Po'unde-unde 18
18
Penani po'unde-undeno i Daudi
18:1-51
1 #
2Sam. 22
Tiano petewawado anu mpenani. Inso a ntetenaa-Do i Ue, onaemo i Daudi anu mohaweo pauno penani andio ndi Ondae i Ue, umarino Dopotolao i Ue inso a pokungkudo luwuno iwalino ka inso a ngkaeno i Saulu.
2Ipotae,
”Kupehohawa Komiu, oo Ue, rosoku!
3Oo Ue, pongku watuku, bente pekorahakoaku ka anu kumadudui aku,
Ondae Ue Alaku, torukuno watuku,
po'ianga pepekaduduiaku, kantaku, tandu tekaduduiaku, kota benteku!
4Mebooli aku ndi Ondae i Ue anu tekona inunde-unde,
ka inso a luwuno iwaliku ongkue pinotola.
5Ohono matea wewesi aku,
ka moowo poropu umalu aku,
6kolorono tolinodo mia mate wewesi aku,
luwuno pompete'umala matea tina'o i aroku.
7A laro ma'isoaku, mebooli aku ndi Ondae i Ue,
ndi Ondae Ue Alaku, kupebooli mepetulungi.
Inso a raha-Do Dorongeo suaraku,
pebooliku mepetulungi hawe a biri-Do.
8Ka i'amba leelu ka rensuomo tolino,
luwuno pu'u ntorukuno mpondidi-ndidi
ka telelu hangano tensila tekuda-Do.
9Ahu membombo inso a enge-Do,
api anu mompokomo'ai mewurosi inso a nganga-Do,
waro kolanga-langa meluarako inso ndi Ondae.
10Ondae lumongkuo langi, ka Do'amba metii,
seru anu wongi-wongi kongko a ntoto ngkaru-Do.
11Ondae mesawi a ngkerubi ka Do'amba menee
ka menae-naea a wawo panino angi.
12Ondae weweuo wongi-wongi lumimbu Ira gagi pewunia-Do,
laika-Do seru wongi-wongi bukeako uwoi,
oo, seru anu mokapa.
13Hangano pepansarino wanta-Do luwuno seru-Do mpetonda-tonda
meronga usa seru baku ka waro api.
14Ondae i Ue merundu i langi,
Anu Tedoa Mantande moporongeo suara-Do saru usa seru baku ka waro api.
15Ondae motola ira pana-Do, onaemo ka dontesiarawo,
koliki ntepoposombu, ranta ka Dopokomarisu ira.
16Ka i'amba tengkitaomo bangano tahi,
ka tesungkeomo luwuno empehino tolino
hangano tekuda-Miu, oo Ue,
hangano pepuurino penaa inso a enge-Miu.
17Dodongawio inso a mpo'ianga mantande, ka umini aku,
Dopadii aku inso a uwoi anu mongkokongiri.
18Dopotola aku inso a iwaliku anu moroso
ka inso a luwuno mia anu umo'aliaakune,
hangano memoroso irapo lahi sekono ongkue.
19Ondae mentowoki aku a oleo urasa'oku,
sine Ondae i Ue gagi pehondaaku;
20Ondae wawa aku meluarako a mpo'ianga malua,
Ondae kumadudui aku, hangano Dopemoiko aku.
21Ondae i Ue weweu aku menunu saru menteeku,
Ondae paguru aku menunu saru memporino kaeku.
22Hangano ongkue tumondao mpiha pesalaa-Do i Ue
ka nahi mosa'o gauku, me'olaiako inso ndi Ondae Ue Alaku.
23Hangano luwuno songka-Do kupekokoongakono,
ka pompakosi-Do nahi kuhori moko'olaio inso ndi ongkue;
24peleluku nahina tataano i aro-Do,
ka dumagaio koroiku inso a wineweu mosa'o.
25Onaemo pu'uno Ondae i Ue humuku aku menunu saru menteeku,
menunu saru memporino kaeku a pongkita-Do.
26A mia anu mpetenunu Omiu metenunu,
a mia anu nahina tataano Omiu nahina tataano,
27a mia anu moleo aroano Omiu moleo aroa,
sine a mia anu hadio pe'akalano Omiu lalu paande.
28Omiumo anu kumadudui ira mia ntepokonsii,
sine mata anu mompelangka-langkai Itotoakono.
29Omiumo anu weweuo huluku mewanta;
Ondae i Ue, Ue Alaku, wantahio wongi-wongiku.
30Meronga Omiu mosia aku sumapoio sorodaduno iwali,
meronga Ondae Ue Alaku mosia aku melonsokio rere watu.
31Pesalaa-Do Ue Ala atuu nahina makurano;
dandi-Do i Ue atuu inarahakoomo;
Ondaemo kantano luwuno mia
anu mpepekadudui ndi Ondae.
32Hangano isemake Ondae Ue Ala sangkadio Ondae i Ue,
ka isemake torukuno watu sangkadio Ondae Ue Alato?
33Ondaemo Ue Ala, Ondaemo anu umonggoakono roso tongaku
ka weweuo pesalaaku nahina umonsoio;
34 #
Hab. 3:19
anu weweuo karuku kana karuno rusa
ka weweu aku mentade a mpo'ingaa mantande;
35anu paguruo kaeku metea,
ranta tokiaku mokolongkuo pana mala.
36Omiu weeakune kanta tekaduduia-Miu,
kae ngkoana-Miu tumumbo aku,
pontulungi-Miu weweu aku moroso ka mosia,
37Ipokomaluao pesalaaku,
ka karuku nahi telelu.
38Kulampui ira iwaliku ranta kurako ira,
ka nahi kupewolili ranta ka dometampula;
39kupirego ira, ranta nahi dompentade mbo'u;
ondae ntebangku a toto ngkaruku.
40Tongaku I'onggoakonomo moroso ka kupetea;
Omiu mokompetuunduo i totono pabawaku mia anu mentade umewai aku.
41Iweweu ira iwaliku mpewolili mpolai inso i aroku,
ka mia anu me'o'aliaakune kupepate ira.
42Ondae mpebooli, sine nahina anu mongkadudui,
ondae mpebooli ndi Ondae i Ue,
sine nahi Dosangki ira.
43Kupirego ira kana pampawu anu pinuurino angi,
mepasiako ira kana rege a nsala.
44Omiu motola aku inso a mpengengedo tongku;
Omiu motoro aku gagi anu pabawa a luwuno tongku;
tongku anu nahi kuto'ori ira gagi ataku;
45Mansano irongeo birido,
ondae mpetenunu ndi ongkue;
mia mehawe mpetuundu mensila'e aku.
46Mia mehawe mpondende aroado
ka mpeluarako inso a bantedo saru mpondidi-ndidi.
47Ondae i Ue tuwu! Inunde-unde Iramo torukuno watuku,
maramba Iramo Ue Ala Puu Pongkaduduiku,
48Ondaemo Ue Ala anu moweweuakune pombaloa,
ka mokompetuundu ira tongku i totono pabawaku,
49Ondaemo anu motola aku inso a iwaliku.
Tendeano, Omiu anu weweu aku mokopabawai ira anu mpentade umewai aku;
Omiu motola aku inso a mia anu moweweu pobobarasaia.
50 #
Rom. 15:9
Onaemo pu'uno aku menaniako po'unde-unde umunde-unde Komiu i olodo luwuno tongku, oo Ue,
ka menaniako penani umunde-undeo nee-Miu.
51Ondae moweeakono luwuno ponangia langkai ndi mokole anu pinotoro-Do,
ka mopokitao pompehohawa a mia anu inurapi-Do,
ndi Daudi ka inuleno anu nahina tampulaano.”
Currently Selected:
Po'unde-unde 18: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
