Po'unde-unde 106
106
Pompehohawa-Do Ue Ala ka moteano aroado to Isaraeli
106:1-48
1 #
Pud. 100:4-5
Haleluya!
Pontarimakasimo ndi Ondae i Ue, hangano moiko Ira!
Menteeano ranta nahina tampulaano pompehohawa-Do.
2Isemake anu polio pauo moroso-Do i Ue,
moporongeo luwuno po'unde-unde ndi Ondae?
3Me'ura iramo mia anu mpe'ini a songka,
anu meweweuo moleoa a luwuno tempo!
4Irambe akumo, oo Ue, tewala Ipehohawa ira bawaa-Miu,
Iperio akumo, tewala Ikadudui ira,
5ka kukitao moiko-Miu a luwuno mia bininiki,
ka mawongko a laro mawongkodo bawaa-Miu,
saru mo'unde meronga mia-Miu.
6Omami ka uempu'umami mpoweweu kamimo hala,
mensala kamimo, mpoweweu kamimo gau mosa'o.
7 #
Pel. 14:10-12
Uempu'umami i Masiri
nahi dompokonto'orio luwuno wineweu-Miu anu kinohali-haliako,
nahi domerambeo hadio ntu'u pompehohawa-Miu,
tendeano ondae me'ewa i wiwi ntahi, i wiwi Ntahi Teberau.
8Sine, Dokadudui ira a nee-Do,
Ira mopoto'orio roso-Do.
9 #
Pel. 14:21–15:21
Dowuraraio Tahi Teberau, onaemo ka imo'are,
Dowawa ira mpelempa telalo a ondaloano tahi kana molalo pada one.
10Kanatuumo Dokadudui ira inso a ngkaeno anu mo'o'aliaako,
tumolosi ira inso a ngkaedo iwali;
11uwoi tumutuwi ira luwuno iwalido,
ranta nahina maupo te'asa mia anu tuwu inso ndi ondae.
12Tempo atuu mpompe'ala-ala iramo a luwuno pau-Do,
ka mpenaniako po'unde-unde ndi Ondae.
13Sine, sarai koa ka domengkolupeo luwuno wineweu-Do,
ka nahi domponsikori pontiso-Do;
14 #
Pod. 11:4-34
memodoko ira ntu'u i pada one,
ka umara-arahako Ira Ue Ala a mpada malua.
15Doweeako ira hapa anu inemado,
sine Ondae mompotii haki magasi ipesaki i olodo.
16 #
Pod. 16:1-35
Domemosiriakono i Musa a mpekemaa,
ka ndi Haruni, mia mempori-Do i Ue.
17Tolino menganga ka tumeleo i Datani,
tumutuwio gerombolano i Abirami.
18Api melanga a mpenggowoado,
langano api mokomo'aio luwuno mia mosa'o gauno atuu.
19 #
Pel. 32:1-14
Mpoweweu ira ana nsapi i Horebi,
ka mpenggolontu mpesomba a ntinaha tinawa;
20Ue Alado anu maramba domentobosiakono
lahumoa sapi lakino anu mongkaa ewo.
21Domengkolupe Ira Ue Ala anu kumadudui iramo,
anu mokomengkaaomo langkaino pabawa-Do i Masiri:
22luwuno wineweu anu kinohali-haliako i wita Hama,
luwuno wineweu anu mongkokongiri i wiwi Ntahi Teberau.
23Onaemo ka Dopepau mingki rumopu ira,
ande-andeno i Musa, mia bininiki-Do,
nahi gagi wala i aro-Do,
anu umonsoio mosa'ono aroa-Do rumopu ira.
24 #
Pod. 14:1-35
Nahi domentarimao wita anu tekosi atuu,
nahi dompe'ala-alao pau-Do.
25Mpewuruki ira a ngkemado,
ka nahi domperorongeakono pau-Do.
26Ka i'amba mesumpa Iramo saru tumandeo kae-Do
ka Dopepate ira i pada one,
27 #
Ima. 26:33
ka sumiarawo ira inuledo i olodo tongku,
ka rumawo-rawo ira a witado mia susua.
28 #
Pod. 25:1-13
Ondae mpe'ini moroso a Ba'ala Peori,
ka mengkaano luwuno pesomba sinumbeleako mia mate.
29Aroa-Do dompokomahakiakono wineweudo,
ka haweomo pohuku i olodo.
30Sine i Pinehasi mentade gagi po'oloti,
onaemo ka ipenaa-naa pohuku atuu.
31Onaemo ka Dorekeo Ue Ala mongkona atuu ndi ondae kana menteea
mapa'api-api inule, ranta nahina tampulaano.
32 #
Pod. 20:2-13
Dompokotekuda Ira umpeda uwoi Meriba,
onaemo ka ikonao masolaa i Musa hangano ondae;
33hangano dome'ewaio Penaa-Do,
onaemo ka ipepauki i Musa.
34 #
Mpo. 2:1-3; 3:5-6 Nahi domeropu ira luwuno tongku,
kana anu Doparentaako ira i Ue,
35tendeano dompesaloako ira luwuno tongku,
ka mentondao luwuno wineweudo.
36Ondae mpesomba a lahumoado luwuno tongku,
anu gagi pete'umalaado.
37 #
2Mok. 17:17
Ondae mpesombaakono nana'ote ntamado
ka nana'ote beinedo a luwuno penaa mosa'o,
38 #
Pod. 35:33
ka mpo'uwu reano mia anu nahina salano,
reano nana'ote ntama ka nana'ote beinedo,
anu pinesombaakodo a luwuno lahumoado to Kana'a,
onaemo pu'uno wita atuu ka itesosa'ai hangano pasua rea.
39Koroido domengkokoburutiakono hapa anu wineweudo,
ka mpososaboako luwuno wineweudo.
40 #
Mpo. 2:14-18
Onaemo ka itensila tekuda-Do i Ue a bawaa-Do,
ka Domokoburuako ira mia-Do.
41Dopeweengako iramo a ngkaedo luwuno tongku,
ranta luwuno mia anu umo'aliaako ira pabawai ira.
42Ondae dompokonsii ira iwalido,
onaemo ka dompetenunu i totono pabawado.
43Mararu Dopotola ira,
sine saru luwuno sinongkado kongkodo umewai Ira,
mentoondu ira a laro salado.
44Sine, Doperioo masusa-Do,
tempono Dorongeo peboolido.
45Dorambeo pedandia-Do saru ondae
ka Dopehohawa ira menunu saru langkaino pompehohawa-Do.
46Doweweu ira mpohawe pompehohawa
inso a luwuno mia anu tumawa ira.
47 #
1Taw. 16:35-36
Ikadudui kamimo, oo Ue, Ue Alamami,
ka Ipumpu kamimo inso i olodo luwuno tongku,
ka kimpontarimakasi a nee-Miu anu mempori,
ka memawongko a laro mpo'unde-unde ndi Omiu.
48Unde-unde Iramo i Ue, Ue Alado to Isaraeli,
inso nahina tampulaano hawe nahina tampulaano,
ka po'ineeomo luwuno bawaa mpotae, ”Ami!”
Haleluya!
Currently Selected:
Po'unde-unde 106: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
