Powadi 11
11
1Pontimba anu ahi mentee mokoburu-Do i Ue,
sine Dopemoikoo watu pontimba anu koona ntu'u.
2Tewala hawe pompelangka-langkai, hawe mbo'u pasinggiri,
sine ponto'ori anu mentee kongko a mia anu me'urumako.
3Mia anu nahi pegaupi ipabawaio moleono aroano,
sine anu mompau nahi mentee isolangio molengkuno.
4A oleo tekudaa arataa nahi mentudu,
sine menteea motolao mia inso a matea.
5Pesalaano mia anu nahina tataano ipokomereteo menteeno,
sine mia mosa'o gauno tedonta hangano gauno mosa'o.
6Mia nahi pegaupi ipotolao menteeno,
sine anu mompau nahi mentee kona rako hangano po'eheno aroano.
7Pomperorohino mia mosa'o gauno nahi gagi a mateano,
ka pomperorohino mia moweweu mosa'o gagi nahina tuduno.
8Mia mentee pinotola inso a masukaraano,
ka i'amba mia mosa'o gauno umeuo.
9Saru ngangano mia mosa'o gauno mepateo pe'asa miano,
sine mia mentee ikaduduio ponto'orino.
10Tewala mia mentee moiko teweweuno, mo'undeomo kota,
ka tewala mia mosa'o gauno mate, rurunduomo kokora-kora mawongko.
11Saru ronsono mia moleo, kota tewangu,
sine saru ngangano mia mosa'o gauno, kota tekale-kale.
12Isema mompokongkodei pe'asa miano, nahi molino pinewowolono,
sine mia anu pande, menoro-noro.
13Isema mompalele pau nahi mentee, momposaba rahasia,
sine isema anu metenunu, montutuwi kara-kara.
14Nahina pontaate, tedontaomo tongku,
sine hinao tekaduduia hangano hadio anu mompatudu.
15Tedoa urasa'oomo mia anu gagi pe'iniano mia hawe,
sine isema nahi tarimao gagi pe'inia, moikoomo ipo'ia.
16Beine anu me'aroa mohawe pompelangkai,
sekono anu mompokonsii mohawe kaeaa.
17Mia anu mompehohawa moweweu moiko a ngkoroino onaeno,
sine mia anu lambaha bobarasaio koroino onaeno.
18Mia mosa'o gauno moweweu untu anu nahina tuduno,
sine isema morawo menteea, mohawe sulono anu nahi bali.
19Isema me'ini a menteea, te'aro a ntuwua,
sine isema mo'ungke mosa'oa, te'aro a matea.
20Mia anu molengku aroano mokoburu-Do i Ue,
sine mia anu nahina tataano, pesalaano Dopemoikoo.
21Mia moweweu mosa'o manasa nahi ta tola inso a mpohuku,
sine inuleno mia mentee ta kinadudui.
22Kana tole-tole wulaa a ngusuno boe,
kanatuumo beine tekosi anu nahina pontimbangano.
23Po'eheno mia mentee butu koa anu moiko,
pomperorohino mia mosa'o gauno butu koa tekuda.
24Hinao anu ineheno mompowee, sine tetiangi kaea,
hinao anu tedoa mo'uri, sine wela makura.
25Isema hadio ipompowee ronso, pinoweeako hadio ntu'u,
isema mompopo'inu, onae ta pinopo'inu.
26Isema mompekaria gandu ira mentotonaao mia,
sine ronso ta metii a wawo uluno mia anu mo'asa gandu.
27Isema mo'ungke moikoa, ira me'ineheakono mia,
sine isema mo'ungke mosa'oa ta umaluo wineweu mosa'o.
28Isema merorohio kaeano ta tedonta;
sine mia mentee ta tuwu kana lewe mongura.
29Isema kumale-kaleo somborino ta morako angi;
mia benge-benge ta gagi atano mia pande mosongka.
30Wuano mia mentee onaemo keu tuwua,
ka isema pande mosongka, mo'ala aroano mia.
31 #
1Pet. 4:18
Tewala mia mentee montarima ponsulo i wawo ntolino,
tamoako mia mosa'o gauno ka mia tehala!
Currently Selected:
Powadi 11: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
