Po'unde-unde 40
40
Po'unde-unde ka pekakai
40:1-18
1Tiano petewawado anu mpenani. Penani po'unde-undeno i Daudi.
2Tedoa aku sumisikori Ira i Ue;
ka Do'amba mewolili ka rumongeo pebooliku mepetulungi.
3Ondae tumande aku inso a aa matea,
inso a regeno epe;
Ondae numaao karuku a wawo pongku watu,
pakosio pelempaku,
4Donaao penani wo'ohu a laro ngangaku
unde-unde-Do Ue Alato.
Hadio mia ta kumitao ka gagi doito,
ka do'amba mpe'ala-ala Ira i Ue.
5Me'uraomo mia
anu numaao pompe'ala-alano ndi Ondae i Ue,
anu nahi pewolili a mia mompelangka-langkai,
ke pansia a anu tumonda ira puu mpegaupi.
6Hadioomo anu wineweu-Miu, oo Ue, Ue Alaku,
wineweu-Miu anu kinohali-haliako ka tinoo-Miu ndi omami.
Nahina anu polio pinongkenaako saru Omiu!
Ineheku paleleo ka pauo,
sine tedoa hadio porokono ba idinoa.
7 #
Ibr. 10:5-7
Omiu nahi pemoikoo pesomba sinumbele ka pesomba kaanga,
sine I'ungkahiomo biriku;
pesomba tinunu ka pesomba po'onini hala nahi Ituntuo.
8Ka ku'amba motae, ”Mentee ntu'u, ongkue aiwa;
a laro paluluno wunta hinao binuri mongkona ongkue;
9ineheku weweuo po'ehe-Miu, oo Ue Alaku;
Songka-Miu kongko ilaro aroaku.”
10Kupaleleo moleoa
a laro bawaa anu langkai;
tendeano nahi ku'ontoo wiwiku,
Omiu tumo'orio, oo Ue.
11Moleoa komba kuwunio i laro aroaku,
pokongkomi-Miu ka pongkadudui-Miu kupopauo,
pompehohawa-Miu ka mentee-Miu komba kupo'iaakono
a bawaa anu langkai.
12Omiu, Ue, si ontoo pompowee-Miu ndi ongkue,
pompehohawa-Miu ka mentee-Miu po'ineeomo dumagai aku mpiha!
13Hangano masolaa kumadu aku
hawe nahi pinokodoa hadiono.
Ka salaku,
hawe nahi kupolio mbo'u kumitao;
hadioopo porokono sekonopo wuu a uluku,
onaemo ka kutelusa. 14#Pud. 70:2-6Moikoomo oo Ue Ipotola aku;
Ue, Irongamo tumulungi aku!
15Po'ineeomo ipinokongkodei ka kongira-ngira
luwuno anu momporaakono ka ipingko penaaku;
po'ineeomo domposuka ka ikona ira mokoko'iia
anu inehedo ka kumasola!
16Po'ineeomo dompenoro-noro hangano mokoko'ii
anu mpepaukiakune, ”Losoko, losoko!”
17Po'ineeomo domemawongko ka mpo'unde hangano Omiu
luwuno mia anu umungke Komiu;
po'ineeomo ondae anu mpokekewoi tekaduduia inso ndi Omiu
kongko mpiha mpotae, ”Ondae i Ue atuu langkai!”
18Ongkue andio marasai ka mongkokolaro,
sine Ondae i Ue merio aku.
Omiumo anu tumulungi aku ka motola aku,
oo Ue Alaku, Iliumo hawe!
Currently Selected:
Po'unde-unde 40: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
