Po'unde-unde 147
147
Pabawa ka pande-Do i Ue mosongka
147:1-20
1Haleluya!
Moiko ntu'u menani umunde-unde Ira Ue Alato,
tekosi ntu'u menaniako penani po'unde-unde.
2Ondae i Ue wanguo Yerusale,
Dopumpu ira to Isaraeli anu ntesiarawo;
3Dotareroo aroano mia anu masusa aroano
ka waluako ira mobelado;
4Ondae tumantuio hadiono anano wula
ka pauo neeno nte'o'asa.
5Langkai pabawa-Do Ueto ka tedoa Ira moroso,
pande-Do mosongka nahina tompaano.
6Ondae i Ue wali mokorosoo mia anu tepokonsii,
sine mia mosa'o gauno pinotii hawe a wita.
7Penaniakomo penani po'unde-unde tia-Do i Ue,
penanimo po'unde-undeako katapi tia-Do Ue Alato!
8Ondaemo anu tumutuwiakono seru langi,
anu mompatinda usa tiano tolino,
ka weweu ira torukuno ka ituwu ewo.
9Ondaemo anu moweeako ira kaanga pinotuwu,
a anano manu-manu paa-paa anu mompiu-piu.
10Komba inehe-Do montamano ngara mpetea,
nahi Dopemoikoo rosono karuno tama;
11Ondae i Ue memoikoo mia anu doitoako Ira,
a mia anu momperorohi a pompehohawa-Do.
12Pelangkai Iramo i Ue, hei Yerusale,
unde-unde Iramo Ue Alamu, hei Sioni!
13Hangano, Dopokorosoo lansono pewowa langkaimu,
ka rumonso ira anamu anu mekongko i olomu.
14Dopoweeakono manangaia a witamu
ka mokomowohiakomu gandu anu lalu moiko.
15Dopotiio dandi-Do i tolino;
sarai koa pau-Do ipelulu.
16Dopotiio seru baku kana wulu bimba
ka rumawoo tontoru baku kana awu.
17Dopetadiakono usa seru baku kana one molaba.
Isemake anu mokompeteao morinino laromeene-Do?
18Do'oliwio pau-Do, ka i'amba loono luwuno,
Dopepuuriakono angi-Do, ka i'amba waa uwoi.
19Dopohaweo pau-Do ndi Yako,
luwuno pompakosi-Do ka songka-Do a nto Isaraeli.
20Nahi Dopoweweu kanandio a luwuno tongku,
ka luwuno songka-Do nahi domento'orio.
Haleluya!
Currently Selected:
Po'unde-unde 147: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
