Podoaa 31
31
Pombaloa a nto Midia
31:1-24
1Mepau Ira i Ue ndi Musa, 2”Weweuomo pombaloado to Isaraeli a nto Midia; ka u'amba pinumpu saru uempu'umu.” 3Ka i'amba mepauomo i Musa a tongku atuu, ”Moikoomo bate'opia mia inso i olomiu mompatinda sangka peteano ta metea, ka dome'ewaio Midia ka mpeleluakono pombalo-Do i Ue a nto Midia. 4Inso a sompo suku i olodo luwuno suku Isaraeli, asalakono impontena asa nsowu mia anu ta metea.” 5Ka i'amba inso a luwuno sukudo to Isaraeli pineweengako asa nsowu mia inso a sompo suku, luwuno hopulu ka orua nsowu mia mesangka petea anu ta metea. 6Ka i'amba i Musa tumena ira ka dompetea, asa nsowu mia inso a sompo-sompo suku, meronga saru i Pineha, anano sando mpesomba Eleasa anu mowawa parewano po'ianga mempori ka luwuno napiri pompowee uni pepopoto'ori. 7Ka do'amba mpetea umewaio Midia kana peparenta-Do i Ue ndi Musa, ka mepate ira luwu tamado. 8Sangkadio luwuno mia anu mempinepate atuu, dompepateo mbo'u Mokole Ewi, i Rekemi, i Suri, i Huri ka i Reba, olima mokoledo to Midia. Ondae mbo'u mpepateakono ponai i Bilea anano i Beori. 9Ka do'amba to Isaraeli mentawa ira beinedo to Midia ka luwuno anado saru mempomuruo luwuno pinotuwu ka pompolido. 10Luwuno kota po'ianga saru luwuno pekemaado tinunu. 11Dome'alao luwu pinomuru ka rinontu onaemo mia ka pinotuwu, 12saru wawa ira tinawa, rinontu ka pinomuru atuu ndi Musa, sando mpesomba Eleasa ka a bawaa Isaraeli, a mpekemaa i lembono Moabi, i wiwino koro Yarade umpeda i Yeriko.
13I Musa, sando mpesomba Eleasa, ka luwuno petewawado bawaa atuu melako mbo'u tumotowo ira hawe i bungkuno pekemaa. 14Ka i'amba tekudaomo i Musa a luwuno petewawado sorodadu atuu, a luwuno petewawado asa nsowu sorodadu ka a mpetewawado asa etu sorodadu anu mpekule inso a mpeteaa, 15ka ipotaeako ira, ”Tembio kai mpo'inee ira luwu beine andio mentuwu? 16#Pod. 25:1-9Komba luwuno beine andio ke, a mpatuduno i Bilea gagi pompu'uano to Isaraeli nahi dompetenunu ndi Ondae i Ue anu gagi ndi Peori, ranta kai petii pohuku umalu ira bawaa-Do i Ue. 17Kanandio-andio pepate iramo luwu ana ntama anu da kodei. Luwuno beine anu horiomo mewowaliako tama, asalakono impepate ira mbo'u. 18Sine, luwuno ana beine anu da kodei anu napi hori mewowaliako tama, asalakono impo'inee ira mentuwu tiamiu. 19Ka omiu impekemamo i larono opitu oleo i bungkuno pekemaa; sompo mia anu mompepateomo mia ke anu modanggi mia anu pinepate asalakono i'oninio halano inso a ngkoroino ia oleo ko'otolu ka ko'opitu, moiko omiu maupo tinawamiu. 20Kanatuu koa mbo'u sompo sangka ka sompo sangka kuli, sompo sangka anu wineweu inso a wulu bembe ka sompo sangka keu asalakono pinokomempori.”
21Ka i'amba sando mpesomba Eleasa motaeako ira sorodadu anu melako iramo mpetea atuu, ”Ndiomo pompakosi songka peparenta-Do i Ue ndi Musa. 22Butu wulaa, salaka, mala, labu, tima mopute ka tima mo'ito, 23luwuno anu nahi kaano api, asalakono imewinsoo a laro api, kai gagi morina; sine luwuno atuu asalakono pinokomemporiako mbo'u uwoi pompokomorina; ka luwuno anu ipokokaano api asalakono ime'emoo a laro uwoi. 24Asalakono imelomboo mbo'u sangkamiu ia oleo ko'opitu, kai memorina ka umarino atuu moikoomo impewinso a mpekemaa.”
Atora mongkona pinomuru
31:25-54
25Mepau Ira i Ue ndi Musa, 26”Omue, sando mpesomba Eleasa ka luwuno petewawado pepe'etuado bawaa, imedoaomo hadiono rinontu anu winawaomo, moiko mia maupo pinotuwu. 27Umarino atuu asalakono imentiao rinontu atuu gagi orua, tiado sorodadu mpesangka petea anu mpeluarako iramo mpetea, ka tiado luwuno bawaa. 28Inso a luwuno sorodadu anu mpeluarako mpetea atuu, asalakono pompesusuaako ira peki'ue ndi Ondae i Ue, asa inso a sompo lima etu mia, sapi, kalide maupo asa bawaa bembe bimba. 29Asalakono alao inso a ntia anu entonga atuu anu pinoko'alado, ka i'amba meweengakono ndi sando mpesomba Eleasa, gagi pesomba pinesusua ndi Ondae i Ue. 30Sine inso a ntia anu entonga mbo'u tiado to Isaraeli, asalakono alao asa inso a sompo lima pulu mia, sapi, kalide, asa bawaa bembe bimba, maupo luwuno pinotuwu susua, ka i'amba meweengakono luwuno a nto Lewi anu mpo'angga i Kema Mempori-Do i Ue.”
31Ka i'amba i Musa ka sando mpesomba Eleasa weweuo kana parenta-Do i Ue ndi Musa. 32Ka rinontu anu torea inso a hapa anu dompomuruomo sorodadu atuu porokono nomo etu ka pitu pulu ka olima nsowu bembe bimba, 33pitu pulu ka orua nsowu sapi, 34ka nomo pulu ka asa nsowu kalide, 35saru luwuno beine anu napi hori mewowaliako tama, luwuno tolu pulu ka orua nsowu mia. 36Tia anu entongano tiado anu mpeluarako iramo mpetea atuu porokono, tolu etu ka tolu pulu ka opitu nsowu ka lima etu bembe bimba. 37Gagi, peki'ue ndi Ondae i Ue inso a asa bawaa bembe bimba atuu nomo etu ka pitu pulu ka olima; 38sapi tolu pulu ka onoo nsowu, gagi peki'ue ndi Ondae i Ue, pitu pulu ka orua sapi; 39kalide tolu pulu nsowu ka lima etu, gagi peki'ue ndi Ondae i Ue, nomo pulu ka asa kalide; 40ka mia hopulu ka onoo nsowu mia, gagi peki'ue ndi Ondae i Ue, tolu pulu ka orua mia. 41Ka i'amba i Musa meweengakono peki'ue anu pinesusua tia-Do i Ue ndi sando mpesomba Eleasa, kana parenta-Do i Ue ndi Musa. 42Tia anu entongano, tiado to Isaraeli iponsiao i Musa inso a ntiado mia anu mpetea iramo atuu. 43Tia anu entongano tiado bawaa atuu: asa bawaa bembe bimba tolu etu ka tolu pulu ka opitu nsowu ka lima etu, 44sapi tolu pulu ka onoo nsowu, 45kalide tolu pulu nsowu ka lima etu, 46ka mia hopulu ka onoo nsowu. 47Ka i'amba i Musa umalao inso a ntia anu entongano tiado to Isaraeli atuu asa inso a sompo lima pulu, moiko mia maupo pinotuwu, ka i'amba meweengakono luwuno a nto Lewi anu mpo'angga i Kema Mempori, kana parenta-Do i Ue ndi Musa.
48Ka i'amba luwuno petewawado sorodadu asa nsowu ka sorodadu asa etu, luwuno petewawado sorodadu atuu, me'umpeda ndi Musa 49ka dompotaeakono, ”Luwuno atamiu andio umariomo medoao hadiono sorodadu anu i totono pabawa mami ka nahina maupo te'asa mia inso ndi ondae anu linalo. 50Onaemo pu'uno kimpesombaakono gagi pesomba ndi Ondae i Ue, hapa anu singge hinawe mami, onaemo luwuno sangka wulaa, mala-mala ngkaru, mala-mala ngkae, sinsi pontondoni, tole-tole ka enu-enu poweweu pesintuwua tiano koroimami ndi Ondae i Ue.” 51I Musa ka sando mpesomba Eleasa tumarimao wulaa atuu inso ndi ondae, luwuno sangka wineweuno kae. 52Ka do'amba wawao i aro-Do i Ue luwuno wulaa pesomba pinesusua inso a luwuno petewawado sorodadu asa nsowu ka sorodadu asa etu, mobeano hopulu ka onoo nsowu pitu etu ka lima pulu sikala. 53Sine luwuno sorodadu atuu singge iramo mpo'ala pinomuru tiado ondaedo. 54Mansado tumarimao i Musa ka sando mpesomba Eleasa wulaa inso a luwuno petewawado sorodadu asa nsowu ka sorodadu asa etu, dowawao i larono Kema Tepotowoa gagi pepopoto'ori rumambe ira to Isaraeli i aro-Do i Ue.
Currently Selected:
Podoaa 31: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
