Po'unde-unde 36
36
Mosa'ono gauno mia tehala ka pompehohawa-Do Ue Ala anu nahi bali
36:1-13
1Tiano petewawa anu mpenani. Inso a ntetenaa-Do i Ue, inso ndi Daudi.
2 #
Rom. 3:18
Hala mepau i laro aroano mia mosa'o gauno;
doitoa ndi Ondae Ue Ala nahina a mia atuu,
3hangano onae umunde-undeo koroino,
ranta nahi haweo wineweuno mosa'o ka mo'o'alia.
4Pau inso a ngangano butu mosa'oa ka pompopo'oo,
nahi pelelu mbo'u pande mosongka ka moweweu moiko.
5Mosa'oa isongkao a mpoturiano,
onae montonda sala anu nahi moiko;
hapa anu mosa'o itarimao.
6Oo Ue, pompehohawa-Miu i langi,
pokongkomi-Miu hawe a nseru.
7Moleo-Miu kana luwuno torukuno-Do Ue Ala anu ondau,
songka-Miu kana luwuno tahi malua anu mongkokongiri.
Mia ka pinotuwu ikadudui ira, oo Ue.
8Tedoa masuli olino pompehohawa-Miu, oo Ue Ala!
Luwuno anano mia mpepekadudui a laro pe'egoano pani-Miu.
9Dompokomowohiakono taba koroido a raha-Miu;
Omiu moweeako ira mpo'inu inso a ngkorono sanaa-Miu.
10Hangano ndi Omiu hinao pu'uno tuwua,
a laro mewine-Miu omami mpokita mewine.
11Ipotilaloakonomo pompehohawa-Miu anu nahi bali a mia anu tumo'ori Komiu,
ka moleo-Miu a mia anu bobotoli aroano!
12Po'ineeomo ka si domelandaakune karudo mia mpompelangka-langkai,
ka kaeno mia mosa'o gauno sumaari aku.
13Kanandiomo mia anu mpoweweu mosa'oa ira ntedonta;
pinobangku ka nahi pokompewangu mbo'u.
Currently Selected:
Po'unde-unde 36: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
