Po'unde-unde 27
27
Rodo a laro pongkadudui-Do Ue Ala
27:1-14
1Inso ndi Daudi.
Ondaemo i Ue wantaku ka tekaduduiaku,
ndi semake asalakono aku doito?
Ondaemo i Ue benteno tuwuku,
ndi semake asalakono aku mondende?
2Tempono anu mpoweweu mosa'o mensapoi aku
ira mengkaano bauku,
luwuno anu umewai aku ka iwaliku atuu,
manasa ntetidu ka ntedonta.
3Maupo bawaano sorodadu mpekema mengkadu aku,
aroaku nahi ta doito;
maupo mompu'uomo peteaa umewai aku,
mompe'ala-ala aku mpiha.
4Asa rupa ku'emaomo ndi Ondae i Ue,
butu onae andio anu tedoa ineheku:
mo'ia a raha-Do i Ue
asa ntinuwuku,
sumakosiio pe'aroa-Do i Ue
ka sanaa mo'iangario raha-Do.
5Hangano Ira kumadudui aku a laro laika-Do
i tempono hinao mompokodoito;
Ondae wuni aku a laro mpewunia a ngkema-Do,
ka tumande aku a wawo ntorukuno watu.
6Ka kanandio-andio kupontadeo uluku,
umaropi ira iwali anu kumadu aku;
a laro ngkema-Do kupesombaakono pesomba saru kokora-kora mo'unde;
aku menani ka menaniako po'unde-unde tia-Do i Ue.
7Irongeomo, Ue, pebooli anu kupohaweo,
Ipehohawa aku ka Isangki akumo!
8Mongkona Omiu ipotae aroaku, ”Ungkeomo rupa-Ku”
ka rupa-Miu ku'ungkeo, oo Ue.
9Siimo Iwuniakune rupa-Miu,
siimo Ipebungkuio tetenaa-Miu andio saru tekuda;
Omiumo pepetulungiaku,
si tadi aku ka si binta aku,
oo Ue Ala anu kumadudui aku!
10Maupo amaku ka ineku binta aku,
sine Ondae i Ue tumotowo aku.
11Itisoakunemo pesalaa-Miu, oo Ue,
ka Itaate akumo a mpesalaa anu merete umaropio iwaliku.
12Si peweengakune a mosa'ono aroado anu umewai aku,
hangano mpentade iramo sakosii mpegaupi mensapoi aku,
ka mia anu mpepuuriako pobobarasaia.
13Menteeano, kupe'ala-alao aku kumitao moiko-Do i Ue
i witado mia mentuwu!
14Sikori Iramo i Ue!
Pokorosoo ka pedatoomo aroamu!
Sikori Iramo i Ue.
Currently Selected:
Po'unde-unde 27: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
