Po'unde-unde 103
103
Ondae i Ue me'aroa ka mompehohawa
103:1-22
1Inso ndi Daudi.
Unde-unde Iramo i Ue, hei sumangaku!
Unde-undeomo nee-Do anu mempori, hei tompaano aroaku!
2Unde-unde Iramo i Ue, hei sumangaku,
ka si kolupeo luwuno moiko-Do!
3Ondae anu umampunio luwuno salamu,
anu mokotompao luwuno hakimu,
4Ondae anu kumaduduio penaamu inso a aano kaburu,
anu rumamba-ramba uluakomu pompehohawa ka pompowee,
5Ondae anu mokontendeakono moikoa po'eheno aroamu,
ranta tempo monguramu gagi wo'ohu kana rajawali.
6Ondae i Ue anu mokorosoo moleoa
ka songka tiado luwuno mia anu tepokonsii.
7Luwuno pesalaa-Do Dopopoto'oriomo ndi Musa,
luwuno wineweu-Do a nto Isaraeli.
8 #
Yak. 5:11
Ondae i Ue me'aroa ka mompehohawa,
tedoa sabara ka langkai ntu'u pompehohawa-Do.
9Komba wela Ira motuntu,
ka komba ranta nahina tampulaano Doponaa tekuda.
10Komba Doweweuo ndi ontae menunu saru halato,
ka nahi Dopombalo ndi ontae menunu saru salato,
11sine kana mantandeno langi inso i tolino,
kanatuumo langkaino pompehohawa-Do a mia anu doitoako Ira,
12kana olaino sabaano oleo inso i sumooano oleo,
kanatuumo Dopoko'olaio polimpa'ito.
13Kana ama mehohawa ira anano,
kanatuumo Dopehohawao i Ue mia anu doitoako Ira.
14Hangano Doto'orio inso a hapa tomewineweu,
Dorambeo nine ontae andio pampawu.
15Kanatuumo mia, oleo tuwuno kana ewo,
kana bunga a mpada kanatuumo imensisi;
16tewala ilaloo angi, onae nami kongko mbo'u
ka po'iangano nami to'orio mbo'u.
17Sine, pompehohawa-Do i Ue
inso nahina tampulaano hawe nahina tampulaano a mia anu doitoako Ira,
ka moleo-Do tiado inule,
18tiado anu mpe'ini a mpedandia-Do,
anu rumambeo weweuo parenta-Do.
19Ondae i Ue mokorosoo kadera poparentaa-Do i suruga
ka poparentaa-Do pabawa a luwuakoano.
20Unde-unde Iramo i Ue, hei luwuno mala'eka-Do,
hei luwuno pongkiari moroso anu weweuo pau-Do
tempono irongeo suarano pau-Do.
21Unde-unde Iramo i Ue, hei luwuno sorodadu-Do,
hei luwuno puu pompekakaako-Do anu weweuo po'ehe-Do.
22Unde-unde Iramo i Ue, hei luwuno pinokogagi-Do,
a luwuno po'ianga pinabawai-Do!
Unde-unde Iramo i Ue, hei sumangaku!
Currently Selected:
Po'unde-unde 103: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
