Po'unde-unde 102
102
Pekakaino asa mia marasai tiano Sioni
102:1-29
1Pekakaino asa mia marasai, tempono itelusa molema ka moluarako masusano i aro-Do i Ue.
2Oo Ue, Irongeomo pekakaiku,
ka po'ineeomo pebooliku mepetulungi hawe ndi Omiu.
3Siimo Iwunio rupa-Miu ndi ongkue
a oleo kupompema'iso.
Ipo'aroomo biri-Miu ndi ongkue;
a oleo kupebooli, rongamo Isangki aku!
4Hangano luwuno oleo ntumuwuku moliu kana ahu,
luwuno wukuku mewaro kana pompotuwua api.
5Aroaku tededengke ka telusa kana ewo,
ranta-ranta kukolupeo kumaano rotiku.
6Hangano pekakaiku anu meroku,
ndio akumo koa kuli montongo wuku.
7Kana akumo manu-manu koa i pada one,
gagi akumo kana manu-manu pupuunggu a nterawoano.
8Nahi kupokompoturi ka gagi akumo
kana manu-manu tensia a wawo ato.
9Hawe sumoo oleo domentata aku iwaliku,
mia anu memae-maeakune metotonaa saru pauo neeku.
10Hangano ongkue mongkaa awu kana roti,
ka inuaku mesaloako uwoi mata,
11hangano tekuda-Miu ka bamburu-Miu,
hangano Itande akumo ka Ipepasiakune.
12Luwuno oleo ntumuwuku kana eo-eo ondau,
ka ongkue moleu kana ewo.
13Sine Omiu, oo Ue, mentoro a ngkadera poparentaa ranta nahina tampulaano,
ka nee-Miu rinambe mpiha mapa'api-api inule.
14Omiumo anu Komiu mentade ka mehohawao Sioni,
hangano haweomo tempono ka Ipehohawao,
haweomo tempo anu pinakosi.
15Hangano luwuno tetenaa-Miu mpehohawa ira watuno,
ka mpewaintoo pampawuno anu terawo.
16Ka luwuno tongku lembuino gagi medoitoakono nee-Do i Ue,
ka luwuno mokole ntolino me'ondahao maramba-Miu,
17tewala Dowanguomo i Ue Sioni
ka mepopokita a laro maramba-Do,
18mewolili Iramo merorongeakono pekakaino mia nahina po'iangano,
ka komba Dopebungkuio pekakaido.
19Po'ineeomo ka ibinuri mongkona andio tiado inule lembuino,
ranta tongku anu pinokogagi lembuino ta umunde-unde Ira i Ue,
20”Menteeano melungaako Iramo inso a mpo'ianga-Do anu mantande ka mempori,
Ondae i Ue mensiro i tolino inso i suruga,
21Ira rumongeo pinemasusano mia tinorungku,
Ira motolao mia anu hinuku mate.”
22Ka nee-Do i Ue ta tinutulu i Sioni,
ka Ira inunde-unde i Yerusale,
23tempono luwuno tongku ka poparentaa mpepumpu mperonga-ronga
ira mpesomba ndi Ondae i Ue.
24Dopuduomo rosoku a ntonga nsala,
ka moko'owowao tinuwuku.
25Kupotae, ”Oo Ue Alaku,
si alao penaaku a entongano tinuwuku!
Luwuno ta'u-Miu kongko mpiha mapa'api-api inule!”
26 #
Ibr. 1:10-12
I ndi'ipua Ipokogagiomo tolino,
ka langi onaemo wineweuno kae-Miu.
27Luwuno atuu ta tampula, sine Omiu kongko mpiha,
ka luwuno atuu ta gagi mowuru kana sangka,
kana lemba I'eu ira, ka do'amba mentinadi;
28sine Omiu nahina tampulaano,
ka tuwu-Miu nahina tompaano.
29Inuledo tetenaa-Miu ira merodo mpo'ia,
ka ana'uedo mpo'ia mpiha i aro-Miu.
Currently Selected:
Po'unde-unde 102: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
