Po'unde-unde 37
37
Me'urano mia mosa'o gauno nahi tehine
37:1-40
1Inso ndi Daudi.
Si bamburu a mia moweweu mosa'o,
si mosisiriakono mia anu moweweu molengku;
2hangano ira ronga memoleu kana ewo
ka moleu kana luwuno pinopaho molowulu.
3Pe'ala-ala Iramo i Ue ka weweuomo anu moiko,
po'iamo i wita andio ka petenunumo.
4Po'undemo ndi Ondae i Ue;
ka Ira moweeakomu tinoono aroamu.
5Peweengakonomo pesalaamu ndi Ondae i Ue ka pe'ala-ala Iramo,
asalakono Ira mongkadudui;
6Ira mosabao menteemu kana mewine,
ka tiamu kana meene.
7Pomperodomo ndi Ondae i Ue ka sikori Iramo;
si bamburu a mia anu mehasili a laro ntumuwuno,
a mia anu moweweu pompopo'oo.
8Penaa-naamo tekuda ka bintaomo mokulano aroa atuu,
si bamburu, atuu butu mowawa a mosa'oa.
9Hangano mia anu moweweu mosa'o ta pinokotampula,
sine mia anu sumisikori Ira i Ue ta me'ueo wita andio.
10Hangano nami tehine mbo'u, ka tampulaomo mia mosa'o gauno;
tewala upekokoongakono po'iangano, ka onae nahi kongko mbo'u.
11 #
Mat. 5:5
Sine mia anu me'urumako ta me'ueo wita andio
ka mo'unde hangano manangaia anu hadio ntu'u.
12Mia mosa'o gauno mosongka mosa'oa a mia mentee
ka ipokingkiakono;
13Ondae i Ue mengingisiakono mia mosa'o gauno atuu,
hangano Dokitao nine oleono umpedaomo.
14Mia mosa'o gaudo mpobuta ponai
ka mediio panado
ira mpobangkuo mia marasai ka mia mongkokolaro,
ira mensumbeleo mia anu moleo pesalaano;
15sine ponaido ta tumoboo radado ondaedo,
ka panado ta pinudu.
16Moikoopo anu tedei a mia mentee
sekonopo anu hadio ntu'u a mia mosa'o gauno;
17hangano tokiano mia mosa'o gauno ta pinudu,
sine Ondae i Ue kumaduduio mia mentee.
18Ondae i Ue merioo tuwuno mia moleo,
ka tia pusakado ta kongko mpiha nahina tampulaano;
19ondae nahi domempinokoko'ii i tempono masolaa,
ka ira memowohi a luwuno oleo mokoninggoa.
20Menteeano mia mosa'o gauno ta mate;
iwali-Do i Ue ta tampula
kana tekosino ewo pada, ondae metampula kana ahu.
21Mia mosa'o gauno monsabo ka nahi wali umowahio,
sine mia mentee wela mompehohawa ka me'aroa.
22Menteeano, mia anu rinonso-Do i Ue ta me'ueo wita andio,
sine luwuno mia anu tinotonaa-Do ira mempinokotampula.
23Ondae i Ue pakosio pelempano mia
anu tuwuno Dopemoikoo;
24tewala onae tedonta, nahi ta tepombole,
hangano Ondae i Ue tumumboo kaeno.
25I ndi'ipua ongkue mongura, kanandio-andio gagi akumo mota'u,
sine nahi kuhori mongkita mia mentee bininta,
ke inuleno mo'ema-ema roti;
26sompo oleo onae mompehohawa ka mompesaboako,
ka inuleno gagi ronso.
27Olaiakono anu mosa'o ka weweuomo anu moiko,
ka omue komo'ia mpiha ranta nahina tampulaano;
28hangano Ondae i Ue kumekewoio songka,
ka nahi Dobintao mia anu pinehohawa-Do.
Mia moweweu mosa'o ta pinepate ranta nahina tampulaano,
ka inuleno mia mosa'o gauno ta pinokotampula.
29Mia mentee ta me'ueo wita andio
ka wela mo'ia i ra'ai.
30Ngangano mia mentee mompau ponto'ori anu mentee,
ka elono mompopau songka;
31Taura-Do Ue Alano kongko i laro aroano,
pelempano nahi telelu.
32Mia mosa'o gauno momporaakono mia mentee
ka montoo mepateo;
33sine Ondae i Ue nahi Dopo'ineeo mia mentee tedonta a ngkaeno,
nahi Dopo'ineeo pinokonsala i tempono binitara.
34Sikori Iramo i Ue ka tondaomo mpiha pesalaa-Do,
ka Ira tumandeko ka upe'ueo wita andio,
ka kokumitao mia mosa'o gauno pinokotampula.
35Hori aku mongkita asa mia mosa'o gauno anu lambaha,
anu tuwu te'ili kana keu arasi Libano;
36tempono kutelalo, onae moliu,
ku'ungkeo, sine nahi kuhaweo mbo'u.
37Pekokoongakono mia anu moleo aroano ka pepenteeomo mia anu nahi molengku,
hangano a mia anu ineheno manangai ta hina oleo ramaino;
38sine anu mebuunto ira mempinepate mperonga-ronga,
ka oleo ramaino mia mosa'o gauno ta pinokotampula.
39Mia mentee Dokaduduio i Ue;
pepekaduduiado i tempono ma'isoa;
40Ondae i Ue montulungi ka motola ira,
Ondae motola ira inso a ngkaeno mia mosa'o gauno ka kumadudui ira,
hangano mpepekadudui ira ndi Ondae.
Currently Selected:
Po'unde-unde 37: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
