Po'unde-unde 42
42
Tiano ll:
42–72
Tekewoi ndi Ondae Ue Ala
42:1–43:5
1Tiano petewawado anu mpenani. Penani pompaguruno inuleno i Kora.
2Kana rusa anu mongkekewoi korono anu me'uwoi,
kanatuumo sumangaku kumekewoi Komiu, oo Ue Ala.
3Sumangaku mokorangaako Omiu Ue Ala,
Omiu Ue Ala anu tuwu.
Te'ipiake moiko ku'aiwa
kumitao rupa-Miu Ue Ala?
4Uwoi mataku gagi kaangaku
meene ka wongi,
hangano i larono asa oleo mia mpotae ndi ongkue,
”Isua Ira Ue Alamu?”
5Ndiomo anu aku mewowoloo,
kontongaano sumangaku tedoa mompemasusa;
kana'umpe kupelempa a laro baresino hadio mia,
wawa ira a raha-Do Ue Ala
saru suara mengkokora-kora mawongko ka penani po'unde-unde,
a laro maroado mia anu mpoweweu porame-ramea.
6Tembio ka upompemapari, hei sumangaku,
ka salalaro a laro ngkoroiku?
Pomperorohimo ndi Ondae Ue Ala! Hangano aku umunde-unde Ira mbo'u,
anu tumulungi aku ka Ue Alaku!
7Sumangaku mompemapari a laro ngkoroiku,
onaemo pu'uno, kurambe Komiu
inso i wita Koro Yarade ka mentorukuno Heremoni,
inso a ntorukuno Misari.
8Luwuno wingke pada mpepobo-poboli
a laro u'uruno uwoi mento-Miu;
luwuno mowo langkai ka bomba-Miu
mpekalu-kalulu umalu aku.
9Ondae i Ue parentao pompehohawa-Do tempono meene,
ka tempono wongi ongkue menaniako penani,
aasa pekakai ndi Ondae Ue Ala tuwuaku.
10Mepau aku ndi Ondae Ue Ala, torukuno watuku,
”Tembio ka Ikolupe aku?
Tembio asalakono ka kutuwu mompemasusa
i totono pabawano iwali?”
11Kana petobono matea a laro wukuku
iwaliku tumata aku,
saru mpotae ndi ongkue i larono asa oleo,
”I sua Ira Ue Alamu?”
12Tembio ka upompemapari, hei sumangaku,
ka tembio ka udanggara a laro ngkoroiku?
Pomperorohimo ndi Ondae Ue Ala! Hangano aku umunde-unde Ira mbo'u,
anu tumulungi aku ka Ue Alaku!
Currently Selected:
Po'unde-unde 42: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
