiu kimedadai ira mposuka luwuno iwalimami,
sarumo nee-Miu kimelolandao mia anu mentade sumapoi kami.
7Hangano komba a mpanaku kumpompe'ala-ala,
ka maupo ponaiku nahi poweeakune ponangia,
8sine Omiumo anu moweeakami ponangia a mpe'ewaamami,
ka luwuno mia anu umo'aliaakami Ipokoko'ii ira.
9Hangano Ondae Ue Ala, omami mpenaniako po'unde-unde i larono asa oleo,
ka tiano nee-Miu omami mempauo po'unde-unde nahina tampulaano. Sela
10Sine Itadi kamimo ka mo'inee kami mempinokoko'ii,
Omiu nahi lako meronga bawaano sorodadumami.
11Omiu weweu kami mposuka inso a iwalimami,
ka luwuno mia anu umo'aliaakami merontu kami.
12Omiu meweengako kami gagi bimba sumbelea
ka sumiarawo kami i olodo luwuno tongku.
13Omiu umasa ira bawaa-Miu nahina olino
ka nahi po'ala ura hapa-hapa inso a mpo'asaa atuu.
14Omiu weweu kami gagi popodeu-deuado pehori rahamami,
gagi pasinggiria ka tetewehiado mia pehori-horimami.
15Omiu weweu kami gagi pasinggiria i olodo tongku,
onaemo pu'uno luwuno suku tongku mebitu-bitu ulu.
16Ranta sumoo oleo ongkue montembi mokoko'iia,
ka mokoko'ii anu nahi tepahihi,
17hangano paudo mia anu montata ka mompepaukiako,
hangano tepo'aroako iwali ka anu monaa-naa aroa.
18Luwuno andio i'alu kamimo, sine nahi kimengkolupe Komiu,
ka nahi kimehapuo pedandia-Miu.
19Aroamami komba umewa
ka pelempamami nahi pansia inso a mpesalaa-Miu,
20sine Isolangi kamimo a mpo'iangano serigala,
ka tumutuwiakami wongi-wongia.
21Ande-andeno kimengkolupeo nee-Do Ue Alamami,
ka mentandeo kaemami a mpinesombai susua,
22nde nahi Ira mepenteeo Ue Ala?
Hangano Ondae mewinsokio luwuno laro aroa!
23 #
Rom. 8:36
Hangano Omiu mekongko kami a laro mpo'aropi matea ranta sumoo oleo,
omami tinudu kana luwuno bimba sumbelea.
24Ipekaangakomo! Tembio ka Ipoturi, oo Ue?
Ipewangumo! Siimo Itadi kami mpiha!
25Tembio ka Iwunio rupa-Miu ka kumolupeo pompokonsii
ka pompokomarasai ndi omami?
26Hangano omami ntedunsi a laro pampawu,
omami mpe'opo a wita.
27Ipepatindamo tumulungi kami,
potola kamimo hangano pompehohawa-Miu anu nahi bali!
Currently Selected:
Po'unde-unde 44: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
