Podoaa 25
25
To Isaraeli mpopesombai Baala-Peori
25:1-18
1Kontongaado to Isaraeli mpo'ia i Sitimi, mpopu'u iramo tongku atuu mponsosabo saru beinedo to Moabi. 2Do'oluako ira tongku atuu metondao gau mpesomba a mpinesombaido ka tongku mbo'u atuu mpetonda ira mpongkaa saru mpesombaio pinesombaido. 3Mansado to Isaraeli mpe'ini moroso ndi Baala-Peori, tesingkaomo tekuda-Do i Ue a nto Isaraeli. 4Ka i'amba mepau Ira i Ue ndi Musa, ”Rako iramo luwuno petewawado tongku atuu ka ndoe ira i aro-Do i Ue a maluaano, ka itepomule tekuda-Do i Ue anu tensila atuu inso i Isaraeli.” 5Mepauomo i Musa a luwuno puu mpobitarado to Isaraeli, ”Omiu asalakono singge mia mepate ira miano anu me'iniomo moroso ndi Baala-Peori.”
6Tempo atuu asa to Isaraeli hawe mowawa asa mia beine Midia a mpe'etuno i arono i Musa ka luwuno bawaa Isaraeli anu kontongaado mpengese i arono pewowa Kema Tepotowoa. 7Kumitao mongkona atuu, i Pineha anano i Eleasa, anano sando mpesomba Haruni mentade inso i tonga-tongano bawaa atuu ka mo'ala asa kansai a ngkaeno. 8Iluluo to Isaraeli atuu hawe a bolongko i tongano ka itobo ira a kompodo orua ira, to Isaraeli ka beine atuu. Ka i'amba pohuku atuu menaa-naa umalu ira to Isaraeli. 9Mia anu mate hangano pohuku atuu porokono rua pulu ka opaa nsowu mia.
10Mepau Ira i Ue ndi Musa, 11”I Pineha anano i Eleasa, anano sando mpesomba Haruni momulea-Kunemo tekuda-Ku inso a nto Isaraeli, hangano mosia tumeahakono popelangkai ndi Ongkue i tonga-tongado, ranta nahi Kupingko ira to Isaraeli a laro mosiri-Ku. 12Onaemo pu'uno pauakonomo: Mentee ntu'u Aku moweeakono pedandia mawongko-Ku 13anu gagi pedandoado Imama ndi onae ka inuleno ranta nahina tampulaano, hangano mosiano tumeahakono Ue Alano ka iweweuomo pesintuwua tiado to Isaraeli.” 14To Isaraeli anu mate pinepate meronga beine Midia atuu meneeako i Simiri anano i Salu, petewawado asa pepe'etua a nto Simeoni. 15Beine Midia anu mate pinepate meneeako i Kosibi ana beineno i Suri. I Suri onaemo petewawado anu mpepe'etu inso a nsuku Midia.
16Ka i'amba mepau Iramo i Ue ndi Musa, 17”Sapoi iramo to Midia atuu, ka pepate iramo, 18hangano domensapoiakomiu pe'akala anu pinatindado ndi omiu a nteweweuno i Peori ka i Kosibi, pepaekompodo, ana beineno asa mia petewawado to Midia. Beine atuu mate pinepate i tempono petiino pohuku hangano i Peori atuu.”
Currently Selected:
Podoaa 25: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
