Po'unde-unde 119
119
Me'urano mia anu tuwu montonda Taura-Do i Ue
119:1-176
1Me'uraomo mia anu tuwuno nahina tataano,
anu tuwu montonda Taura-Do i Ue.
2Me'uraomo mia anu uminio luwuno pepopoto'ori-Do,
anu umungke Ira tompaano aroano.
3Ondae nahi dompoweweu anu mosa'o,
sine tuwu mentondao luwuno pesalaa-Do.
4Omiumo anu mohaweo luwuno parenta-Miu,
kai inini tementee ntu'u.
5Po'ineeomo ka imoroso luwuno pesalaaku
i larono kupe'ini a pompakosi-Miu!
6Nahi aku pinokoko'ii,
tewala kupepenteeo luwuno parenta-Miu.
7Aku montarimakasi ndi Omiu a moputeno aroa,
tewala kupepaguruakono luwuno songka-Miu anu moleo.
8Aku me'ini a luwuno pompakosi-Miu,
osi'i ntu'u Ibinta aku.
9Kana'umpe idagaio mia mongura peleluno ka si hina tataano?
Saru me'ini a mpau-Miu.
10Tompaano aroaku ku'ungke Komiu,
si po'inee aku pansia inso a luwuno parenta-Miu.
11Dandi-Miu kunaao i laro aroaku,
ka si kutehala ndi Omiu.
12Inunde-unde Komiumo, oo Ue;
Ipaguruakunemo luwuno pompakosi-Miu.
13Saru wiwiku kupopowali-walio
luwuno songka anu pinau-Miu.
14Mawongko aku tumondao luwuno pompakosi-Miu,
laluaopo sekono mompe'ue luwuno arataa.
15Aku mepaguruakono luwuno parenta-Miu
ka mekokoongakono luwuno pesalaa-Miu.
16Ku'ineheakono luwuno pompakosi-Miu,
pau-Miu nahi aku kumolupeo.
17Iweweuomo anu moiko a ntetenaa-Miu andio, ka kutuwu,
ka me'ini a mpau-Miu.
18I'ungkahiomo mata-Miu ka kukitao
luwuno anu kinohali-haliako inso a Songka-Miu.
19Ongkue andio butu mia hawe i tolino,
siimo Iwuniakune luwuno parenta-Miu.
20Masusa aroaku hangano tekewoi
a luwuno songka-Miu sompo tempo.
21Omiu wuraraio mia mompelangka-langkai,
mia tetotonaa anu pansia inso a luwuno parenta-Miu.
22Ipoko'olaiomo pontata ka pompokongkodei inso ndi ongkue,
hangano ongkue uminio luwuno pepopoto'ori-Miu.
23Maupo luwuno mia pinemota'u mpentoro ntepo'asa umewai aku,
tetenaa-Miu kongkono menootio luwuno pompakosi-Miu.
24Oo, luwuno pepoto'ori-Miu gagi ku'ineheakono,
gagi luwuno anu patudu aku.
25Sumangaku tebangku a laro pampawu,
ipotuwu akumo menunu saru pau-Miu.
26Luwuno sala ntumuwuku kututuluo ka Isangki aku,
Ipaguruakunemo luwuno pompakosi-Miu.
27Iweweu akumo mokonto'orio pontisono luwuno parenta-Miu,
ka kupenootio luwuno wineweu-Miu anu kinohali-haliako.
28Weera uwoi mataku hangano masusa,
Ipokoroso akumo menunu saru pau-Miu.
29Ipoko'olaiomo sala mpegaupi inso ndi ongkue,
ka Iweeakunemo Songka-Miu.
30Mobiniki aku sala menteea,
luwuno songka-Miu kunaaomo i aroku.
31Me'ini aku moroso a luwuno pepopoto'ori-Miu,
oo Ue, si po'inee aku pinokoko'ii.
32Aku melulu tumondao luwuno parenta-Miu,
hangano Ipokonsanaao aroaku.
33Ipaguruakunemo pengkonaano luwuno pompakosi-Miu, oo Ue,
aku uminio hawe pokotompaano tempo.
34Iwee akumo ponto'ori, ka kupe'ini a Songka-Miu;
aku mekariao tompaano aroaku.
35Iwawa akumo a nsala tumondao luwuno parenta-Miu,
hangano ineheku.
36Ipo'aroomo aroaku a luwuno pepopoto'ori-Miu,
ka osi'i a modokoa.
37Ilimbaomo pengkitaku inso a hapa anu nahina tuduno,
Iweweu akumo tuwu a mpo'ehe-Miu!
38I'ihiiomo dandi-Miu a ntetenaa-Miu
anu Iweeakono mia anu doito ndi Omiu.
39Ipoko'olaiomo pontata anu kudoitoakono,
hangano luwuno songka-Miu atuu moiko.
40Mentee ntu'u kukekewoio luwuno parenta-Miu,
Iweweu akumo tuwu a moleo-Miu.
41Po'ineeomo pompehohawa-Miu ka ihawe ndi ongkue, oo Ue,
pongkadudui-Miu menunu saru dandi-Miu,
42ka kupolio sumangkio mia anu tumata aku,
hangano kupe'ala-alao pau-Miu.
43Po'ineeomo ka ipo'ia mpiha pau menteea-Miu a ngangaku,
hangano ongkue momperorohi a luwuno songka-Miu.
44Aku me'ini mpiha a Songka-Miu,
ranta nahina tampulaano.
45Aku bebasi melempa,
hangano ku'ungkeo luwuno parenta-Miu.
46Aku mepau mongkona luwuno pepopoto'ori-Miu i arodo luwuno mokole,
ka nahi aku mokoko'ii.
47Ku'ineheakono luwuno parenta-Miu
anu lano kukekewoio.
48Kutineo kaeku a luwuno parenta-Miu anu kinekewoiku,
ka menootio luwuno pompakosi-Miu.
49Irambeomo pau anu pinau-Miu a ntetenaa-Miu,
hangano onae Iweweu aku momperorohi.
50Ndiomo pontareroku a laro marasaiku,
nine dandi-Miu moweeakune tuwua.
51Lansara ntu'u ipopodeu-deu aku mia mompelangka-langkai,
sine nahi kupansia inso a Songka-Miu.
52Tewala kurambeo luwuno songka-Miu anu inso i ndi'ipua se'eluno,
ka tetarero akumo, oo Ue.
53Ipabawai aku bamburua a luwuno mia anu mosa'o gauno,
anu bintao Songka-Miu.
54Luwuno pompakosi-Miu gagi penani po'unde-undeku
i tolino anu kupo'iangario kana mia hawe.
55I tempono wongi kurambeo nee-Miu, oo Ue;
aku me'ini a Songka-Miu.
56Ndiomo anu hinaweku:
Ku'inio luwuno parenta-Miu.
57Ondaemo i Ue tiaku,
medandi aku me'ini a luwuno pau-Miu.
58Tompaano aroaku ku'emao pompehohawa-Miu,
Ipehohawa akumo menunu saru dandi-Miu.
59Kupewowoloomo luwuno sala ntumuwuku,
ka melempaakono karuku mepokule a luwuno pepopoto'ori-Miu.
60Montuturako aku ka nahi kupe'ara-arai
me'ini a luwuno parenta-Miu.
61Luwuno kolorodo mia mosa'o gauno wewesi aku,
sine Songka-Miu nahi kukolupeo.
62Ntonga wongi kupewangu ka montarimakasi ndi Omiu hangano
luwuno songka-Miu anu moleo.
63Gagi aku wali-walido luwuno mia anu doitoa-Komiu,
ka mia anu me'ini a luwuno parenta-Miu.
64Tolino bukeako pompehohawa-Miu, oo Ue,
Ipaguruakunemo luwuno pompakosi-Miu.
65Moweweu Komiumo moiko a ntetenaa-Miu,
menunu saru pau-Miu, oo Ue.
66Ipaguruakunemo ponto'ori ka pontimbanga anu mentee,
hangano kupe'ala-alao luwuno parenta-Miu.
67Se'eluno napi kupine'uru-uru, da tesaa aku,
sine kanandio-andio ongkue me'ini a dandi-Miu.
68Omiu moiko ka moweweu moiko;
Ipaguruakunemo luwuno pompakosi-Miu.
69Mia anu mompelangka-langkai sumosa'aiakono pegaupi nee-Ku,
sine tompaano aroa aku uminio luwuno parenta-Miu.
70Aroado pudu-pudu kana tetutuwiako taba,
sine ongkue ineheakono Songka-Miu.
71Lano kupemoikoo nine ongkue pinokongkodei,
ka kupepaguruakono luwuno pompakosi-Miu.
72Taura anu pinohawe-Miu masuliopo olino ndi ongkue
sekonopo sowuno lempe wulaa ka salaka.
73Kae-Miumo mokogagi ka weweu aku,
Ipowee akumo pompokonto'ori ka kupolio mepaguruakono luwuno parenta-Miu.
74Mia anu doito ndi Omiu kumita aku ka mawongko,
hangano ongkue momperorohi a mpau-Miu.
75Kuto'orio, oo Ue, nine luwuno songka-Miu moleo,
ka nine tekona Ipokongkodei aku.
76Po'ineeomo pompehohawa-Miu tumarero aku,
menunu saru dandi anu pinau-Miu a ntetenaa-Miu.
77Po'ineeomo pompehohawa-Miu ka ihawe ndi ongkue, ka kutuwu,
hangano ku'ineheakono Songka-Miu.
78Po'ineeomo mia anu mompelangka-langkai ipinokoko'ii,
hangano molengkudo mempopo'oo aku
sine aku menootio luwuno parenta-Miu.
79Po'ineeomo mia anu doito ndi Omiu aiwa ndi ongkue,
luwuno mia anu tumo'orio luwuno pepopoto'ori-Miu.
80Po'ineeomo aroaku ka itondao luwuno pompakosi-Miu inso i aroa,
ka si kupohawe mokoko'ii.
81Masusa aroaku monsisikori pongkadudui-Miu,
momperorohi aku a mpau-Miu.
82Mataku mooro monsisikori dandi-Miu;
kupotae, ”Te'ipiake Komiu tumarero aku?”
83Maupo kugagi mokari kana kadu-kadu anggoro anu sinompui,
luwuno pompakosi-Miu nahi kukolupeo.
84Opia mbo'u tehineno ta tuwu tetenaa-Miu andio?
Te'ipia Ihuku ira mia anu lumampui aku?
85Mia mompelangka-langkai mongkekeomo aa tedontaaku,
nahi domperioo Songka-Miu.
86Luwuno parenta-Miu pine'ala-ala;
Itulungi akumo hangano domelampui aku nahina pu'uno!
87Ilawupo dompokotampula aku inso i wawontolino,
sine nahi kubintao luwuno parenta-Miu.
88Iweweu akumo tuwu menunu saru pompehohawa-Miu,
ka kupe'ini a mpepopoto'ori anu Iweeakune.
89Ranta nahina tampulaano, oo Ue,
pau-Miu moroso i suruga.
90Petenunu-Miu nahi penaa-naa mapa'api-api inule;
Ipontadeomo tolino ranta ka ipentade moroso.
91Montonda luwuno songka-Miu, luwuno mentade moroso hawe oleo andio,
hangano luwuno atuu onaemo tetenaa-Miu.
92Ande-andeno Songka-Miu komba gagi anu ineheku,
mate akumo a laro marasaiku.
93Ranta nahina tampulaano nahi aku kumolupeo luwuno parenta-Miu,
hangano saru atuu Iweweu aku tuwu.
94Ongkue andio mia-Miu, Ikadudui akumo,
hangano ku'ungkeo luwuno parenta-Miu.
95Mia mosa'o gauno mo'ungke akala mepate aku;
sine kongkoku mekokoongakono luwuno pepopoto'ori-Miu.
96Kukitao nine luwuno anu soompo ntu'u hinao tidano,
sine parenta-Miu malua ntu'u.
97Kukekewoio ntu'u Songka-Miu!
Kupenootio hawe sumoo oleo.
98Parenta-Miu weweu aku lalu pande mosongka sekono luwuno iwaliku,
hangano onaemo anu kumongkomi aku ranta nahina tampulaano.
99Molinoopo pinewowoloku sekonopo luwuno anu paguru aku,
hangano luwuno pepopoto'ori-Miu anu kupenootio.
100Ongkue lalu mokonto'orio sekonopo luwuno mia mota'u,
hangano ku'inio luwuno parenta-Miu.
101Ku'ontoo karuku inso a luwuno pesalaa anu mosa'o,
ka kupe'ini a mpau-Miu.
102Nahi kupansia inso a luwuno songka-Miu,
hangano Omiumo anu paguru aku.
103Mo'ahi ntu'u dandi-Miu atuu a eloku,
mo'ahiopo sekono siu hoani a ngangaku.
104Inso a luwuno parenta-Miu kupohawe ponto'ori,
onaemo pu'uno ku'o'aliaakono luwuno pesalaa anu nahi mentee.
105Pau-Miu atuu huluno karuku
ka mewineno pesalaaku.
106Mesumpa akumo ka aku umihiio,
aku me'ini a luwuno songka-Miu anu moleo.
107Tedoa aku tepokonsii,
oo Ue, Iweweu akumo tuwu menunu saru pau-Miu.
108Ipemoikoomo, oo Ue, po'unde-unde pinesombaakoku,
ka Ipaguruakunemo luwuno songka-Miu.
109Tuwuku wela pino'aroako masolaa,
sine Songka-Miu nahi kukolupeo.
110Mia mosa'o gauno monta'oomo oho ta mopo'oo aku,
sine nahi kupansia inso a luwuno parenta-Miu.
111Luwuno pepopoto'ori-Miu onaemo tia pusakaku ranta nahina tampulaano,
hangano luwuno atuu gagi pokomawongkono aroaku.
112Kupo'asaomo aroaku aku weweuo luwuno pompakosi-Miu,
ranta nahina tampulaano, ranta pokotompaano tempo.
113Mia anu mesampa aroano ku'o'aliaakono,
sine Songka-Miu kukekewoio.
114Omiumo pewuniaku ka kantaku;
kuperorohio pau-Miu.
115Ime'olaimo inso ndi ongkue, hei luwuno anu mpoweweu mosa'o;
aku uminio luwuno parenta-Do Ue Alaku.
116Ipokoroso akumo menunu saru dandi-Miu, ka kutuwu,
si po'inee aku ranta mokoko'ii a laro pomperorohiku.
117Ipokowali akumo, ka kutekadudui
ka mekokoongakono mpiha luwuno pompakosi-Miu.
118Luwuno mia anu pansia inso a luwuno pompakosi-Miu nahi Itarima ira,
hangano nahina tuduno pe'akalado.
119Luwuno mia mosa'o gauno Itadi ira kana ta'i labu;
onaemo pu'uno ka kukekewoio luwuno pompakosi-Miu.
120Koroiku mondidi-ndidi doitoa-Komiu,
kudoitoakono luwuno songka-Miu.
121Moweweu akumo menunu saru songka ka moleoa;
si peweengakune ndi ondae anu pompokonsii!
122Gagimo pe'inia a tetenaa-Miu a moikoa,
ka si pokonsii aku mia mompelangka-langkai.
123Mataku mooro monsisikori pongkadudui-Miu
ka dandi-Miu anu moleo.
124Iweweuomo tetenaa-Miu menunu saru pompehohawa-Miu,
ka Ipaguruakunemo luwuno pompakosi-Miu.
125Ongkue andio tetenaa-Miu, Ipowee akumo ponto'ori,
ka kupokonto'orio luwuno pompakosi-Miu.
126Ndiomo tempono Dopelelu i Ue,
hangano Songka-Miu domelimpaiomo luwuno mia.
127Onaemo pu'uno ka kukekewoio luwuno parenta-Miu
laluaopo sekono wulaa maupo wulaa mpena.
128Onaemo pu'uno ka kutuwu moleo tumondao luwuno parenta-Miu;
pesalaa nahi mentee ku'o'aliaakono.
129Kinohali-haliakoomo luwuno pepopoto'ori-Miu,
onaemo pu'uno, ka ku'inio.
130Luwuno pau-Miu anu pinosaba mompokomewine,
moweeako ira ponto'ori a mia anu napi hina pinembasaino.
131Konganga-nganga aku a laro ntekewoi,
kumekewoio luwuno parenta-Miu.
132Ipewolilimo ndi ongkue ka Ipehohawa akumo,
montonda moleo-Miu a luwuno mia anu kumekewoio nee-Miu.
133Ipokorosoomo pelempaku menunu saru dandi-Miu,
ka si pabawai aku maupo hapa anu mosa'o.
134Ipotola akumo inso a pompokonsiino mia,
ka kupe'ini a luwuno parenta-Miu.
135Iwantahiakonomo rupa-Miu tetenaa-Miu,
ka Ipaguruakunemo luwuno pompakosi-Miu.
136Uwoi mataku waa kana waaano uwoi,
hangano mia nahi pe'ini a Songka-Miu.
137Omiu moleo, oo Ue,
ka luwuno songka-Miu mentee.
138Luwuno pepopoto'ori-Miu Ipohaweomo montonda moleoa
ka butu a laro luwuno petenunu.
139Tekuda anu mongkokongiri mokopingko aku,
hangano luwuno anu umewai aku mengkolupeo luwuno pau-Miu.
140Dandi-Miu tedoa moroso,
ka tetenaa-Miu kumekewoio.
141Ongkue andio kodei ka mongkoko'undu,
sine luwuno parenta-Miu nahi kukolupeo.
142Moleo-Miu nahi bali ranta nahina tampulaano,
ka Songka-Miu mentee.
143I'alu aku masusaa ka ma'isoa,
sine luwuno parenta-Miu gagi tedoa ineheku.
144Luwuno pepopoto'ori-Miu moleo ranta nahina tampulaano,
Iweweu akumo mokonto'orio ka kutuwu.
145Mebooli aku tompaano aroaku, Isangki akumo, oo Ue!
Luwuno pompakosi-Miu aku uminio.
146Mebooli aku ndi Omiu, Ikadudui akumo!
Aku koa me'ini a luwuno pepopoto'ori-Miu.
147Mo'o-mo'oru ntu'u kupewangu ka mebooli mepetulungi;
momperorohi aku a mpau-Miu.
148Ongkue mekaangako sompo tempo daga wongi
ka kupenootio dandi-Miu.
149Irongeomo suaraku menunu saru pompehohawa-Miu;
Iweweu akumo tuwu menunu saru songka-Miu, oo Ue.
150Luwuno mia anu lumampui aku saru tinoo mosa'o me'umpeda,
ondae me'olai inso a Songka-Miu.
151Omiu umpeda, oo Ue,
ka luwuno parenta-Miu mentee.
152Lano tehineomo kuto'orio luwuno pepopoto'ori-Miu,
anu pinakosi-Miu ranta nahina tampulaano.
153Ikitaomo marasaiku ka Ipotola akumo,
hangano Songka-Miu nahi kukolupeo.
154Ikorahakonomo kara-karaku ka Itolosi akumo,
Iweweu akumo tuwu menunu saru dandi-Miu.
155Tekaduduia atuu olai inso a luwuno mia mosa'o gauno,
hangano nahi dome'ungkeo luwuno pompakosi-Miu.
156Langkai ntu'u pompehohawa-Miu, oo Ue,
Iweweu akumo tuwu menunu saru luwuno songka-Miu.
157Anu mpolampui ka anu umewai aku lano hadio,
sine nahi kupansia inso a luwuno pepopoto'ori-Miu.
158Kumita ira anu mpohapu pedandia, kumokoburuakono,
hangano nahi dompe'ini a dandi-Miu.
159Ikitaomo, tedoa kukekewoio luwuno parenta-Miu!
Iweweu akumo tuwu menunu saru pompehohawa-Miu, oo Ue.
160Anu lalua i larono pau-Miu onaemo menteea
ka luwuno songka-Miu anu moleo nahi bali ranta nahina tampulaano.
161Luwuno anu langkai potorono melampui aku nahina pu'uno,
sine butu a mpau-Miu aroaku doito.
162Kupo'undeakono dandi-Miu,
kana mia anu mohawe hadio pinomuru.
163Ku'o'aliaakono ka kumokoburuakono pegaupi,
sine Songka-Miu kukekewoio.
164Pepintu asa oleo ku'unde-unde Komiu,
hangano luwuno songka-Miu anu moleo.
165Tedoa iramo sintuwu manangai mia anu kumekewoio Songka-Miu,
nahina watu tetiduado.
166Momperorohi aku tekaduduia inso ndi Omiu, oo Ue,
ka kuweweuo luwuno parenta-Miu.
167Me'ini aku a luwuno pepopoto'ori-Miu,
ka tedoa kukekewoio.
168Me'ini aku a luwuno parenta-Miu ka luwuno pepopoto'ori-Miu,
hangano luwuno tumuwuku nahina tewuni i aro-Miu.
169Po'ineeomo pebooliku ka ihawe i aro-Miu, oo Ue;
powee akumo ponto'ori menunu saru pau-Miu.
170Po'ineeomo po'emaku ka ihawe i Aro-Miu;
Ipotola akumo menunu saru dandi-Miu.
171Po'ineeomo wiwiku ka ipompau po'unde-unde,
hangano Ipaguruakunemo luwuno pompakosi-Miu.
172Po'ineeomo eloku ka ipenaniako dandi-Miu,
hangano luwuno parenta-Miu moleo.
173Po'ineeomo kae-Miu gagi tumulungi aku,
hangano kubinikio luwuno parenta-Miu.
174Kukekewoio tekaduduia inso ndi Omiu, oo Ue,
ka Songka-Miu gagi ineheku ntu'u.
175Po'ineeomo ka kutuwu umunde-unde Komiu,
ka luwuno songka-Miu tumulungi aku.
176Tesaa aku kana bimba anu tetadi,
I'ungkeomo tetenaa-Miu andio,
hangano luwuno parenta-Miu nahi kukolupeo.
Currently Selected:
Po'unde-unde 119: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
