Podoaa 24
24
1Mansano kumitao i Bilea nine moiko a pongkita-Do i Ue rumonso ira to Isaraeli, nami lako mbo'u mo'ungke petondoni kana anu se'eluno, sine ipo'aroo rupano te'aro i pada one. 2Mansano i Bilea mengkita ngkoraane ka ikita ira to Isaraeli mpekema montonda sukudo, Penaa-Do Ue Ala mewinso ndi onae. 3Ka i'amba pauo powadino, ipotae,
”Pepauno i Bilea anano i Beori,
pepauno mia anu te'ungkahi pongkitano,
4pepauno mia anu rumongeo pau-Do Ue Ala,
anu kumitao pongkita inso Anu Tedoa Pabawa
anu mepombole, sine saru mata tewile.
5Tedoa tekosi luwuno kemamiu, hei Yako,
ka luwuno po'iangamiu, hei Isaraeli!
6Kana lembono anu tewile molue,
kana lere a wiwi ngkorono,
kana keu gaharu anu pinaho-Do i Ue,
kana keu arasi a wiwi ngkorono.
7Uwoi waa inso a pontambuno,
ka wuku mpinopahono mohawe uwoi tedoa hadio ntu'u.
Mokoleno ta lalu maramba sekonopo i Aga
ka poparentaano ta pinelangkai.
8Ondae Ue Ala anu wawa ira mpeluarako inso i Masiri,
kana tanduno onua ndi ondae.
Ira mengkaano luwuno tongku anu gagi iwalido
ka puroo luwuno wukudo
saru mepateako ira panado.
9 #
Teg. 12:3; 49:9 Onae me'opo ka mepombole kana singa lakino,
ka kana singa waino; isemake anu sapa wanguo?
Rinonsoomo mia anu rumonsoko,
ka tetotonaaomo mia anu tumotonaako!”
Pinauno i Bilea
24:10-25
10Ka i'amba tesingkaomo tekudano i Bala ndi Bilea ka saru metundu-tunduhiakono kaeno ipotaeakono i Bilea, ”Kupoboiko aiwa tumotonaakune iwaliku, sine tendeano uronso ira hawe pentolu. 11Kanandio-andio pekulemo a mpo'iangamu! Hieno kupotaeakomu nine aku tedoa melangkaiko, sine Do'onto komo i Ue humaweo.” 12Sine i Bilea motaeakono i Bala, ”Kombake umariomo kupauako ira mia tinenamiu ndi ongkue: 13Maupo ipoweeakune i Bala wulaa ka salaka buke asa langkanae, nahi aku polio umewaio petena-Do i Ue, moweweu moiko ke mosa'o a mpo'eheku ongkueku. Hapa anu ta pinau-Do i Ue, onaemo anu aku pauo. 14Kanandio-andio aku lumako a tongkuku. Moikoomo kupauakomu hapa anu ta wineweudo tongku atuu a tongkumu lembuino.”
15Ka i'amba pauo powadino, ipotae,
”Pepauno i Bilea anano i Beori,
pepauno mia anu te'ungkahi pongkitano,
16pepauno mia anu rumongeo pau-Do Ue Ala,
ka tumo'orio ponto'ori-Do Ue Ala Anu Tedoa Mantande,
anu kumitao pongkita inso Anu Tedoa Pabawa,
anu mepombole sine mata tewile.
17Kukitao, sine komba kanandio-andio,
kukitao, sine napi umpeda.
Anano wula mesabaako inso ndi Yako,
tuko poparentaa me'umbaako inso i Isaraeli,
ka puro ira nipi-nipido to Moabi,
ka mokotampulao luwu anano i Seti.
18Edomi tamo gagi wita po'ianga
ka Seiri ta gagi wita po'iangado iwalino atuu.
Sine Isaraeli ta moweweu wineweu anu moroso ka mosia,
19ka inso ndi Yako ta me'umbaako asa mia anu pabawa.
Onae ta mepate ira luwu mia anu mpolai inso a ngkota.”
20Mansano kumita ira i Bilea to Amale, ipauo powadino, ipotae,
”Amale onaemo anu lalu pinelangkai i olono luwuno tongku,
sine poko'ariano onaemo matae anu nahina tampulaano.”
21Mansano kumita ira to Keni, ipauo powadino, ipotae,
”Moroso po'iangamiu,
ninaa i wawono pongku watu senomiu,
22sine to Keni ta gagi pompaani api,
hawe mbo'u te'ipia ta tumawa komiu to Asuri?”
23Ka i'amba pauo mbo'u powadino, ipotae,
”Masola ntu'u! isemake anu ta tuwu,
tewala mongkona atuu Doweweuo Ue Ala?
24Luwuno kapala ira me'aiwa inso a wiwi ntahido to Kitimi.
Ira medadoo to Asuri ka to Heberi,
sine onae mbo'u ta mate anu nahina tampulaano.”
25Mepatindaomo i Bilea ka ipekule a mpo'iangano ka i Bala mbo'u lumako inso a mpo'ianga atuu.
Currently Selected:
Podoaa 24: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
