Po'unde-unde 144
144
Po'emano mokole mo'aropi peteaa
144:1-15
1Inso ndi Daudi.
Inunde-unde Iramo i Ue, torukuno watuku,
anu paguruo kaeku metea,
ka wunga ngkaeku metea.
2Ondaemo pe'asaku anu metenunu ka bente pekorahakoaku,
kota benteku ka anu kumadudui aku,
kantaku ka po'ianga pepetulungiaku,
anu mokompetuundu ira luwuno tongku i totono pabawaku!
3 #
Ayb. 7:17-18; Pud. 8:5 Oo Ue, hapake mia atuu, ranta ka Iperioo,
ka anano mia, ranta ka Iperorohio?
4Mia mengkena kana angi anu mepuuri,
luwuno oleo ntuwuno kana eo-eo anu telalo.
5Oo Ue, Ilongkuomo langi-Miu ka Ipetiimo,
Idanggi iramo torukuno, ranta ka ime'ahu!
6Ipesembiako iramo koliki ka Isiarawo iramo,
Ipotola iramo pana-Miu ka Isiarawo iramo!
7Itasiomo kae-Miu inso a mantandeano,
Ipokomalua akumo ka Ipotola aku
inso a moowo anu mongkokongiri,
inso a pokungkuno mia hawe.
8Ngangado mpompau pegaupi
ka kae ngkoanado mpesumpa nahi mentee.
9Oo Ue Ala, aku menaniako-Miu penani wo'ohu,
saru gambusu hopulu kolorono aku menani umunde-undea-Komiu,
10Omiu anu moweeakono ponangia a luwuno mokole,
ka motolao i Daudi, tetenaa-Miu!
11Ipotola akumo inso a mponai masolaa
ka Ipotola akumo inso a pokungkuno mia hawe.
Ngangado mpompau pegaupi
ka kae ngkoanado mpesumpa nahi mentee.
12Po'ineeomo nana'ote ntamato kana pinopaho
anu tuwu mewalo tempono i mongura,
ka nana'ote beineto kana luwuno karuno siuno,
anu pina'o tiano langkanae winangu!
13Po'ineeomo luwuno godato bukeako
mperupa-rupa hasilino usahato;
bawaano bembe bimbato gagi sowu-sowuno,
tendeano pulu nsowu a ntonga mpadato!
14Po'ineeomo sapito ka domemewalo;
nahina mbo'u haki lele ka anu tewunsuli,
nahina peraali a luwuno tanalapato!
15Me'uraomo tongku anu kanatuu teweweuno!
Me'uraomo tongku anu Ue Alano onaemo Ondae Ue!
Currently Selected:
Po'unde-unde 144: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
