Podoaa 32

Wita i sabaano oleo koro Yarade pineweengako

32:1-42

1 # Win. 3:12-22 Inuleno i Rube ka inuleno i Gadi hadio pinotuwudo, nahi pinokopau hadiono. Mansado kumitao wita Yaeseri ka wita Gileadi, tengkitaomo po'ianga atuu moiko ntu'u pompekariaa pinotuwu. 2Ka i'amba inuleno i Gadi ka inuleno i Rube aiwa ndi Musa, sando mpesomba Eleasa ka a luwuno petewawado bawaa, dompotae, 3”I Ataroti, i Diboni, i Yaeseri, i Nimira, i Hesiboni, i Eleale, i Sebami, i Nebo ka i Beoni, 4wita anu Donangiomo i Ue tiado bawaa Isaraeli, moiko ntu'u pompekariaa pinotuwu ka luwuno atamiu andio hinao pinotuwu.” 5Dompotae mbo'u, ”Tewala ipehohawa kami, po'ineeomo wita andio i wineeako a luwuno atamiu andio gagi tiamami. Siimo itena kami mpelimba i asa towano koro Yarade.” 6Isangki ira i Musa a inuleno i Gadi ka a inuleno i Rube, ”Kana'umpe luwudo pepaekompomiu melako mpetea ka omiu mpo'ia i ndi'ai? 7Tembio ka impokomoteweo aroado to Isaraeli mensaki lumako a wita anu Doweeako ira i Ue? 8#Pod. 13:17-33Kanandio koa mbo'u anu wineweudo amamiu, tempono kutena ira inso i Kadesi-Baranea ka domempadasoo wita atuu. 9Mpelempa ira hawe i lembono Esikoli, mempadasoo wita ka mokomoteweo aroado to Isaraeli, ranta nahi domebehe melako a wita anu Doweeako ira i Ue. 10#Pod. 14:26-35Tesingkaomo tekuda-Do i Ue i tempo atuu ka Dopesumpa: 11Menteeano luwuno mia anu mpelempa inso i Masiri, anu tinuwuno rua pulu nta'u ka torea, nahi ta kumitao wita anu Kudandiakono sumpa ndi Burahima, ndi Saki ka ndi Yako, hangano nahi domentonda Aku tompaano aroado, 12sangkadio i Kalebi anano i Yepune to Kenasi ka i Yosua anano i Nuni, hangano dotonda Ira i Ue tompaano aroado. 13Tekuda-Do i Ue tensilaomo a nto Isaraeli, onaemo ka Doweweu ira mpetanggolili i pada one pato pulu nta'u tehineno, ranta ka ipingko luwuno mia anu mpoweweu mosa'o a pongkita-Do i Ue. 14Kitaomo, kanandio-andio mpentade komiu umeu ira amamiu, tepumpuado mia mentehala, tumiangio mbo'u tekuda-Do i Ue anu tensila a nto Isaraeli atuu. 15Tewala mpewolili komiu mebungkui Ira, Ira mo'inee komiu ta tehine mbo'u i pada one, ka komiu mpowawa ropuano luwuno tongku andio.” 16Ka do'amba mperangkuhako ndi onae ka dompotae, ”Kami mpowangu rahado bawaa bembe bimba i ndi'ai po'iangado pinotuwu mami ka luwuno kota po'iangado ana mami anu da kodei. 17Sine, omami kami mpesangka mpetea ka ronga mpelempa i arodo to Isaraeli, ranta kami wawa ira a mpo'iangado. Kontongaano atuu luwuno ana kodei mami ira mpo'ia i larono luwuno kota mebente tekadudui inso a mpalilino wita andio. 18Nahi kami mpekule i rahamami, kai sompo to Isaraeli mohawe tia pusakado; 19hangano nahi kami mebehe mpontarima tia pusaka i asatowano koro Yarade i ra'ai ka iraane, tewala mpohawe kami tia pusaka i asatowano koro Yarade i ndi'ai, i sabaano oleo.”

20Ka i'amba motaeomo i Musa ndi ondae, ”Tewala komiu mpoweweu kanatuu, tewala komiu mpesangka mpetea ka impetea i aro-Do i Ue, 21ka sompo mia inso ndi omiu anu mpesangka mpetea ta sumakio koro Yarade i aro-Do i Ue, ranta ka Dosaari ira iwali-Do inso i aro-Do, 22ranta wita atuu metenunu i aro-Do i Ue, ka tewala lembuino mpekule komiu, asalakono bebasi komiumo inso a parenta-Do i Ue ka a nto Isaraeli, ka wita mbo'u andio ta gagi tiamiu i aro-Do i Ue. 23Sine tewala nahi mpoweweu kanatuu, mentee ntu'u ntehala komiu ndi Ondae i Ue, ka komiu mpopembasai, nine halamiu atuu ta umalukomiu. 24Imewangu iramo kota tiado anamiu ka rahado bawaa bembe bimbamiu, ka imeweweuomo hapa anu pinaumiu.”

25Onaemo ka dompotae inuleno i Gadi ka inuleno i Rube atuu ndi Musa, ”Luwuno atamiu andio ira meweweuo kana parentamiu ueku. 26Luwuno ana ka beine mami, pinotuwu mami ira mpo'ia i ndi'ai a luwuno kota Gileadi, 27sine, luwuno atamiu anu mesangka mpetea ta metea, ira mensaki i aro-Do i Ue ka mpetea, kana anu pinaudo ueku.”

28 # Yos. 1:12-15 Ka i'amba i Musa mompowee parenta mongkona ondae ndi sando mpesomba Eleasa ka ndi Yosua anano i Nuni ka a luwuno petewawado anu mpepe'etu inso a luwuno suku Isaraeli. 29Motae i Musa ndi ondae, ”Tewala inuleno i Gadi ka inuleno i Rube, luwuno mia anu mesangka mpetea ta metea, domensakiomo koro Yarade meronga omiu ka impetea i aro-Do i Ue, ka tewala wita atuu metenunuomo ndi omiu, ka asalakono imeweeako ira wita Gileadi gagi tiado. 30Sine, tewala nahi dompesakiako saru mpesangka mpetea meronga omiu, asalakono ira mpotarima wita tiado i tonga-tongamiu i wita Kana'a.” 31Ka do'amba mesangki inuleno i Gadi ka inuleno i Rube, ”Hapa anu pinau-Do i Ue a luwuno atamiu andio kami koa meweweuo. 32Kami koa mpesakiako saru mpesangka mpetea i aro-Do i Ue melako i wita Kana'a, sine ndi omami tepakosiomo wita tia pusakamami i asatowano i ndi'ai koro Yarade.” 33Ka i'amba a inuleno i Gadi, a inuleno i Rube ka a entongano suku Manase inuleno i Yusupu iweeako iramo i Musa poparentaano i Sihoni, mokoledo to Amori ka poparentaano i Ogo, mokole i Basani, moiko witado maupo luwuno kotano i asa wawo wita atuu, tewinso luwuno wita petengi-tengino kota atuu. 34Domewanguomo inuleno i Gadi: Diboni, Ataroti, Aroeri, 35Ataroti-Sopani, Yaeseri, Yogobeha, 36Beti-Nimara, Beti Harani, luwuno kota mebente ka po'iangano luwuno raha mpinotuwu bawaa bembe bimba. 37Inuleno i Rube wanguo Hesiboni, Eleale, Kiriataimi, 38Nebo mbo'u, Ba'ala-Meoni, anu ineu neeno, saru Sibima. Dompoponeeo susua luwuno kota winangudo.

39Inuleno i Makiri anano i Manase lumako i Gileadi; dompoko'alao ka dosaari ira to Amori anu mekongko i ra'ai. 40Ka i'amba i Musa meweengakono Gileadi ndi Makiri anano i Manase anu lembuino mpo'ia i ra'ai. 41I Yairi anano i Manase, lumako mongko'alao luwuno inia kodeino ka ineeakono Hawoti-Yairi. 42I Nobahi lumako mongko'alao Kenati saru luwuno ana kotano ka ineeakono Nobahi montonda neeno onaeno.

Currently Selected:

Podoaa 32: XMZ

Highlight

Compare

Copy