Podoaa 27
27
Tia pusakado ana beine
27:1-11
1Luwuno ana beineno i Selapehadi anano i Heperi anano i Gileadi anano i Makiri anano i Manase te'inso a nsuku Manase anano i Yusupu. Needo luwuno anano atuu: i Mahala, i Noa, i Hogia, i Milika ka i Tiresa. Mperangkuhako ira 2ka do'amba mpentade i arono i Musa ka sando mpesomba Eleasa, i arodo luwuno petewawa ka luwuno bawaa umpeda a mpewowano Kema Tepotowoa, ka dompotae, 3”Ondae ama mami mate iramo i pada one, maupo nahi dotewinso a laro bawaa anu ntepo'asa umewai Ira i Ue, a laro bawaa mpetonda ndi Kora. Menteeano mate iramo hangano halado ondaedo ka nahi dope'ana ntama. 4Tembio needo ama mami kai tetadi inso a ntonga-tongano sukudo, butu hangano nahi dope'ana ntama? Ipowee kamimo wita tiamami i olodo pepaekompodo ama mami.” 5Ka i'amba i Musa mohaweo teweweudo atuu i aro-Do i Ue.
6Mepau Iramo i Ue ndi Musa, 7#Pod. 36:2”Paudo ana beineno i Selapehadi atuu mentee. Omue lano asalakono moweeako ira wita pusaka i olodo pepaekompono amado. Asalakono ka upolimbao ndi ondae tia pusakano amado. 8A nto Isaraeli asalakono potaeako ira: Tewala asa mia mate nahina anano tama, asalakono impolimbao tia pusakano a anano beine. 9Tewala nahina anano beine, asalakono tia pusakano imeweeako ira pepaekompono anu tama. 10Tewala nahina tama pepaekompono, asalakono tia pusakano atuu impeweengakono a mpepaekompono amano anu tama. 11Tewala amano nahina tama pepaekompono, asalakono tia pusakano atuu impeweengakono a mpe'etuno anu lalu umpeda inso i olodo anu mpepe'etu, ka ipe'ueo.”
Onaemo anu asalakono gagi pompakosi songka a nto Isaraeli, kana anu parenta-Do i Ue ndi Musa.
I Yosua pinotoro
27:12-23
12 #
Win. 3:23-27; 32:48-52 Mepau Ira i Ue ndi Musa, ”Pewuatakomo a ntorukuno Abarimi andio, ka kitaomo wita anu Kuweeako ira to Isaraeli. 13Umarimu kumitao, komopinumpu saru uempu'umu, mengkena kana i Haruni, akamu. 14Hangano i tempono pe'u'uado bawaa i pada one Sini, orua komiu i'ewaiomo petena-Ku mokomengkaao mempori-Ku mongkona uwoi atuu i arodo.” Onaemo mata uwoi Meriba umpeda i Kadesi i pada one Sini.
15Ka i'amba i Musa mepau ndi Ondae i Ue, 16”Po'ineeomo Ondae iUe, Ue Alano penaa a luwuno anu tuwu, Ipompotoromo te'asa mia a bawaa andio 17#1Mok. 22:17; Yeh. 34:5; Mat. 9:36; Mrk. 6:34anu mo'ia i arodo tempono dompelungka mpetea ka mpekule, anu mokompelungka ira ka mokule ira, bawaa-Do i Ue kasi kana bimba anu nahina puu mpopakambi.”
18 #
Pel. 24:13
Ka Do'amba mepau i Ue ndi Musa, ”Alaomo i Yosua anano i Nuni, asa mia anu bukeako penaa, naaomo kaemu i wawono. 19Tenaomo ka ipentade i arono sando mpesomba Eleasa ka luwuno bawaa, ka potoroomo i arodo. 20Weeakonomo asa ntia inso a mpabawamu, ka domperorongeakono luwuno bawaa Isaraeli 21#Pel. 28:30; 1Sam. 28:6Asalakono ka ipentade i arono sando mpesomba Eleasa, ka ipesikenoakono i Eleasa pomputusi molalo Urimi i aro-Do i Ue. A mpetenano i Yosua saru luwudo to Isaraeli, luwuno bawaa atuu, ira mpelungka ka a mpetenano ira mpekule.” 22#Win. 31:7-8, 23Ka i'amba weweuo i Musa kana peparenta-Do i Ue ndi onae. Ipoboio i Yosua ka itenao mentade i arono sando mpesomba Eleasa ka luwuno bawaa atuu. 23Inaao kaeno i wawono i Yosua ka ipotoroo, kana anu pinau-Do i Ue telalo ndi Musa.
Currently Selected:
Podoaa 27: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
