Po'unde-unde 104
104
Langkaino pabawa-Do i Ue a laro luwuno pinokogagi-Do
104:1-35
1Unde-unde Iramo i Ue, hei sumangaku!
Omiu Ue, Ue Alaku, langkai ntu'u pabawa-Miu!
Omiu mesangka pompelangkai ka marambaa,
2metutuwiako mewine kana sawu.
Omiu wileo langi kana tenda,
3montade ira bolongko-Miu a wawo uwoi i langi,
Omiu mokogagi ira seru gagi pe'ulaa-Miu,
ka melelu a wawo mpanino angi,
4 #
Ibr. 1:7
Omiu weweuo angi gagi tetenaa-Miu,
ka api anu melanga gagi puu pompekakaako-Miu,
5Omiu motakoo tolino a wawo empehino,
onaemo ka nahi ta telelu ranta nahina tampulaano.
6Tahi malua tumutuwio kana sangka;
uwoi mewuatakoomo lumaloi ira torukuno.
7Hangano pewurarai-Miu uwoi atuu molai,
melulu tompa tinendeno inso a unino rundu-Miu,
8mewuatako a ntorukuno, metii a lembono
a mpo'ianga anu Ipakosiako ira.
9Tida tinantui-Miu, nahi ira melaloo,
nahi ira mpekule mentutuwio tolino.
10Omiu weweuo mata uwoi bubulaka a luwuno lembono,
korono uwoi waa i olono luwuno torukuno,
11mopo'inuo luwuno kondehora mo'ila,
mokontendeo mokorangado kalide ntobu;
12umpeda ndi onae mpomua manu-manu i laro meene,
me'u'uni inso i olodo lewe ngkeu.
13Omiu mopo'inuo torukuno inso a luwuno bolongkono dunsi-Miu,
tolino mowohiako wuano inangga-Miu.
14Omiu motuwuo ewo tiano pinotuwu
ka luwuno pinopaho ka dompete'umalao mia,
ka ipehasiliako kaanga inso a laro wita,
15anggoro anu mokonsanaao aroano mia,
lana anu mokomewantao rupa,
ka mperupa-rupa kaanga anu mokomadooo aroano mia.
16Luwuno keu-Do i Ue gagi mowohi,
luwuno keu arasi i Libano anu pinaho-Do,
17po'iangado manu-manu mpeseno,
manu-manu timba'u anu rahano a luwuno keu sanobari;
18Luwuno torukuno ondau gagi po'iangano bembe ntobu,
luwuno pongku watu gagi pewuniado tangkasi.
19Wula Ipokogagiomo potantui tempo,
mata'oleo ito'orio tempo sumooano.
20Tewala Ipotiio wongi-wongi, ka oleo mbo'u gagi woongi,
tempono atuu dompompu'u mpelakopi luwuno kondehora ntobu.
21Luwuno singa mongura mpengaoli mpo'ungke rangkamiado,
ka mpotuntu kaangado inso ndi Ondae Ue Ala.
22Tewala saba oleo, mpepumpu iramo luwu
ka mpepombole a mpe'egoado.
23Ka i'amba meluarakoomo mia lumako a mpo'anggaano,
a mpo'usahaano hawe ngkiniwia.
24Hadio ntu'u wineweu-Miu, oo Ue,
luwuno Ipokogagiakono ponto'ori anu mentee,
tolino bukeako pinokogagi-Miu.
25Kitaomo tahi atuu, langkai ka malua po'iangano,
i tu'ai mpelelu, nahi pinokopau hadiono,
luwuno kondehora kodei ka langkai.
26 #
Ayb. 40:20; Pud. 74:14; Yes. 27:1 I tu'ai domesumomba luwuno kapala
ka Lewiata anu Iweweuomo mepalindo i larono.
27Luwuno mensikori Komiu,
ka domempinaka a tempono.
28Tewala Ipoweeako ira, domepumpuo;
tewala Iwileo kae-Miu, memowohiako ira luwuno anu moiko.
29 #
Teg. 2:7; 6:3 Tewala Iwunio rupa-Miu, ondae ntededengke;
tewala I'alao penaado, ondae memate
ka mpekule gagi pampawu.
30Tewala Itenao penaa-Miu, megagi ira,
ka Ipokowo'ohuo wawontolino.
31Po'ineeomo maramba-Do i Ue kongko mpiha ranta nahina tampulaano,
po'ineeomo Domawongko i Ue hangano luwuno wineweu-Do!
32Ondae anu mensiroio tolino onaemo ka ipondidi-ndidi,
anu dumanggi ira torukuno onaemo ka ime'ahu.
33Aku menani tia-Do i Ue tempono kutuwu,
aku menaniako po'unde-unde tia-Do Ue Alaku tempono da kukongko.
34Po'ineeomo wuano pinewowoloku mo'ahi iteronge ndi Ondae!
Aku mo'unde hangano Ondae i Ue.
35Po'ineeomo ka ipingko mia tehala inso i wawontolino,
ka po'ineeomo mia mosa'o gaudo nami hina mbo'u!
Unde-unde Ira i Ue, hei sumangaku!
Haleluya!
Currently Selected:
Po'unde-unde 104: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
