PILIPI 1
1
Tabea
1:1-2
1 #
Tin. 16:12
Inso ndi Paulu ka i Timotiu, Tetenaa-Do i Kerisituu Yesu, a luwuno mia mempori ndi Ondae i Kerisituu Yesu i Pilipi, saru luwuno petewawado bawaa ka diakee.
2Pe'aroa ka rodoa inso ndi Ondae Ue Ala, Amato, ka inso ndi Ondae Ue Yesu Kerisituu kumongkomi komiu.
Pontarimakasi ka pekakai
1:3-11
3Pontarimakasiku ndi Ondae Ue Ala sompo kurambe komiu. 4Ka sompo kupekakaiakomiu luwu, wela aku mekakai saru mawongko aroa. 5Pontarimakasiku ndi Ondae Ue Alaku hangano tepo'asaamiu a Lele Mawongkoa mompu'u inso a oleo amba-ambano hawe kanandio-andio. 6Mongkona andio kupe'ala-alao ntu'u, onaemo Ondae, anu pu'uo anggaa anu moiko i olomiu, Ira motilaloakono hawe a pokotompaano a oleo-Do i Kerisituu Yesu. 7Lano tekonaanomo kupewowolo komiu luwu kanandio, hangano omiu kongko i laro aroaku, hangano mpohawe komiu luwu tia a mpe'aroa anu kuwineeako, moiko i tempono kutinorungku, maupo i tempono kukorahakono ka mokorosoo Lele Mawongkoa. 8Hangano Ondae Ue Ala sakosiiku ba kana'umpe kutedoa kumekewoiakomiu luwu pompehohawa-Do i Kerisituu Yesu.
9Ka ndiomo pekakaiku, po'ineeomo ka ikoteti-tetiangino pompehohawamiu a ponto'ori anu mentee ka a hadio rupa ponto'oria, 10ranta ka impokobinikio hapa anu moiko, ka imemempori ka nahina tataano umpeda haweano oleo-Do i Kerisituu, 11bukeako wuano menteea anu inangga-Do i Yesu Kerisituu mokomarambao ka umunde-unde Ira Ue Ala.
Ponsakosiino i Paulu a laro torungku
1:12-26
12Ineheku, luwuno pepaekompo, ka imento'orio, nine hapa anu gagi ndi ongkue andio onaemo pu'uno ka ikotele-teleleno Lele Mawongkoa, 13#Tin. 28:30 ranta mengkaaomo a luwuno ihino langkanae ka luwuno mia susua, nine tinorungku aku hangano Ondae i Kerisituu. 14Ka hadioano pepaekompo ndi Ondae i Ue mempine'ala-ala iramo hangano tinorungku aku ka dontetiangi memosia mpepau mongkona pau-Do Ue Ala ka nahi domedoito. 15Hinao mia anu palele Ira i Kerisituu hangano kohilido ka teposisalaa, sine hinao koa mbo'u anu palele Ira saru tinoo moiko. 16Ondae andio palele Ira i Kerisituu hangano pompehohawa, hangano domento'orio, nine kongko aku i ndi'ai kumorahakono Lele Mawongkoa, 17sine anu mehano hangano butu tiano koroido ka saru tinoo anu komba inso a moleono aroado, potaedo ba kanandio ira mpokomobeao tinembiku a laro torungku.
18Sine komba tembio, hangano maupo kana'umpe, Ondae i Kerisituu pinalele, moiko saru tinoo anu mosa'o maupo anu moiko. Mongkona atuu mo'unde aku. Ka aku koa mo'unde mpiha, 19hangano kuto'orio, nine umariano luwuno andio onaemo tekaduduiaku hangano pekakaimiu ka pontulungi-Do Penaa-Do i Yesu Kerisituu. 20Hangano anu tedoa kinekewoiku ka pinerorohiku onaemo nine a luwuakoano nahi aku mokoko'ii, tendeano kanakoa mpiha, kanatuu koa mbo'u kanandio-andio, Ondae i Kerisituu mengkaa Dopinokomaramba a ngkoroiku, moiko tuwuku maupo mateku. 21Hangano tuwuku ondaemo i Kerisituu ka mate onaemo uraku. 22Sene tewala asalakono ka kutuwu i wawontolino andio, pengkonaano atuu ndi ongkue mo'angga ka ipewua. Gaagi isua anu asalakono kubinikio, nahi kuto'orio. 23Pinakada aku inso a orua rupa: ineheku lumako ka kupo'ia meronga saru Ondae i Kerisituu – atuu lano laluaopo moiko; 24sine mentuduopo kupo'ia i wawontolino andio hangano omiu. 25Ka a laro pompe'ala-ala andio kuto'oriomo: aku mo'ia ka meronga-ronga mbo'u saru omiu luwu ka ikomoro-morosomiu ka memawongko a laro pompe'ala-ala, 26ranta mawongkomiu ndi Ondae i Kerisituu Yesu koteti-tetiangino hangano ongkue, ba kupekule ndi omiu.
Patudu ka impeteahako koa mpiha
1:27-30
27Butu, po'ineeomo tuwumiu ka ipenunu saru Lele Mawongkoa mongkona Ondae i Kerisituu, ka kukitao ba kuhawe, ka tewala nahi kuhawe aku rumongeo, nine moroso impentade a laro aasa penaa, ka mpe'asa aroa mpeteahako tiano pompe'ala-ala anu inso a Lele Mawongkoa, 28saru nahi impondendeakono maupo tedei anu umewai komiu. Ndi ondae luwuno atuu onaemo tondonino matea, sine ndi omiu petondoni tekaduduia, ka anu atuu haweno inso ndi Ondae Ue Ala. 29Hangano ndi omiu mewineeako komba butu ka impe'ala-ala Ira i Kerisituu, tendeano ka imemarasaiako Ira koa mbo'u, 30#Tin. 16:19-40 a laro pe'iseno pinewowolo anu mengkena kana anu kinitamiu i ndi'upua ndi ongkue, ka anu rinongemiu kanandio-andio mongkona ongkue.
Currently Selected:
PILIPI 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
