Po'unde-unde 39
39
Pekakai mepetulungi
39:1-14
1Tiano petewawa puu mpenani. Tiano i Yedutuni. Penani po'unde-undeno i Daudi.
2Ndiomo pomputusiku, ”Aku dumagaio peleluku,
nahi kutehalaako eloku;
aku umontoakono sama ngangaku
i larono mia mosa'o gauno da kongko i aroku.”
3Tekonso elo aku, merodo-rodo aku nahi kupepau,
komino aku inso mongkona anu moiko,
sine marasaiku komobe-mobeano.
4Aroaku tensila a laro ngkoroiku,
pompemasusaku kana api anu melanga,
mansa aku merokuhi mepauako eloku,
5”Oo Ue, Ipauakunemo tempo mateaku,
ka hapa tompaano tinuwuku,
ka kuto'orio nahi aku tuwu mpiha!
6Kitao, butu ba opia otuwe koa Itantuio tinuwuku;
ka tempo tumuwuku kana mooa i aro-Miu.
Oo, mia butu tuwu tempono hinao penaano! Sela
7Onae telalo kana eo-eo!
Mia butu mohohoiako anu nahina tuduno
onae mohowu, sine nahi tino'ori isema anu humaweo te'ipua.
8Kanandio-andio, hapake anu sinisikoriku, oo Ue?
Pomperorohiaku butu ndi Omiu.
9Ipotola akumo inso a luwuno polimpa'iku,
si pokogagi aku tetewehiano mia monge-monge!
10Tekonso elo aku, nahi ku'ungkahio ngangaku,
hangano Omiumo anu weweuo luwuno atuu.
11Ipoko'olaiomo petunduhi-Miu inso ndi ongkue,
tepirego aku hangano pesapoino kae-Miu.
12Omiu tumunduhiakono pohuku asa mia
hangano salano,
ka kumaano pingko tekosino mengkena kana ule-ule;
mentee ntu'u, sompo mia butu nahina tuduno. Sela
13Rongeomo pekakaiku, oo Ue,
ka Ipo'aroomo biri-Miu a mpebooliku mepetulungi,
siimo Ipenoro-noro kumitao uwoi mataku!
Hangano ongkue andio mia hawe anu mo'ia meronga saru Omiu,
mia hawe kana luwuno uempu'uku.
14Ilimbaomo pengkita-Miu inso ndi ongkue,
ka kupo'unde
se'eluno napi kulako ka nami hina mbo'u!”
Currently Selected:
Po'unde-unde 39: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
