Po'unde-unde 145
145
Po'unde-unde a langkaino pabawa ka moiko-Do i Ue
145:1-21
1Po'unde-unde inso ndi Daudi.
Aku melangkai Komiu, oo Ue Alaku, oo Mokole,
ka aku umunde-undeo mpiha nee-Miu ranta nahina tampulaano.
2Sompo oleo aku umunde-unde Komiu,
ka melangkaio mpiha nee-Miu ranta nahina tampulaano.
3Langkai pabawa-Miu ka tedoa inunde-unde,
ka langkaino pabawa-Do nahi pinokohawe laro.
4Mapa'api-api inule ta pinelangkai luwuno inangga-Miu
ka ira mempaleleo langkaino roso-Miu.
5Maramba-Miu anu langkai ta mewanta
ka luwuno wineweu-Miu anu kinohali-haliako aku menaniakono.
6Luwuno wineweu-Miu anu mongkokongiri ta pinalele
ka langkaino pabawa-Miu aku tumutuluo.
7Pepopoto'ori a mpoweweu-Miu moiko anu langkai ta pinalele
ka ira mengkokora-kora memawongkoakono moleo-Miu.
8Ondae i Ue atuu me'aroa ka mompehohawa,
tedoa sabara ka langkai pompehohawa-Do.
9Ondae i Ue atuu moiko a luwuno mia,
ka mehohawao luwuno anu pinokogagi-Do.
10Luwuno anu pinokogagi-Miu ira mpontarimakasi ndi Omiu, oo Ue,
ka luwuno mia anu pinehohawa-Miu ira me'unde-unde Komiu.
11Ira mempaleleo poparentaa-Miu anu maramba,
ka ira mempopauo langkaino roso-Miu,
12ka domempauako ira luwuno anano mia langkaino roso-Miu,
ka poparentaa-Miu anu maramba ka mewanta.
13Poparentaa-Miu onaemo poparentaa ranta tampulaano wawontolino,
ka poparentaa-Miu nahi bali a luwuno inule.
Ondae i Ue atuu Do'ihiio luwuno pinau-Do
ka buke pompehohawa a luwuno wineweu-Do.
14Ondae i Ue atuu tumbodo mia anu tedonta
ka mokorosoo luwuno mia anu tetuundu telusa.
15Matano luwuno anu tuwu sumikori Komiu,
ka Ipoweeako ira kaanga a tempono;
16Omiu anu wileo kae-Miu
ka mokosompoo kineredo luwuno anu tuwu.
17Ondae i Ue atuu moleo a luwuno poweweu-Do
ka buke pompehohawa a luwuno wineweu-Do.
18Ondae i Ue umpeda a sompo mia anu mebooli ndi Ondae,
a sompo mia anu metenunu mebooli ndi Ondae.
19Ondae umihiio po'eheno mia anu doitoako Ira,
merorongeakono peraalido mpepetulungi ka kumadudui ira.
20Ondae i Ue dumagaio luwuno mia anu pinehohawa-Do,
sine luwuno mia mosa'o gauno Dopepate ira.
21Ngangaku ta mompau po'unde-unde ndi Ondae i Ue
ka po'ineeomo luwuno anu tuwu umunde-undeo nee-Do anu mempori
ranta nahina tampulaano.
Currently Selected:
Po'unde-unde 145: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
