Podoaa 23
23
1Ka i'amba motaeomo i Bilea ndi Bala, ”Wanguakunemo i ndi'ai opitu meda pontunua pesomba ka patindaakunemo i ndi'ai opitu sapi lakino ka opitu bimba lakino.” 2Iweweuo i Bala kana anu pinauno i Bilea. Ka i'amba i Bala ka i Bilea mesombaakono asa sapi lakino ka asa bimba lakino i wawono sompo meda pontunua pesomba atuu. 3Motae i Bilea ndi Bala, ”Pentademo i horino pesomba tinunumu. Ongkue aku lumako, bara'ura Ondae i Ue Ira hawe tepohaweakune, ka maupo hapa anu pinokomengkaa-Do ndi ongkue aku pauakomu.” Ka i'amba lumako i wawono asa pongku wita anu londa.
I Bilea rumonsoo Isaraeli
23:4–24:9
4Ondae i Ue Ala tepohaweakono i Bilea, ka i'amba i Bilea mepau ndi Ondae, ”Opitu meda pontunua pesomba atuu ku'atoraomo, ka kupesombaakono asa sapi lakino ka asa bimba lakino i wawono sompo meda pontunua pesomba.” 5Ka Do'amba i Ue numaao pau a laro ngangano i Bilea ka mepau, ”Pekulemo ndi Bala ka pauomo kanandio.” 6Mansano mekule, i Bala da mentade i tu'ai i horino pesomba tinununo, saru luwuno mia memota'u i Moabi. 7Ka i'amba i Bilea pauo powadino, ipotae,
”Inso i Arami itena aku i Bala, mokole i Moabi,
inso a luwuno torukuno i sabaano oleo:
Aiwamo, ipotae, totonaakunemo i Yako,
ka aiwamo, totonaaomo i Isaraeli.
8Kana'umpe ke aku tumotonaao anu nahi Dototonaao Ue Ala?
Kana'umpe ke aku tumotonaao anu nahi Dototonaao i Ue?
9Hangano inso a punsuno luwuno torukuno watu kupensiroi ira,
inso a luwuno pongku wita kukita ira.
Kitao, asa tongku anu tuwu asa-asano
ka nahi behe dinoa i olono luwuno tongku mpelahumoa.
10Isemake anu hori dumoao awuno i Yako
ka isema anu hori momporoko tepumpuno awuno i Isaraeli?
Bakanaano aku mate kana mateno mia moleo
bakanaano mateaku kana mateado.”
11Ka i'amba motae i Bala ndi Bilea, ”Hapake anu wineweumu ndi ongkue? Ku'aiwa umalako, ka utotonaa iramo iwaliku, sine posuleno uronso ira.” 12Sine isangkio, ”Kombake asalakono ka ipinetu'ui kupohaweo hapa anu ninaa-Do i Ue a laro ngangaku?”
13Ka i'amba motae i Bala ndi onae, ”Aiwamo ka tolako a mpo'ianga susua ka inso i ra'ai komokokita ira tongku atuu. Butu anu i wiwino ntu'u kokumitao, sine luwuno nahi kokumitao. Totonaakune iramo inso i tu'ai.” 14Ka i'amba i Bala wawao a Mpada Pompadaso, a punsuno torukuno Pisiga. Iwanguo opitu meda pontunua pesomba ka ipesombaakono asa sapi lakino ka asa bimba lakino i wawono sompo meda pontunua pesomba atuu. 15Ka i'amba motaeakono i Bala, ”Pentademo i ndi'ai i horino pesomba tinunumu, tekonai aku tepohaweako Ira i Ue i ra'ai.” 16Ka i'amba Ondae i Ue tepohaweakono i Bilea ka numaao pau a laro ngangano ka mepau, ”Pekulemo ndi Bala ka pauomo kanandio.” 17Mansano hawe i Bilea ndi onae, i Bala da mentade i horino pesomba tinununo saru luwuno mia pinemota'u i Moabi. Motae i Bala ndi onae, ”Hapake anu pinau-Do i Ue?” 18Ka i'amba i Bilea pauo powadino, ipotae,
”Pewangumo hei Bala ka rongeomo;
ta'oomo birimu rumonge aku, oo ana ntamano i Sipora.
19Ondae Ue Ala komba mia, ranta ka Dopegaupi
ka komba anano mia, ranta ka Dope'o'ole.
Nde Ira mepau ke ka nahi Doweweuo
ke mepau ka nahi Do'ihiio?
20To'oriomo, mohawe aku parenta ka kuporonso
ka tewala Ondae moronso, nahi aku polio mosuleo.
21Nahi tengkita masolaa ndi Yako,
ka nahi tengkita urasa'o i Isaraeli.
Ondae i Ue, Ue Alado kumongkomi ira
ka po'undedo ndi Ondae, Mokoledo.
22Ondae Ue Ala, anu wawa ira mpeluarako inso i Masiri,
kana tanduno onua ndi ondae,
23hangano nahina binasa-basa umewaio i Yako
ke maupo doti umewaio Isaraeli.
Ia tempono ta pinau ndi Yako
ka a to Isaraeli mbo'u. Hangano Doweweuomo Ue Ala.
24Kitao, asa tongku anu mentade kana singa waino,
ka mentade moleo kana singa lakino
anu nahi pomboleo koroino, ba napi kaano rinakono
ka mo'inu reano pinongko'alano anu pinepateno.”
25Ka i'amba motae i Bala ndi Bilea, ”Tewala nahi ubehe ntu'u tumotonaa ira, osi'i ntu'u ronso ira.” 26Sine sumangki i Bilea ndi Bala, ”Kombake umariomo kupauakomu: Luwuno anu ta pinau-Do i Ue, onaemo anu aku weweuo.”
27Ka i'amba motaeomo i Bala ndi Bilea, ”Aiwamo aku wawako a mpo'ianga susua. Bara'ura mentee a pongkita-Do Ue Ala tewala ondae utotonaakune inso a mpo'ianga atuu.” 28Ka i'amba i Bala wawao i Bilea a punsuno torukuno Peori anu me'aro a Mpada Molue. 29Motae i Bilea ndi Bala, ”Wanguakunemo i ndi'ai opitu meda pontunua pesomba ka patindaakunemo i ndi'ai opitu sapi lakino ka opitu bimba lakino.” 30Ka i'amba weweuo i Bala kana anu pinauno i Bilea ka mompesombaako asa sapi lakino ka asa bimba lakino i wawono sompo meda pontunua pesomba atuu.
Currently Selected:
Podoaa 23: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
