Po'unde-unde 107
107
TIANO V:
107–150
Penani pontarimakasido mia anu tinolosi-Do i Ue
107:1-43
1 #
1Taw. 16:34; 2Taw. 5:13; 7:3; Esr. 3:11; Pud. 100:4-5; 106:1; 118:1; 136:1; Yer. 33:11 Pontarimakasimo ndi Ondae i Ue, hangano me'aroa Ira!
Menteeano ranta nahina tampulaano pompehohawa-Do.
2Po'ineeomo atuu domempauo mia anu tinolosi-Do i Ue,
anu tinolosi-Do inso a mpabawa anu mompokoma'iso,
3anu pinumpu-Do inso a luwuno wita susua,
inso i sabaano oleo ka inso i sumooano oleo,
inso i utara ka inso a ntahi.
4Hinao ba'opia mia mpelakopi a mpada malua,
pesalaa lumako a ngkota mpo'ianga nahi domehaweo;
5memokoninggo ira ka memokoranga,
sumangado telusa molema.
6Onaemo ka dompeboo-boolimo ndi Ondae i Ue a laro pompema'isodo,
ka Dopotola ira inso a masusaado.
7Dowawa ira mentondao sala anu moleo,
ranta hawe a ngkota po'ianga.
8Po'ineeomo dompontarimakasi ndi Ondae i Ue hangano pompehohawa-Do,
hangano luwuno wineweu-Do anu kinohali-haliako a luwuno anano mia,
9hangano Dopotendeo sumanga anu mokoranga,
ka sumanga anu mokoninggo Dopokomowohiakono moikoa.
10Hinao ba'opia mia anu mentoro a laro worikidi ka wongi-wongi,
te'uko a mpongu labu anu mobobarasai.
11Hangano dome'ewaio luwuno parenta-Do Ue Ala,
ka mentatao songka-Do Anu Tedoa Mantande,
12Dopokompetuuduo aroado a laro masusaa,
ntetidu ira, sine nahina anu montulungi.
13Onaemo ka dompeboo-boolimo ndi Ondae i Ue a laro pompema'isodo,
ka Dokadudui ira inso a masusado,
14Dowawa ira mpeluarako inso a laro worikidi ka wongi-wongi,
ka Dopuduo luwuno pongudo.
15Po'ineeomo dompontarimakasi ndi Ondae i Ue hangano pompehohawa-Do,
hangano luwuno wineweu-Do anu kinohali-haliako a luwuno anano mia,
16hangano Dopeha ira pewowa mala,
ka Dorawo-rawo ira lansono pewowa labu.
17Hinao mia benge-benge anu marasai hangano halado,
ka hangano luwuno salado;
18domemokoburuakono luwuno kaanga
ka mehawe iramo a mpewowa langkaino matea.
19Onaemo ka dompeboolimo ndi Ondae i Ue a laro pompema'isodo,
ka Dokadudui ira a laro masusado,
20Dopohaweo pau-Do ka mokotompa ira,
motola ira inso a ngkekeno kaburu.
21Po'ineeomo dompontarimakasi ndi Ondae i Ue hangano pompehohawa-Do,
hangano luwuno wineweu-Do anu kinohali-haliako a luwuno anano mia.
22Po'ineeomo dompopesombaako pesomba pontarimakasi,
ka paleleo luwuno inangga-Do saru mengkokora-kora memawongko!
23Hinao ba'opia mia anu lumako sumakio tahi saru ba'opia kapala,
anu mpebalu-balu a ntahi malua;
24domengkitao luwuno inangga-Do i Ue,
ka luwuno wineweu-Do anu kinohali-haliako a ondaloano.
25Ondae mepau, ka i'amba mepuuriomo angi mokora
anu mokolangkaio bombano tahi malua.
26Ondae mentinande hawe i langi ka mempinepasiako a ondaloano tahi,
aroado doito hangano masolaa atuu;
27mokolili uludo ka kobangku-bangku kana mia molangu,
ranta nami domponto'ori hapa dompoweweu.
28Onaemo ka dompeboo-boolimo ndi Ondae i Ue a laro pompema'isodo,
ka Doluarako ira inso a masusaado,
29angi mokora atuu Doweweuomo temonto,
onaemo ka ipenaa-naamo mebomba.
30Mpo'unde ira, hangano luwuno roodo,
ka Dotaate ira a ntiima anu tinunggaido.
31Po'ineeomo dompontarimakasi ndi Ondae i Ue hangano pompehohawa-Do,
hangano luwuno wineweu-Do anu kinohali-haliako a luwuno anano mia.
32Po'ineeomo dome'unde-unde Ira a laro tepumpuano bawaa,
ka umunde-unde Ira a laro majelisi mempinemota'u.
33Doweweu ira korono gagi pada one,
ka mata uwoi gagi wita mokari,
34wita anu mewalo gagi pada mopa'i,
hangano mia anu mpo'iangario mpoweweu anu mosa'o.
35Doweweuo pada one gagi limbo,
ka wita motu'i gagi mata uwoi.
36Donaa ira i ra'ai mia anu hieno memokoninggo,
ka dompowangu kota po'ianga,
37mporawoakono wuku mpinopaho a luwuno lere ka weweu ira lere anggoro,
anu hadio ntu'u hasilino.
38Doronso ira onaemo ka dontetiangi hadio ntu'u,
ka luwuno pinotuwudo Doweweuo nahi makura.
39Sine lembuino ondae gagi memakura ka mpe'i'isei
hangano pompokonsii ka masusa.
40Do'uwuo pompokongkodei a luwuno mia pinemota'u,
ka Doweweu ira mpelakopi a mpada malua anu nahina pesalaa;
41sine mia mongkokolaro Dotandeo inso a marasai,
ka Doweweuo sukudo kana hadiono bawaano bimba.
42Luwuno mia mentee mengkitao, ka do'amba memawongko,
sine luwuno molengkua mpekomu.
43Isema anu hinao ponto'orino anu mentee? Po'ineeomo ka ipe'ini a luwuno atuu,
ka mekokoongakono luwuno pompehohawa-Do i Ue.
Currently Selected:
Po'unde-unde 107: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
