Po'unde-unde 109
109
Pekakai mo'ema pombaloa
109:1-31
1Tiano petewawado anu mpenani. Penani po'unde-undeno i Daudi.
Oo Ue Ala inunde-undeku, si po'inee aku!
2Hangano mia mosa'o gauno ka anu mompopo'oo menganga sumapoi aku,
ondae mpopau pegaupi mongkona ongkue;
3saru luwuno pau mpo'o'alia domengkadu aku
ka mpeteaakune nahina pu'uno.
4Gagi sulono pompehohawaku domentuluri aku,
sine kongkoku mekakai.
5Domensuloakono wineweu mosa'o ndi ongkue euno moikoa
ka po'o'alia euno pompehohawaku.
6”Ipotoroakonomo asa mia mosa'o gauno,
ka po'ineeomo asa mia anu motuntu mentade i koanano;
7tewala binitara, po'ineeomo ipeluarako gagi mia anu sala,
ka po'ineeomo pekakaino gagi hala.
8 #
Tin. 1:20
Po'ineeomo tinuwuno ka imakura,
po'ineeomo potorono i'alao mia susua.
9Po'inee iramo anano nahina amado,
ka kombiano gagi tuwu beine.
10Po'inee iramo anano dompelakopi memarasai mpiha ka mpo'ema-ema,
ka mpokare-karei inso a rawo-rawono rahado.
11Po'ineeomo anu monsinga pasua ka i'alangkorao luwuno anu pine'ueno,
ka mia susua mpomuruo hasilino pe'iseino.
12Si hina mia anu kongko mehohawao,
si hina mia anu mehohawa ira anano anu nami hina amado.
13Po'ineeomo ka ipinokotampula inuleno,
ka ipinahihi neeno a inule asa api lembuino.
14Po'ineeomo salado uempu'uno rinorambe i aro-Do i Ue,
ka si pinahihi halano ineno.
15Po'ineeomo luwuno atuu Dowela mekokoongakono i Ue,
ka ipinokotampula rambeado inso i tolino.
16Hangano onae nahi perioo pompehohawa,
ka butu molampui mia marasai ka mongkokolaro
ka mia anu tedoa masusa aroano ka ipinepate.
17Ikekewoio totonaa, onaemo ka itetotonaa;
onae nahi behe ronso, onaemo ka i'olai ronso inso ndi onae.
18Ipakeo totonaa kana lembano,
onaemo ka isumoo pontotonaa kana uwoi a laro ngkoroino,
kana lana a laro luwuno wukuno.
19Po'ineeomo ndi onae totonaa atuu kana sangka anu pinokonano,
kana peboo ntonga anu wela pinakeno.
20Po'ineeomo luwuno atuu inso ndi Ondae i Ue ka igagi tambono mia anu tumuluri aku,
ka tambono mia anu mompau mosa'o mongkona ongkue.”
21Sine Omiu, oo Ue Ala, Ueku,
Ipehohawa akumo hangano nee-Miu,
Ipotola akumo hangano pompehohawa-Miu anu langkai!
22Hangano ongkue mongkokolaro ka marasai,
ka tedoa ondalo mobelano aroaku;
23moliu aku kana eo-eo melaa,
tinapisi aku kana kosume.
24Olontuuku mondidi-ndidi hangano puasa,
ka koroiku gagi morungku, nami mentaba.
25 #
Mat. 27:39; Mrk. 15:29 Gagi akumo tataado;
tempono domengkita aku, mebitu-bitu ulu ira.
26Itulungi akumo, oo Ue, Ue Alaku,
Ikadudui akumo menunu saru pompehohawa-Miu,
27ka domento'orio, nine wineweunomo kae-Miu atuu,
nine Omiumo, oo Ue, anu weweuo.
28Po'ineeomo dompototonaa, polo ka Iporonso;
tewala mpentade ira, ira mempinokoko'ii,
sine tetenaa-Miu ta mawongko.
29Po'ineeomo mia anu tumuluri aku ka ipesangkaako mokoko'iia,
ka po'ineeomo dompelemba meloeako mokoko'ii.
30Tedoa aku montarimakasiako ngangaku ndi Ondae i Ue,
aku umunde-unde Ira i tongano mia hadio.
31Hangano Ondae mentade i koanano mia mongkokolaro
Ira kumaduduio inso a mia anu humukuo.
Currently Selected:
Po'unde-unde 109: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
