Po'unde-unde 41
41
Pekakai mo'ema pompokotompa
41:1-14
1Tiano petewawado anu mpenani. Penani po'unde-undeno i Daudi.
2Me'uraomo mia anu merioo mia molema!
Ondae i Ue Ira motolao a oleo masola.
3Ondae i Ue Ira kumaduduio ka mekariao penaano,
onaemo ka ipinau me'ura i tolino;
nahi Komiu mo'ineeo ipineweengako a iwali!
4Ondae i Ue tumulungio tempono itepombole mahaki;
Ipokotompaomo ntu'u inso a dasa mahakiano.
5Kupotae, ”Ue, Ipehohawa akumo,
Ipokotompa akumo, hangano ndi Omiumo kutehala!”
6Iwaliku mpopau anu mosa'o mongkona ongkue,
”Te'ipia imate, ranta ka itampula neeno?”
7Mia anu mengkita, mompau pegaupi;
aroano mohowu mosa'oa,
ka i'amba meluarako popauo a nsala.
8Luwuno mia anu umo'aliaakune mpetanga-tanga mongkona ongkue,
ntepo'asa mposongka anu mosa'o ndi ongkue,
9”I'aluomo haki mompepate, pohona mepombole,
onae nahi ta mewangu mbo'u.”
10 #
Mat. 26:23; Mrk. 14:20; Luk. 22:21; Yoh. 13:18 Maupo sambe'e morosoku anu kupe'ala-alao,
anu eheano me'asa mpongkaa saru ongkue, lumako binta aku.
11Sine Omiu, oo Ue, Ipehohawa akumo ka Ipokoroso aku,
ka kupombalo ndi ondae.
12Hangano kanandio kuto, orio, nine Ipemoiko aku,
tewala iwaliku nahi dompeboolikiakune.
13Sine Omiu tumumbo aku hangano moleono aroaku,
Omiu mokoroso aku i aro-Miu ranta nahina tampulaano.
14 #
Pud. 106:48
Inunde-unde Iramo i Ue, Ue Alado to Isaraeli,
inso i ndi'ipuaako hawe nahina tampulaano!
Ami, oo ami.
Currently Selected:
Po'unde-unde 41: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
