Po'unde-unde 139
139
Pekakai ndi Ondae Ue Ala anu tumo'orio luwu
139:1-24
1Tiano petewawado anu mpenani. Penani po'unde-undeno i Daudi.
Ue, Omiu momparesa ka tumo'ori aku;
2Omiu tumo'orio tempono kupentoro ke mentade,
Omiu mokonto'orio pinewowoloku inso olai.
3Omiu mekokoongakune tempono kupelempa ke mepombole,
luwuno pesalaaku Ito'orio.
4Hangano eloku napi poluarako pau,
menteeano, luwuno Ito'oriomo, oo Ue.
5Inso i bungkuno ka inso i arono Omiu wala aku,
ka Inaao kae-Miu i wawoku.
6Tedoa kukohali-haliakono ponto'ori atuu,
mantande lahi, nahi kupolio humaweo.
7Isua kupokolako olaiakono penaa-Miu,
isua kupokompolai inso i aro-Miu?
8Tewala mewuatako aku i langi, Omiu kongko i ra'ai;
tewala kunaao poturiaku a tolinodo mia mate, Omiu mbo'u kongko i tu'ai.
9Tewala kupeneeako panino towea,
ka moweweu po'ianga i tompano tahi,
10i ra'ai mbo'u kae-Miu ta tumaate aku,
ka kae ngkoana-Miu umini aku.
11Tewala kupotae, ”Po'ineeomo koa ka itutuwi aku wongi-wongi,
ka mewine anu lumimbu aku gagi wongi,”
12ka wongi-wongi mbo'u komba Ipewongi-wongio,
ka wongi gagi mewine kana meene;
wongi-wongia mengkena kana meene.
13Menteeano, Omiumo anu weweuo wua horiku,
weweu aku a laro mpe'anakaado ineku.
14Montarimakasi aku ndi Omiu hangano ongkue pinokogagi montonda rupa-Miu;
kinohali-haliako hapa anu wineweu-Miu,
ka ito'orio ntu'u sumangaku.
15Luwuno wukuku nahi te'egoi inso a pongkita-Miu,
tempono kupinokogagi a mpo'ianga anu tewuni,
iwineweu a ntia-tiano tolino anu i totono ntu'u;
16mata-Miu kumita aku tempono da a laro mpe'anakaa,
ka a wunta-Miu luwuno teburiomo,
luwuno oleo anu pinokogagiomo,
se'eluno napi hina maupo te'asa oleo.
17Kupemotungkoo ntu'u pinewowolo-Miu, oo Ue Ala!
Tedoa ntu'u hadio!
18Tewala aku dumoao, hadioopo atuu sekonopo one.
Tempono kupenaa-naa, mengkaa ongkue da saru Omiu.
19Po'ineeomo ka ipepateo mia mosa'o gauno, oo Ue Ala!
Ime'olaimo inso ndi ongkue, hei luwuno anu mpo'uwu rea!
20Ondae mpompau pegaupi mongkona Omiu,
ka nahina tuduno umewai Komiu.
21Nde kana'umpe ka nahi aku umo'aliaakono mia anu umo'aliaa-Komiu, oo Ue,
ka nahi aku te'osaakono mia anu mentade umewai Komiu?
22Tedoa ku'o'aliaako ira,
ondae gagi iwaliku.
23Iparesa akumo, oo Ue Ala, ka Ito'oriomo aroaku,
I'arahakunemo ka Ito'oriomo luwuno pinewowoloku;
24Ikitaomo, ba mansa nahi mentee pesalaaku,
ka Itaate akumo a nsala anu nahina tampulaano!
Currently Selected:
Po'unde-unde 139: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
