PILIPI 2
2
Patudu ka intepo'asa ka mpe'urumako kana Ondae i Kerisituu
2:1-11
1Gaagi hangano ndi Ondae i Kerisituu hinao patudu, hinao pontarero pompehohawa, hinao tepo'asaa Mpenaa, hinao mambe pehohawa ka mambe pekokolaroako, 2onaemo pu'uno saru andio impokosompoo po'undeku: imentuwumo mpe'asa aroa ka pinewowolo, a laro aasa pompehohawa, aasa sumanga, aasa tinoo, 3saru nahi po'ungke tiano onaeno ke po'unde-unde anu nahina tuduno. Tendeano impe'urumako anu asa mia tumuduo anu susua laluaopo sekono onae; 4ka sompo-sompo mia ka si butu merioo tiano onaeno, sine tiadokoa mbo'u mia susua. 5Po'ineeomo a laro ntuwumiu ntepo'asa, mponaa pinewowolo ka po'o'aroa anu hinawe koa mbo'u ndi Ondae i Kerisituu Yesu, 6anu maupo merupa kana Ondae Ue Ala, nahi Dotuduo pengkena-Do saru Ondae Ue Ala atuu gagi tia-Do anu asalakono kinorahako, 7tendeano Dopokomoaomo koroi-Do ondae-Do ka Dopekoroi kana aasa ata, ka gagi mengkena saru mia. 8Ka a laro nteweweu-Do kana mia, me'urumako Iramo ka momperorongeako hawe ka Domate, tendeano ranta mate a ngkeu pinotamba. 9Onaemo pu'uno ka Dotedoa melangkai Ira Ue Ala ka moweeako Ira nee i wawono luwuno nee, 10#Yes. 45:23 ka dompenggolontu a nee-Do i Yesu luwuno anu mekongko i langi ka anu mekongko i wawontolino ka anu mekongko i totono tolino, 11ka luwuno elo memangaku, ”Ondaemo i Yesu Kerisituu Ue,” montonda maramba-Do Ue Ala, Ama!
Ime'anggaomo mpiha tekaduduiamiu
2:12-18
12Hei luwumiu pepaekompo anu pinehohawaku, mpomperorongeako komiu mpiha; onaemo pu'uno ime'anggaomo mpiha tekaduduiamiu saru medoito ka mpondende, komba butu kana i tempono da kukongko, sine laluaopo mbo'u kanandio-andio tempono nahi kukongko, 13hangano Ondaemo Ue Ala anu umanggao i laromiu moiko po'ehe maupo anggaa montonda po'ehe-Do. 14Imeweweuomo luwuakoano si mpewuruki ka mpegaga, 15#Win. 32:5 ka si hina tataamiu, gagi ana-Do Ue Ala anu nahina tataano i tonga-tongado mia anu memolengku aroado ka anu ntepopo'oo andio, ranta ka imemewanta i olodo kana luwuno anano wula i wawontolino, 16saru mpe'ini a mpau tuwua, ka kupokompo'unde a oleo-Do i Kerisituu, nine komba nahina tuduno po'anggaku ka pe'iseiku. 17Sine maupo ka i'inuwu reaku a mpesomba ka pesomba pompe'ala-alamiu, mawongko aroaku ka mawongko aroaku saru omiu luwu. 18Ka omiu mbo'u asalakono memawongko kanandio ka imemawongkomo saru ongkue.
I Timotiu ka i Epaporoditu
2:19–3:1a
19Sine momperorohi aku ndi Ondae Ue Yesu aku koa ronga tumenao i Timotiu aiwa ndi omiu, ka irodo koa aroaku hangano lele mongkona teweweumiu. 20Hangano nahina te'asa mia ndi ongkue, anu me'asa aroa ka pinewowolo saru ongkue ka anu merioo ntu'u moikoamiu; 21hangano luwuno mpo'ungke moikoado ondaedo, komba moikoa-Do i Kerisituu Yesu. 22Imento'orio nine petenununo tengkitaomo ka nine itulungi akumo a pompekakaakoa Lele Mawongkoa mengkena kana aasa ana tumulungio amano. 23Onaemo anu kuperorohio ronga tumenao, tewala kuto'oriomo ba kana'umpe kara-karaku; 24sine kupe'ala-alao ndi Ondae i Ue, nine maupo ongkue aku koa ronga aiwa.
25Kontongaano atuu kupementuduo tumenao i Epaporoditu aiwa ndi omiu, onaemo pepaekompoku ka pe'asa mpo'anggaku saru waliku meteakako, anu tinenamiu ka ipekakaakune a laro kinereku. 26Hangano tedoa tekewoi ndi omiu luwu ka masusa mbo'u aroano, hangano imerongeo nine onae mahaki. 27Lano mentee onae mahaki ka ilawu mate, sine Dopehohawao Ue Ala, ka komba butu onae, tendeano ongkue mbo'u, ka si koteti-tetiangino masusaku. 28Onaemo pu'uno ka kuronga tumenao aiwa, ka impokomemawongko mbo'u ba imengkitao, ka makura masusaku. 29Gaagi imentotowoomo a luwuno mawongkono aroa ndi Ondae i Ue ka impelangkai iramo mia kana onae. 30Nde hangano anggaa-Do i Kerisituu ilawupo imate ka ita'oo penaano mokosompoo hapa anu da makura a laro pompekakaakomiu ndi ongkue.
Currently Selected:
PILIPI 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
