Powadi 12
12
1Isema mongkekewoi pompaguru, mongkekewoi ponto'ori,
sine isema umo'aliaakono pongkuahako, onae benge-benge.
2Mia moiko Dopemoikoo i Ue,
sine anu mompopo'oo Dohukuo.
3Mia nahi ta moroso mpiha hangano gau mosa'o,
sine hakano mia mentee nahi ta telelu.
4Beineno anu tekosi onaemo ramba-ramba uluno tamano,
sine anu moweweu mokoko'iia onaemo kana haki anu mokomobooo wukuno tamano.
5Sinongkano mia mentee onaemo moleoa,
tinoono mia mosa'o gauno mompopo'oo.
6Pauno mia mosa'o gauno montowoki rea,
sine ngangano mia nahi pegaupi kumaduduio koroido.
7Mia mosa'o gauno dinontai ranta nahi domehina mbo'u,
sine rahano mia mentee mentade moroso.
8Sompo mia inunde-unde menunu saru pinewowolono anu molino,
sine mia anu nahi montaso pinewowolono, ta pinokongkodei.
9Moikoopo gagi mia kodei, sine hinao atano,
sekonopo melelu kana mia langkai potorono, sine makura kaanga.
10Mia mentee merioo tuwudo pinotuwuno,
sine pe'aroano mia mosa'o gauno atuu mobobarasai.
11Isema umanggao witano, ta mowohiako kaanga,
sine isema mo'ungke anu nahina tuduno, nahi molino pinewowolono.
12Mia mosa'o gauno mosisiriakono buanino mia mosa'o wineweuno,
sine hakano mia mentee mowawa hasili.
13Mia mosa'o wineweuno kona ohoako halano wiwino,
sine mia mentee mokompeluarako inso a masukaraa.
14Sompo mia pinokomowohiako moikoa hangano wuano pau,
ka mia mohawe ponsulo inso anu inanggano kaeno.
15Pesalaano mia benge-benge moleo a mpotaeno onaeno,
sine isema momperorongeako patudu, onae pande mosongka.
16Benge-bengeomo anu mokomengkaao pe'o'oleno i tempo koa mbo'u atuu,
sine pandeomo anu nahi perioo pasinggiri.
17Isema mompau menteea, mokomengkaao anu moleo,
sine sakosii megaupi mokomengkaao pompopo'oo.
18Hinao mia anu me'ase kana petobono ponai,
sine elono mia pande mosongka mowawa tompaa.
19Wiwi anu mompau menteea kongko mpiha ranta nahina tampulaano,
sine elo pegaupi butu tiano asa mpiniro.
20Pompopo'oo kongko i laro aroano mia anu mosongka mosa'oa,
sine mia anu mompau pohaweno mesintuwu mohawe mawongkoa.
21Mia mentee nahi ta umaluo masolaa hapamo koa,
sine mia mosa'o gauno ta wela masola.
22Mia anu megaupi wiwino mokoburu-Do i Ue,
sine mia anu peleluno metenunu Dopehohawao.
23Mia pande wunio ponto'orino,
sine aroano mia monge-monge mompau benge-bengea.
24Kaeno mia mokua mo'ini pabawa,
sine moluwe gagino mo'angga dinadai.
25Danggara i laro aroa mokobungkulosuo mia,
sine pau anu moiko mokomawongkoo.
26Mia mentee mohawe pompakambiano,
sine pesalaano mia mosa'o gauno mokontesaa ira.
27Mia moluwe nahi ta morako pinete'umalano,
sine mia mokua ta mohawe arataa anu masuli olino.
28A nsala menteea hinao tuwua,
sine a nsalano anu humapuo pompe'ala-alano me'aro a matea.
Currently Selected:
Powadi 12: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
