Po'unde-unde 105
105
Po'unde-unde a wineweu-Do Ue Ala a ntutuluno amba-ambano bawaa-Do
105:1-45
1 #
1Taw. 16:8-22
Pontarimakasimo ndi Ondae i Ue, pebooliakonomo nee-Do,
popoto'oriomo wineweu-Do i olodo luwuno tongku!
2Penanimo tia-Do, penaniakomo po'unde-unde tia-Do,
popauomo luwuno wineweu-Do anu kinohali-haliako!
3Mawongkomo i larono nee-Do anu mempori,
po'ineeomo ka imawongko
aroado mia anu umungke Ira i Ue!
4Ungke Iramo i Ue ka roso-Do,
ungkeomo mpiha rupa-Do!
5Rambeomo luwuno poweweu kinohali-haliako anu wineweu-Do,
luwuno wineweu-Do anu kinohali-haliako ka pomputusi-Do anu pinau-Do,
6hei inuleno i Burahima, tetenaa-Do,
hei luwuno anano i Yako, luwuno mia bininiki-Do!
7Ondaemo i Ue, Ue Alato,
i asa wawontolino pinake pomputusi-Do.
8Pedandia-Do Dorambeo ranta nahina tampulaano,
pau anu pinakosi-Do tiano asa nsowu api inule,
9 #
Teg. 12:7; 17:8; 26:3 pedandia anu winutu-Do saru i Burahima,
ka sumpa-Do ndi Saki,
10 #
Teg. 28:13
anu pinokoroso-Do gagi pompakosi tiano i Yako,
gagi pedandia nahina tampulaano tiado to Isaraeli,
11”Ndi omue Aku meweengakono wita Kana'a,
gagi tia pusaka anu tinantui tiamu.”
12Tempono porokodo nahi te'opia,
asa bawaa mia hawe i wita atuu,
13ka mpelakopi inso a tongku melako a tongku,
inso a asa poparentaa melako a nsuku tongku susua,
14 #
Teg. 20:3-7
nahi Dopo'ineeo maupo te'asa mia mokonsii ira,
ka mopoto'oriako ira luwuno mokole hangano ondae,
15”Si sosanggelo ira mia anu inurapi-Ku,
ka si mpoweweu mosa'o a luwuno nabi-Ku!”
16 #
Teg. 20:3-7
Tempono Dopompotii mokoninggoa i wita atuu,
ka sumolangio luwuno pepatinda kaanga,
17 #
Teg. 37:28; 45:5 Dotenao asa mia mese'elungi ira.
I Yusupu inasa gagi ata.
18 #
Teg. 39:20–40:23
Karuno domempangaakono rante,
we'uno mewinso a laro enu-enu labu,
19hawe tempo pauno te'ihii,
ka dandi-Do i Ue mokomenteeo.
20 #
Teg. 41:14
Mokole metena motolao,
anu pabawa a luwuno tongku mpotolao.
21 #
Teg. 41:39-41
Onae pinokogagi pe'uea a langkanaeno,
anu pabawaio luwuno arataano,
22ka ipoweeako ira pontiso a luwuno anu langkai potorodo montonda pandeno mosongka
ka paguruako ira ponto'ori anu mentee a luwuno mia memota'uno.
23 #
Teg. 46:6; 47:11 Kanatuumo to Isaraeli dome'aiwa i Masiri,
i Yako mo'ia gagi mia hawe i wita Hama.
24 #
Teg. 1:7-14
Ondae i Ue weweu ira bawaa-Do tedoa nte'ule,
ka mokogagi ira moroso irapo sekono luwuno iwalido;
25Dobalio aroado ka do'o'aliaako ira bawaa-Do,
ka dompopo'oo ira tetenaa-Do.
26 #
Teg. 3:1–4:17
Dotenao i Musa, tetenaa-Do
ka i Haruni anu Dobinikiomo;
27orua ira mokohinao luwuno petondoni-Do i olodo,
ka luwuno anu kinohali-haliako i wita Hama:
28 #
Teg. 10:21-23
Dotenao wongi-wongi onaemo ka igagi wongi mpusu.
Sine kongkodo koa me'ewaio pau-Do.
29 #
Teg. 7:17-21
Dobalio uwoido gagi rea,
ka dopepate ira boudo.
30 #
Pel. 8:1-24
Hadio tumpa mpenggowo i witado,
maupo a luwuno bolongkono mokoledo;
31Mepau Ira, ka mehawe iramo lale uso,
ka tiporo a luwuno witado;
32 #
Pel. 9:22-25
euno usa Do'uwuo i wawodo usa seru baku,
ka api anu kolanga-langa i witado;
33Dopobangku ira keu anggoro ka keu arado,
Dopobangku ira luwu keu i witado;
34 #
Pel. 10:12-15
Mepau Ira, ka haweomo kosume,
kosume anu mpelonso nahi pinokopau hadiono,
35anu kumaano luwuno pinopaho i witado,
kumaano hasilino witado;
36 #
Pel. 12:29
Dopepate ira luwu ana akado i witado,
wua amba-ambano inso a luwuno rosodo.
37 #
Pel. 12:33-36
Dotaate ira bawaa-Do mpeluarako mpowawa salaka ka wulaa,
ka i olono sukudo nahina anu tetidu.
38Tempono dompeluarako, to Masiri mpo'unde,
hangano i'alu ira doitoa a nto Isaraeli.
39 #
Pel. 13:21-22
Dowileo seru gagi boru,
ka api ka ipokomewineo wongi.
40 #
Pel. 16:2-15
Montonda po'emado Dopotiio manu-manu puru,
ka saru roti inso i langi Dopokomowohi ira.
41 #
Pel. 17:1-7; Pod. 20:2-13 Do'ungkahio torukuno watu, tepanaomo uwoi,
ka i'amba waa kana korono a luwuno pada mokari;
42hangano Dorambeo pau-Do anu mempori,
ka i Burahima tetenaa-Do.
43Dotaate ira bawaa-Do mpeluarako saru mawongko
ka luwuno mia bininiki-Do mengkokora-kora mpo'unde.
44 #
Yos. 11:16-23
Doweeako ira luwuno witado mperupa-rupa tongku,
onaemo ka dompe'ueo hasilino pe'iseido luwuno suku tongku,
45ka domentondao mpiha pompakosi-Do,
ka me'inio luwuno pompaguru-Do.
Haleluya!
Currently Selected:
Po'unde-unde 105: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
