Po'unde-unde 118
118
Penani morame-rameakono ponangia
118:1-29
1 #
Pud. 100:4-5; 106:1; 107:1 Pontarimakasimo ndi Ondae i Ue, hangano moiko Ira!
Menteeano ranta nahina tampulaano pompehohawa-Do.
2Po'ineeomo to Isaraeli dompotae,
”Menteeano ranta nahina tampulaano pompehohawa-Do!”
3Po'ineeomo sukuno i Haruni dompotae,
”Menteeano ranta nahina tampulaano pompehohawa-Do!”
4Po'ineeomo mia anu doitoako Ira i Ue mpotae,
”Menteeano ranta nahina tampulaano pompehohawa-Do!”
5A laro pompema'iso ongkue mebooli ndi Ondae i Ue.
Dosangki akumo i Ue saru moweeakune koloaa.
6 #
Ibr. 13:6
Ondae i Ue kumongkomi aku, nahi kudoito.
Hapake anu pinolino mia weweuo ndi ongkue?
7Ondae i Ue kumongkomi aku ka tumulungi aku;
aku me'uru-uru ira mia anu umo'aliaakune.
8Moikoopo mepekadudui ndi Ondae i Ue
sekonopo mompe'ala-ala a mia.
9Moikoopo mepekadudui ndi Ondae i Ue
sekonopo mompe'ala-ala a luwuno ulea mokole.
10Luwuno tongku mengkadu aku,
sine a nee-Do i Ue kupuduo pesapoido.
11Domengkadu aku, oo mengkadu aku,
sine a nee-Do i Ue kupuduo pesapoido.
12Domengkadu aku kana hoani,
kolanga-langa kana api a laro ewo rui,
sine a nee-Do i Ue kupuduo pesapoido.
13Ongkue hinidi ka hinidi ka kutedonta,
sine Ondae i Ue tumulungi aku.
14 #
Pel. 15:2; Yes. 12:2 Ondae i Ue atuu rosoku ka penani po'unde-undeku;
gagi Iramo tekaduduiku.
15Suara kokora-kora memawongko ka ponangia teronge
a ngkemado mia mentee,
”Kae ngkoana-Do i Ue moroso montulungi,
16kae ngkoana-Do i Ue tetande mantande,
kae ngkoana-Do i Ue moroso montulungi!”
17Nahi aku mate, sine kongko tuwu,
ka kututuluo luwuno wineweu-Do i Ue.
18Dotunduhi akumo i Ue meroku,
sine nahi Dopeweengakune a matea.
19Ungkahiakunemo pewowa langkaino menteea,
ineheku mewinso i larono,
ka montarimakasi ndi Ondae i Ue.
20Ndiomo pewowa langkai-Do i Ue,
mia mentee ta mewinso i larono.
21Montarimakasi aku ndi Omiu, hangano Isangki akumo
ka gagiomo tekaduduiku.
22 #
Mat. 21:42; Mrk. 12:10-11; Luk. 20:17; Tin. 4:11; 1Pet. 2:7 Watu anu tinadido puu mpowangu
gagiomo watu empehino siuno.
23Mongkona atuu ka igagi hangano Ondae i Ue,
aasa kinohali-haliako a pongkitato.
24Ndiomo oleo anu pinokogagi-Do i Ue,
aiwamo tomengkokora-kora memawongko ka mpo'unde i larono!
25Oo Ue, Ikadudui kamimo!
Oo Ue, Ipowee kamimo manangaia!
26 #
Mat. 21:9; 23:39; Mrk. 11:9; Luk. 13:35; 19:38; Yoh. 12:13 Rinonsoomo onae anu aiwa a nee-Do i Ue!
Kimeronso komiu inso a laro Raha-Do i Ue.
27Ondaemo i Ue, Ue Ala, Ondae wantahi kita.
Tanggoakonomo koloro pesomba oleo langkai atuu
a luwuno tanduno meda pontunua pesomba.
28Omiu Ue Alaku, aku montarimakasi ndi Omiu,
Ue Alaku, aku melangkai Komiu.
29Pontarimakasimo ndi Ondae i Ue, hangano moiko Ira!
Menteeano ranta nahina tampulaano pompehohawa-Do.
Currently Selected:
Po'unde-unde 118: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
