Po'unde-unde 35
35
Pekakai mo'ema pepetulungi hangano iwali
35:1-28
1Inso ndi Daudi.
Ewai iramo mia anu umewai aku, oo Ue,
Ipeteamo umewaio mia anu meteaakune!
2Iniomo kanta,
Ipentademo tumulungi aku,
3Ibutaomo kansai ka uase
umaropi ira mia anu lumampui aku;
Ipotaemo a nsumangaku,
”Ongkuemo tekaduduiamu!”
4Po'ineeomo domempinokoko'ii ka mentinata
mia anu inehedo me'oninio penaaku;
po'ineeomo domposuka ka mempinokongkodei
mia anu mpontoo masolaaku!
5Po'ineeomo ondae kana kulino pae ipuurio angi,
dinandano Mala'eka-Do i Ue;
6po'ineeomo pesalaado ka iwongi-wongi ka molore,
ka Mala'eka-Do i Ue lumampui ira!
7Hangano nahina pepu'uano ondae mponta'oakune buani,
nahina pepu'uano ondae mpokeke aa tiano penaaku.
8Po'ineeomo matea humaweo nahi kinoo-koo,
oho anu tina'ono, po'ineeomo onaeno irakoo, po'ineeomo ka itedonta ka ropu!
9Sine ongkue mebooli mo'unde hangano Ondae i Ue,
ka mawongko hangano tekaduduia inso ndi Ondae;
10luwuno wukuku motae,
”Oo, Ue, isemake kana Omiu,
anu motolao mia marasai inso a ngkaeno mia anu lalu moroso,
mia memarasai ka mongkokolaro inso a ngkaeno mia anu rumontuo?”
11Luwuno sakosii anu lambaha mpentade,
ka mentuluri aku mongkona anu nahi tino'ori.
12Moikoku domensuloakono mosa'oa;
kana akumo tuwu asa-asaku.
13Sine ongkue, tempono domemahaki,
kupokonao sawu po'inombo;
ka me'urumako saru mepuasa,
ka mekakai mbo'u saru metuundu,
14kana asa sambe'e ke pepaekompo,
kanatuumo peleluku;
kana asa mia anu sumabangio mateano ineno,
kanatuumo kupetuundu.
15Sine mansaku tetidu, mpo'unde iramo ka mpenggowo,
ondae mpenggowo mensapoi aku,
kana mia hawe anu nahi kuto'orio
ondae mentata aku nahi dompenaa-naa,
16ondae mpepauki kana mia mosa'o gauno,
dompokingkiakune.
17Opiapo mbo'u tehineno, Ue, Komiu butu mengkita-kita?
Ikaduduiomo sumangaku inso a pomperangkamido,
penaaku inso a luwuno singa mongura!
18Aku menaniako po'unde-unde ndi omiu a laro bawaa anu langkai,
i tonga-tongano palili anu hadio aku umunde-unde Komiu.
19 #
Pud. 69:5; Yoh. 15:25 Osi'i ntu'u impo'undeakune
luwuno mia anu me'iwaliakune nahina pepu'uano,
ke megiru-giruo matado
mia anu umo'aliaakune nahina pu'uno.
20Hangano nahi dopompau sintuwu,
ka a luwuno mia anu mpesisintuwu i witado
ondae mposongka pompopo'oo,
21ondae mpenganga langkai ndi ongkue
ka mpotae, ”Losoko, losoko, saru matamami isa'a mensakosiio!”
22Omiu mbo'u Isakosiiomo, Ue, si penoro-noro,
oo Ue, si olai inso ndi ongkue!
23Ipekaangakomo ka Ipewangumo kumorahakono tiaku,
korahakonomo kara-karaku, oo Ue Alaku ka Ueku!
24Ibitara akumo menunu saru moleo-Miu, oo Ue Alaku,
ka si dompo'undeakune!
25Si dompotae i laro aroado,
”Losoko, onaemo atuu inehemami!”
Ka si dompotae,
”Kimenteleomo!”
26Po'ineeomo domempinokoko'ii ka kongira-ngira luwuno
mia anu mpo'undeakono urasa'oku;
po'ineeomo mokoko'ii ka pontata gagi pesangkado
mia anu pelangkaio koroido ndi ongkue!
27Po'ineeomo domengkokora-kora memawongko ka mpo'unde
mia anu ineheno kumita aku pinokomentee!
Po'ineeomo dokongko mpotae, ”Ondae i Ue atuu langkai,
Inehe-Do tekaduduiano tetenaa-Do!”
28Ka eloku ta wela pauo moleo-Miu,
umunde-unde Komiu i larono asa oleo.
Currently Selected:
Po'unde-unde 35: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
