PILIPI 3
3
1aPoko'ariano, pepaekompoku, impo'undemo ndi Ondae i Ue.
Menteea anu inso ndi Ondae Ue Ala
3:1b-16
1bBuriakomiu mbo'u mongkona andio komba kupemobeao ka moweeakomiu manasaano. 2Imetangkoro ira dahu, imetangkoro ira mia mpo'angga anu mosa'o gaudo, imetangkoro ira mia mpotindi anu nahi mentee, 3hangano ontaemo mia mpetindi, anu mpesomba hangano Penaa-Do Ue Ala, ka tompo'undeakono ndi Ondae i Kerisituu Yesu ka nahi tompe'ala-alao anu mongkona tuwu ntolino. 4Maupo ongkue hinao koa mbo'u pu'uno me'ala-alao mongkona tuwu ntolino.
Tewala hinao mia susua anu potaeno mokompe'ala-alao mongkona tuwu ntolino, ongkue laluaopo mbo'u: 5#Tin. 23:6; 26:5; Rom. 11:1 tinindi a oleo ko oalu, inso a tongku Isaraeli, inso a nsuku Benami, to Ibarani ntu'u, mongkona pontuduku a songka Taura ongkue to Parisi, 6#Tin. 8:3; 22:4; 26:9-11 mongkona inangga ongkue anu mobobarasai bawaa, mongkona menteea a mpontondaa songka Taura nahina tataaku. 7Sine hapa anu i ndi'upua gagi uraku, kanandio-andio kutuduo rugiku hangano Ondae i Kerisituu. 8Tendeano luwuakoano kutuduo rugi, hangano ponto'ori mongkona Ondae i Kerisituu Yesu, Ueku, marambaopo sekono luwuno. Hangano koa Ondae kupotolaomo luwuno atuu ka tumuduo rompo, ka kuhawe Ira koa i Kerisituu, 9ka kongko ndi Ondae komba menteeku ongkueku hangano montonda songka Taura, tendeano menteea hangano pompe'ala-ala ndi Ondae i Kerisituu, onaemo menteea anu Doweeakune Ue Ala montonda pompe'ala-ala. 10Po'eheno aroaku onaemo ka kuto'ori Ira ka pabawano pewangu-Do ka tepo'asaa a nteweweu nsa'o-Do, ka kugagi mengkenaako Ira a matea-Do, 11poko'ariano ka kupohawe pewangua inso i olodo mia mate.
12Komba ndio kana kuhaweomo mongkona andio ke bobotoliomo pompe'ala-alaku, tendeano ku'ungkeo mpiha, ba mansa koa kupokorakoo, hangano ongkue mbo'u Dorako akumo i Kerisituu Yesu. 13Pepaekompo, ongkue isa'a komba tumuduo, nine kurakoomo, sine onae andio anu wineweuku: kukolupeo hapa anu i bungkukumo ka umaropio hapa anu i aroku, 14ka melulu a anu tinunggai ka kupohawe pompowee, onaemo pepoboi nsuruga inso ndi Ondae Ue Ala a ntepo'asaa ka Ondae i Kerisituu Yesu.
15Onaemo pu'uno tome'aiwamo, anu bobotoliomo pompe'ala-alato, mpompewowolo kanandio. Ka tewala susua pinewowolomiu mongkona anu asa rupa, mongkona atuu Ira koa mokomengkaao mbo'u Ue Ala ndi omiu. 16Sine moikoomo ponto'ori anu tomehaweomo tompotilaloakono montonda sala anu tomentondaomo.
Patudu a bawaa
3:17–4:1
17 #
1Kor. 4:16; 11:1 Pepaekompo, imentondaomo pandiriku ka imperio iramo, anu mentuwu mpengkena kana omami anu gagi pandirimiu. 18Hangano, kana anu mararuomo kupauakomiu, ka anu kupokomengkaao mbo'u kanandio-andio kontongaaku mengese, hadio mia anu mentuwu gagi iwalino keu pinotamba-Do i Kerisituu. 19Tompaakoado onaemo masolaa, Uedo onaemo kompodo, marambado onaemo mokoburudo, pinewowolodo butu te'aro a ntuwu tolino. 20Hangano ontae palilino Poparentaa suruga, ka inso mbo'u i tu'ai tomensikori Ira i Ue Yesu Kerisituu gagi Puu Pongkadudui, 21anu Ira balio koroito anu mongkokolaro andio, ranta ka ikana koroi-Do anu maramba, montonda pabawa-Do anu mokompetuunduo luwuakoano ndi Ondae.
Currently Selected:
PILIPI 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
