Po'unde-unde 38
38
Pekakai i tempono mahaki
38:1-23
1Penani po'unde-undeno i Daudi i tempono mompesombaako pesomba pompopoto'ori.
2Ue, siimo Ihuku aku a laro bamburu-Miu,
ka siimo Itunduhi aku a laro tensilano tekuda-Miu;
3hangano ana mpana-Miu lumompahi aku,
kae-Miu dumanso aku.
4Nahina anu madoo a ngkoroiku hangano bamburu-Miu,
nahina anu madoo a luwuno wukuku hangano halaku;
5hangano uluku i'aluomo salaku;
hangano kana tinembi anu tedoa kupemobeao.
6Luwuno mobelaku mana moboo, menana
hangano benge-bengeku;
7ongkue tepe'odo ka tedoa tetuundu;
te'asa oleo ongkue mo'ia a laro pompemasusa.
8Hangano tongaku mompemahaki ntu'u,
nahina anu madoo a ngkoroiku;
9piingko rosoku ka tedoa tededengke,
meraali aku hangano aroaku tedoa mompemasusa.
10Ue, Omiu tumo'orio luwuno ineheku,
ka pompemasusaku mbo'u nahi tewuni ndi Omiu;
11huleku mondende, rosoku tetadi,
ka wantano mataku mbo'u tampulaomo.
12Luwuno sambe'eku ka wali-waliku mpeliahako hangano hakiku,
ka pe'etuku mpe'olaiako.
13Luwuno mia anu mpomporaakono penaaku mpota'o oho,
luwuno mia anu mposongkaakono masolaaku, mpompewowolo masolaa
ka mposongka pompopo'oo te'asa oleo.
14Sine ongkue andio kana mia anu nahi pokomporonge,
kana mia beebe anu nahi pokompepau;
15oo, ongkue andio kana mia anu nahi poronge,
anu nahina sangkino a laro ngangano.
16Hangano ndi Omiu, oo Ue, kupomperorohi;
Omiumo anu Komiu sumangki, oo Ue, Ue Alaku.
17Kupewowoloo, ”Ba mansa dompengingisiakune,
ka mpo'undeakune tewala leelu karuku!”
18Lano ilawupo ka kutetidu,
ka wela i'alu aku pompemahaki;
19oo, kumangakuakono salaku,
salalaro aku hangano halaku.
20Mia anu me'o'aliaakune nahina pepu'uano mehadio ira,
hadioomo mia anu umo'aliaakune nahina pepu'uano;
21domposuloako anu mosa'o ndi ongkue euno anu moiko,
dome'o'aliaakune, hangano mo'ungke aku anu moiko.
22Si binta aku, oo Ue, Ue Alaku,
si olai inso ndi ongkue!
23Rongamo Itulungi aku,
oo Ue, tekaduduiaku!
Currently Selected:
Po'unde-unde 38: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
