Po'unde-unde 108
108
Pekakai tiano ponangia
108:1-14
1Penani. Penani po'unde-undeno i Daudi.
2 #
Pud. 57:8-12
Aroaku tetinda, oo Ue Ala,
aku menani, aku menani mo'unde-unde.
Pewangumo, hei sumangaku,
3pewangumo, hei gambusu ka katapi,
aku wanguo towea.
4Aku montarimakasi ndi Omiu i olodo luwuno tongku, oo Ue,
ka aku menani umunde-unde Komiu i olodo luwuno suku tongku;
5hangano pompehohawa-Miu maluaopo sekono langi,
ka petenunu-Miu hawe a laro nseru.
6Ipopokitaomo langkaino pabawa-Miu i langi, oo Ue Ala,
ka maramba-Miu i asa wawontolino.
7 #
Pud. 60:7-14
Ka domentola mia anu kinekewoi-Miu,
Ikaduduiakunemo kae ngkoana-Miu ka Isangki aku!
8Ondae Ue Ala mepau Iramo a mpo'ianga mempori-Do,
”Saru pohio mpetea Aku tumia-tiao Sikemi,
ka lembono Sukoti Aku sumongkao.
9Ongkuemo me'ueo Gileadi, Ongkuemo me'ueo Manase,
Eparai onaemo pelingono ulu-Ku,
Yehuda onaemo tuko poparentaa-Ku,
10Moabi onaemo pewo'ohia-Ku,
ndi Edomi Kupetendeakono solopi-Ku,
ka hangano Pelisitea Ongkue kokora-kora mo'unde.”
11Isemake anu ta wawa aku a ngkota anu mebente?
Isemake anu tumaate aku lumako i Edomi?
12Kombake Omiu, oo Ue Ala, anu tumadi kamimo?
Omiu nahi lako, oo Ue Ala, merongaako ira luwuno sorodadumami.
13Itulungi kamimo umaropi ira iwali,
hangano nahina tuduno pongkadudui inso a mia.
14Saru Ondae Ue Ala kita meweweuo luwuno poweweu moroso ka mosia,
hangano Ondae isa'a anu lumolanda ira iwalito.
Currently Selected:
Po'unde-unde 108: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
