Powadi 13
13
1Ana anu pande mosongka merorongeakono pompaguruno amano,
sine asa mia anu mompasinggiri nahi perorongeakono pongkuahako.
2Inso a wuano ngangano asa mia ta mongkaa moikoa,
sine po'eheno aroano anu mompau nahi mentee mobobarasai.
3Isema dumagaio ngangano, mekariao penaano,
isema anu kowee-wee ngangano, ta umaluo matea.
4Aroano mia moluwe bukeako ineheno, sine nahina tuduno,
sekono aroano mia mokua pinoweeako hadio ntu'u.
5Mia mentee o'aliaakono pegaupi,
sine mia mosa'o gauno moweweu mosa'o ka mompokoko'ii.
6Menteea dumagaio mia anu mempori pesalaano,
sine gau mosa'o sumolangio mia tehala.
7Hinao mia anu peleluno kana mia kaea, sine nahina hapa-hapano,
hinao mbo'u anu mo'onde-onde mongkokolaro, sine arataano hadio.
8Kaeaa onaemo tolosino penaano asa mia,
sine mia mongkokolaro nahi ta moronge pompokodoito.
9Mewineno mia mentee mewanta moiko ntu'u,
sekono huluno mia mosa'o gauno mate.
10Pompelangka-langkai butu moweweu pengengea,
sine ondae anu mpomperorongeako patudu hinao ponto'ori anu mentee.
11Arataa anu moruana ihinawe ta makura,
sine isema mopumpu ntededei ta weweuo tetiangi.
12Pinerorohi anu tepotulu mompokomasusa aroa,
sine ino'aroa anu te'ihii onaemo keu tuwua.
13Isema mompe'uru-uru pau, onae ta tumembio poko'ariano,
sine isema tumondao parenta, ta montarima ponsulo.
14Pompaguruno mia pande mosongka onaemo pu'uno tuwua,
ranta ka itola mia inso a luwuno oho matea.
15Pinewowolo molino anu moiko mowawa pompehohawa,
sine pesalaado anu mpompau nahi mentee sumolangi ira.
16Mia pande moweweuako ponto'ori,
sine mia monge-monge mompopau benge-bengea.
17Tinena anu mosa'o gauno modontai mia a laro masolaa,
sine tinena anu metenunu mowawa tompaa.
18Mongkokolaroa ka pasinggiri umaluo mia anu nahi perioo pompaguru,
sine isema anu merioo pongkuahako, onae pinelangkai.
19Ino'aroa anu pinokoweweu mompokosanaa aroa,
molaiakono wineweu mosa'o mokoburuno mia monge-monge.
20Isema mebawaaako mia pande mosongka gagi pande mosongka,
sine isema mewali-waliako mia monge-monge gagi urasa'o.
21Mia tehala itondario masolaa,
sine mia mentee sinuloako me'uraa.
22Mia moiko mobinta pusaka tiado inuleno,
sine kaeano mia tehala ninaa tiano mia mentee.
23Lereno mia mongkokolaro mehasiliako hadio kaanga,
sine hinao anu tampula hangano nahina moleoa.
24Isema nahi pompake tuko, umo'aliaakono anano;
sine isema mompehohawa anano, isepio a tempono.
25Mia mentee mongkaa hawe mowohi,
sine kompono mia mosa'o gauno marasaiako makuraa.
Currently Selected:
Powadi 13: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
