Powadi 1
1
Tinoono Powadi
1:1-7
1 #
1Mok. 4:32
Luwuno powadino i Salomo ana ntamano i Daudi, mokoledo to Isaraeli,
2ka itino'ori ponto'ori anu mentee ka pompaguru,
ka ipinokonto'ori luwuno pau anu mentudu,
3ka itinarima pompaguru anu mompokogagi pande;
onaemo menteea, moleoa ka nahi pegaupi;
4ka ipinoweeako pande ntu'u a mia anu napi hina pinembasaino,
ka ponto'ori saru pandeno mosongka a mia mongura, –
5moikoomo mia pande mosongka moronge ka montiangi ponto'ori
ka moikoomo mia anu hinao ponto'orino mohawe anu gagi pontimbanga –
6ka itino'ori powadi ka potundaano,
pauno mia pande mosongka ka singgurudo.
7 #
Ayb. 28:28; Pud. 111:10; Pow. 9:10 Doitoako Ira i Ue onaemo pompu'uano ponto'ori,
sine mia benge-benge tumetewehio ponto'ori anu mentee ka pompaguru.
Patudu a pompopandei
1:8-19
8Hei anaku, rongeomo pompaguruno amamu,
ka si pebungkuio pompaguruno inemu,
9hangano kalono bunga anu tekosi atuu tiano ulumu,
ka enu-enu tiano we'umu.
10Hei anaku, tewala mia tehala popandeiko,
si tondao;
11tewala mpotae ira, ”Aiwa tonda kami, aiwa tompotowoki rea,
aiwa topomporaakono mia nahina salano po'ehetomo koa;
12aiwa tomentele ira kontuwu-tuwu, kana tolinodo mia mate,
bobotoli, kana ondae anu mpetii a laro ngkeke kaburu.
13Kita mpohawe mperupa-rupa arataa anu masuli olino,
rahato kita mpokobukeakono parewa rinontu;
14tendeomo undi saru omami,
asa kadu-kadu tiato luwu.”
15Hie anaku, omue si tuwu tumondao peleludo,
ontoomo karumu inso a mpesalaado,
16hangano karudo mpelulu te'aro a mosa'oa
ka mpopari-pari ira mpo'uwu rea.
17Hangano nahina tuduno buani pinadindi
i arono matado luwuno anu mepani,
18kahinaano ondae mentowokio reado ondaedo
ka momporaakono penaado ondaedo.
19Kanatuumo poko'ariano sompo mia anu modokoako me'uraa nahi pototono,
me'uraa atuu umalao penaano anu me'ueo.
Pongkuahako a mia mongura
1:20-33
20 #
Pow. 8:1-3
Ponto'ori anu mentee mebooli meroku a luwuno pesalaa,
a luwuno tanalapa onae moporongeo suarano,
21i tompano sala maroa onae meboo-booli,
a mpesalaa kodeino pewowa langkaino kota onae pauo luwuno pauno.
22”Opiapo mbo'u tehineno, hei mia anu napi hina pinembasaino,
da imengkekewoio pompenana'otemiu,
anu mompoponggari-nggari da ineheno monggari-nggari,
ka mia monge-monge umo'aliaakono ponto'ori?
23Pewolilimo a mpekuahakoku!
Menteeano, aku umuwuo penaaku ndi omue
ka pauo pauku ndi omue.
24Hangano, tempono kupepoboi, nahi mebehe,
ka tempono kutasiakono kaeku, nahina anu merioo;
25tendeano, nahi imperioo patuduku,
ka nahi mentarimao pekuahakoku,
26ka ongkue mbo'u aku mengingisiakomiu tempono i'alukomiu masolaa;
aku mompopodeu-deu, tempono mongkokongiria humawekomiu,
27tempono mongkokongiria humawekomiu kana angi mokora,
ka masolaa umaluko kana lompiu,
tempono masukaraa ka salalaro hawe umalukomiu.
28I tempo atuu ira mpebooli ndi ongkue, sine nahi aku sumangki,
ira memokua me'ungke aku,
sine nahi aku hinawe.
29Hangano o'aliado a ponto'ori
ka nahi domebinikio doitoako Ira i Ue,
30nahi dobehe mentarimao patuduku,
sine mpebungkuio luwuno pekuahakoku,
31ka ira mengkaano wuano wineweudo,
ka gagi mowohiako sinongkado.
32Mentee ntu'u, mia anu napi hina pinembasaino ta mateako moteano aroano,
ka mia monge-monge ta mateako nahi pomperiono.
33Sine isema anu momperorongeako ndi ongkue, onae ta mo'ia rodo,
rodo inso a mongkokongiriako masolaa.”
Currently Selected:
Powadi 1: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
