Podoaa 30
30
Pontangado beine
30:1-16
1Mepau i Musa a luwuno petewawado suku Isaraeli, ”Ndiomo anu Dopeparentaako i Ue. 2#Pod. 23:21-23; Mat. 5:33Tewala asa tama montanga ke mesumpa ndi Ondae i Ue, ranta ka ipedandi, asalakono nahi moiko ilimpaio pauno atuu; asalakono iweweuo kana anu pinauno. 3Sine tewala asa beine montanga ndi Ondae i Ue ka ipedandi i rahano amano tempono da i'ana beine, 4ka irongeo amano pontanga ka pedandino anano atuu, sine amano nahi pompau hapa-hapa ndi onae, asalakono luwuno pontangano atuu ta kongko pinokogagi, kanatuukoa mbo'u sompo dandino. 5Sine tewala amano umontoo tempono irongeo atuu, asalakono luwuno pontanga ka dandino anano atuu nahi ta pinokogagi; Ondae i Ue Ira umampunio beine atuu, hangano i'ontoomo amano.
6Tewala beine atuu lembuino mekombia, ka onae da mepasua hangano asa inso i olono pontanga ke asa inso i olono dandi anu ipauo kanatuumokoa ka anu tetanggoako koroino, 7ka irongeo tamano mongkona atuu, sine nahi pompau hapa-hapa ndi onae tempono irongeo, asalakono pontangano atuu ta pinokogagi, kanatuukoa mbo'u dandi anu tumanggoo koroino ta gagikoa mbo'u. 8Sine tewala tamano atuu umontoo tempono irongeo, ka ibaliomo pontanga anu gagi pasuano beineno ka dandi anu pinauno kanatuumo koa ka anu umongoo beineno. Ira umampunio i Ue kombiano atuu.
9Mongkona pontangano asa tuwu beine ke asa beine anu pinonsua, luwuno anu tumanggoo koroino ta gagi ndi onae.
10Tewala a rahano tamano, asa beine montanga ke tumanggoo koroino a asa dandi saru mesumpa, 11ka irongeo tamano, sine nahi pompau hapa-hapa ndi onae ka nahi ontoo, asalakono luwuno pontangano beine atuu ta gagi, kanatuukoa mbo'u sompo dandi anu tumanggoo beine atuu. 12Sine tewala tamano atuu mekora balio tempono irongeo, asalakono maupo hapa pinau anu meluarako inso a ngangano, moiko pontanga maupo dandino nahi ta gagi. Umariomo ibalio tamano, ka Ondae i Ue Ira umampunio kombiano atuu. 13Sompo pontanga ka sompo sumpa pedandino beine atuu ta me'urumako saru mepuasa, ta gagi kanatuu ke maupo nahi pokogagio tamano. 14Sine, tewala tamano nahi pompauakono hapa-hapa ndi onae inso a oleo asa hawe a oleo tudano, ipokomengkaaomo sompo pontangano kombiano ke sompo dandi anu gagi pasuano kombiano; ipokomengkaaomo, hangano nahi pompau hapa-hapa ndi onae tempono irongeo. 15Sine tewala nahi pokogagio ba opia tempo umarino rumongeo, asalakono onae ta tumembio salano kombiano.”
16Onaemo luwuno pompakosi anu peparenta-Do i Ue ndi Musa mongkona asa tama ka kombiano, saru i olono asa ama ka anano beine tempono da i'ana beine i rahano amano.
Currently Selected:
Podoaa 30: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
