Po'unde-unde 31
31
Rodo a ngkae-Do i Ue
31:1-25
1Tiano petewawado anu mpenani. Penani po'unde-undeno i Daudi.
2Ndi Omiu, Ue kupepekadudui,
osi'i ntu'u kupinokoko'ii.
Ipotola akumo hangano moleo-Miu,
3Ita'oomo biri-Miu ndi ongkue,
rongamo Ipotola aku!
Igagimo torukuno watu pepekaduduiaku,
bente pekorahakoa ka kutekadudui!
4Hangano Omiumo pongku watuku ka pekorahakoaku,
ka anee-Miu Itaate akumo ka Iwawa aku.
5Iluarako akumo inso a buani
anu dompota'oakune mia,
hangano Omiumo pepekaduduiaku.
6 #
Luk. 23:46
A ngkae-Miumo kupeweengakono penaaku;
Itolosi akumo, oo Ue, Ue Ala anu nahina balino.
7Omiu umo'aliaako ira mia anu melangkaio lahumoa anu nahina pengkonaano,
sine ongkue me'ala-ala Ira i Ue.
8Aku meboo-booli ka mo'unde hangano pompehohawa-Miu nahi bali,
hangano Ipepenteeomo marasaiku,
Ito'oriomo ma'isono sumangaku,
9Ipeweengako akumo a ngkaeno iwali,
sine montadeo karuku a mpo'ianga anu malua.
10Ipehohawa akumo, oo Ue, hangano ongkue mompema'iso;
mataku mowewu ka sumanga ka koroiku me'i'isei hangano mahaki aroa.
11Tuwuku piningko a laro masusaa
ka luwuno ta'u ntumuwuku a laro pompemasusa;
rosoku metii hangano marasaiku,
ka luwuno wukuku gagi motopu.
12Gagi aku tataado luwuno iwaliku,
bebeatido pehori rahaku,
ka mokontededengke ira tepoto'oriku;
ondae anu mengkita aku a nsala ira mpolai.
13Tetadi akumo inso a mpinewowolo kana mia mate,
gagiomo kana kusi anu tepeha.
14Hangano kurongeo pau-paudo mia hadio,
— doitoa hawe inso a luwuno lakoa! —
ondae mperonga-ronga ntepo'asa mensolangi aku,
tinoodo ira me'oninio penaaku.
15Sine ongkue, ndi Omiu kupompe'ala-ala, oo Ue,
kupotae, ”Omiumo Ue Alaku!”
16Tumuwuku a laro ngkae-Miu, Ipotola akumo
inso a ngkaeno iwali anu lumampui aku!
17Iweweuomo rupa-Miu mewanta a ntetenaa-Miu,
Ikadudui akumo hangano pompehohawa-Miu anu nahi bali!
18 Ue, si po'inee aku pinokoko'ii,
hangano mebooli aku ndi Omiu;
po'inee iramo mia mosa'o gaudo mempinokoko'ii
ka mpetii a ntolinodo mia mate ka mengkomino.
19Po'ineeomo wiwi mpegaupi gagi nahi pokompepau,
anu mompepaukiako mia mentee
saru pompelangka-langkai ka pompokongkodei!
20Tedoa ntu'u hadio moiko-Miu
anu Ipatindaakonomo mia anu doitoa-Komiu,
anu Iweweuakonomo mia anu mepekadudui ndi Omiu,
i arodo mia!
21Omiu wuni ira a laro pe'egoano rupa-Miu
inso a mpedandiado mia mpoweweu mosa'o;
Omiu kumadudui ira a laro laika
inso a elo anu ineheno mengenge.
22Inunde-unde Iramo i Ue anu mopokitaomo pompehohawa-Do nahi bali anu kinohali-haliako ndi ongkue
a laro ngkota anu mebente.
23A laro sala-laroku hori aku mepau,
”Tinadi akumo inso i aro-Miu.”
Sine menteeano Omiu rumongeo po'emaku,
tempono kupebooli ndi Omiu mepetulungi.
24Pehohawa Iramo i Ue, hei luwuno mia anu pinehohawa-Do!
Ondae i Ue dumagai ira mia anu mpetenunu,
sine mia anu mpompelangka-langkai
Dohuku ira mobea.
25Pokorosoomo ka pedatoomo aroamu,
hei luwuno mia anu momperorohi ndi Ondae i Ue!
Currently Selected:
Po'unde-unde 31: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
