Powadi 5
5
Patudu mongkona ponsosaboa
5:1-23
1Hei anaku, pekokoongakonomo ponto'oriku anu mentee,
po'aroomo birimu a ponto'ori anu kupaguruakomu,
2ka upe'ini a mpande mosongka
ka wiwimu mekariao ponto'ori.
3Hangano wiwino beine sodilo mompo'iti itino siu hoani
ka langirano ngangano moloreopo sekono lana,
4sine lembuino onae mopa'i kana upeu,
ka montaso kana ponai memata orua.
5Karuno metii te'aro a matea,
pelempano te'aro a ntolinodo mia mate.
6Onae nahi pontonda sala ntuwua,
pesalaano tesaa, komba ito'orio.
7Onaemo pu'uno, hei anaku, ronge akumo,
si pansia inso a mpinauno ngangaku.
8Poko'olaio pesalaamu inso ndi onae,
ka si umpedaakono pewowano rahano,
9ka si upeweengakono pelangkaimu a mia susua,
ka luwuno ta'u tinuwumu a mia lambaha;
10ka si mia susua mowohiakono rosomu,
ka hasilino pe'iseimu nahi pewinso a rahano mia hawe
11ka poko'ariano omue ko mompemasusa,
tempono ihi ka koroimu mate,
12ka u'amba komotae, ”Ha, tembio ka ku'o'aliaakono pompaguru,
ka aroaku mosa'oakono pongkuahako;
13tembio nahi kuperorongeakono paudo guruku,
ka nahi kupo'aroo biriku a luwuno anu paguru aku?
14Ilawupo kutedonta a laro sompo masolaa
i tonga-tongado bawaa ka tepumpua.”
15Inuomo uwoi inso a nsumurumu omuemu,
uwoi anu bubulaka inso a nsumurumu.
16Tekonake mata uwoimu lulua i bungkuno
kana waaano uwoi a luwuno tanalapa?
17Po'ineeomo atuu gagi omuemu me'ueo,
si gagi mia susua mbo'u me'ueo.
18Po'ineeomo ka irinonso insoano uwoimu,
po'undemo saru kombiamu tempono umongura:
19rusa anu mo'ahi, lagiwa anu tekosi;
po'ineeomo wua radano wela mokontendeko,
ka omue wela tesingka hangano pongkekewoino.
20Hei anaku, tembio ka utesingka a beine sodilo,
ka mongkopui radano beine lansara?
21Hangano luwuno pesalaano mia te'ungkahi i arono pongkita-Do i Ue,
ka luwuno pelempano mia Dodagaio.
22Mia mosa'o gauno kona rako a laro wineweuno mosa'o,
ka kona oho a laro ngkoloro halano onaeno.
23Onae mate hangano nahi tarimao pompaguru
ka hangano benge-bengeno anu langkai ka itesaa.
Currently Selected:
Powadi 5: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
