Po'unde-unde 34
34
A laro pongkadudui-Do i Ue
34:1-23
1 #
1Sam. 21:13-15
Inso ndi Daudi, i tempono onae mo'onde-onde nahi molino pinewowolono i arono i Abimele, onaemo ka isinaari, ka i'amba lumako.
2Aku umunde-unde Ira i Ue a luwuno tempo;
po'unde-unde ndi Ondae kongko mpiha a laro ngangaku.
3Hangano Ondae i Ue sumangaku mo'unde;
po'ineeomo domerongeo mia memauru ka memawongko.
4Unde-unde Iramo i Ue meronga ongkue,
aiwamo tomperonga-ronga paleleo nee-Do!
5Ku'ungke Iramo i Ue, ka Do'amba sumangki aku,
ka motola aku inso a luwuno doitoku.
6Kita Iramo, asalakono rupamu ta mewanta
ka nahi ta kongira-ngira.
7Mia anu tepokonsii andio mebooli, ka Dorongeo i Ue,
Ondae kumaduduio inso a pompema'isono.
8Mala'eka-Do i Ue mpekema lumimbu ira mia anu dumoitoako Ira,
ka do'amba mpotola ira.
9 #
1Pet. 2:3
Impe'arahakono ka kitaomo, Ondae i Ue tedoa moiko!
Me'uraomo mia anu mepekadudui ndi Ondae!
10Doitoako Iramo i Ue, hei luwuno mia mempori,
hangano mia anu dumoitoako Ira nahi ta mompemakura!
11Luwuno singa mongura memarasai mokoninggo,
sine luwuno mia anu umungke Ira i Ue, nahi pompemakura maupo te'asa anu moiko.
12Aiwamo nana'ote, ronge akumo,
aku paguruakomiu dumoitoako Ira i Ue!
13 #
1Pet. 3:10-12
Isema i olomiu anu nahi kekewoio tumuwu,
ka momperorohi luwuno oleo buke me'uraa?
14Tangkoroomo elomu inso anu mosa'o
ka wiwimu inso a mpinau anu mompopo'oo;
15olaiakonomo anu mosa'o ka weweuomo anu moiko,
ungkeomo pesintuwua ka uhaweomo!
16Mata-Do i Ue te'aro a luwuno mia mentee,
ka biri-Do a mpeboolido mpepetulungi;
17rupa-Do i Ue umewai ira mia anu mpoweweu mosa'o
ka mokotampulao rambeado inso i wawontolino.
18Luwuno mia mentee mpeboo-booli, ka Dorongeo i Ue,
Dopotola ira inso a pompema'isodo.
19Ondae i Ue atuu umpeda a luwuno mia anu tedoa masusa aroano,
ka Dokadudui ira mia anu tetadi pomperorohino.
20Hadio urasa'ono mia mentee,
sine Ondae i Ue motolao inso a luwuno atuu;
21 #
Yoh. 19:36
Ondae dumagaio luwuno wukuno,
nahina maupo te'asa ta tepudu.
22Urasa'oa ta mepateo mia mosa'o gauno,
ka isema anu umo'aliaakono mia mentee ta tumembio pohuku.
23Ondae i Ue motolao sumangado tetenaa-Do,
ka luwuno mia anu mpepekadudui ndi Ondae nahi ira mpontembi pohuku.
Currently Selected:
Po'unde-unde 34: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
