Podoaa 18

Anggaa ka tambo tiado sando mpesomba

18:1-32

1Mepau Ira i Ue ndi Haruni, ”Omue, luwuno anamu ka pe'etumu asalakono tumembio anu sala a mpo'ianga mempori. Sine butu omue ka luwuno anamu asalakono tumembio maupo hapa anu sala a laro mpo'anggamiu gagi sando mpesomba. 2Tena ira mbo'u pepaekompomu, suku Lewi, sukuno ama mpu'umu merangkuhako saru omue, ka dontepo'asa saru omue ka mpekakaakomu, tewala omue saru luwuno anamu kongko i arono kema po'iangano songka. 3Asalakono dome'anggao anggaado ndi omue, ka luwuno anggaado a ngkema; butu si dome'umpeda a mparewano po'ianga mempori ka a meda pontunua pesomba, te'ingka memate ira, moiko ondae maupo omiu 4Asalakono dompe'asa saru omue ka me'anggao anggaado a Ngkema Tepotowoa menunu saru luwuno anggaa a ngkema atuu; sine mia biasa nahi moiko umpeda ndi omue. 5Asalakono ime'anggao anggaamiu a mpo'ianga mempori ka anggaamiu a meda pontunua pesomba, kasi tekuda-Do i Ue umalu ira mbo'u to Isaraeli. 6Mentee ntu'u, Ku'ala iramo pepaekompomu, to Lewi, inso i tonga-tongado to Isaraeli gagi pompowee ndi omue, gagi mia anu pineweengako ndi Ondae i Ue, ka dome'anggao anggaa a Ngkema Tepotowoa. 7Sine omue saru luwuno anamu asalakono impolempao potoromiu gagi sando mpesomba a laro luwuakoano mongkona meda pontunua pesomba ka luwuakoano anu kongko i bungkuno sawu pelingo, ka asalakono ime'anggao. Kuweeakomiu potoro sando mpesomba gagi puu pompekakaako me'empehiako pompowee, sine mia biasa anu merangkuhako asalakono hinuku mate.”

8Mepau Ira mbo'u i Ue ndi Haruni, ”Mentee ntu'u Kupeweengakonomo ndi omue tembiano anggaa a luwuno pesomba pinesusua ndi Ongkue; luwuno pesomba memporido to Isaraeli Kuweeakomu ka luwuno anamu gagi tiamiu. Onaemo asa pompakosi anu nahina tampulaano. 9Ndiomo tiamu inso a luwuno pesomba anu tedoa mempori atuu anu nahi asalakono tinunu: luwuno pesombado onaemo pesomba kaanga, pesomba po'onini hala ka pesomba pontolosi sala, anu inowahido ndi ongkue; onaemo tia tedoa mempori anu gagi tiamu ka luwuno anamu. 10Gagi tia tedoa mempori asalakono imengkaano; luwuno tama moiko ikaano; asalakono atuu tia mempori ndi omiu. 11Maupo andio tiamiu: pesomba pinesusua inso a pompoweedo anu susua, tewinso luwuno pesomba pinopokitado to Isaraeli. Luwuno atuu Kuweeakomu, luwuno anamu tama ka beine anu pe'asamu. Onaemo asa pompakosi anu nahina tampulaano. Sompo mia anu morina inso a luwuno ihino rahamu moiko ikaano. 12Luwuno anu moiko ntu'u inso a lana, inso a anggoro maupo gandu anu pinesombaakodo ndi Ondae i Ue gagi hasilino amba-ambano, Kuweeakomu. 13Hasili amba-ambano inso a luwuno anu tuwu a wita anu pinesombaakodo ndi Ondae i Ue, gagi tiamu mbo'u. Sompo mia anu morina inso a luwuno ihino rahamu moiko ikaano. 14#Ima. 27:28Luwuno anu pinesusua tia-Do i Ue i Isaraeli gagi tiamu. 15Luwuno anu pine'anaako amba-ambano inso a kompono luwuno anu tuwu, anu pinesombaakodo ndi Ondae i Ue, moiko inso a mia maupo inso a ngkondehora, onaemo tiamu. Butu, ana amba-ambano mia asalakono imentolosio, kanatuu koa mbo'u ana amba-ambano kondehora anu mokoburu. 16Doi tolosino, ia tinuwu asa wula asalakono tolosio montonda rekeno, olima sikala salaka kinati montonda sikala po'ianga mempori, anu mobeano rua pulu gera. 17Sine ana amba-ambano sapi, bimba ke bembe siimo tolosio; luwuno atuu mempori. Reano asalakono siwuiakono meda pontunua pesomba ka tabano tunuo gagi pesomba tinunu, gagi woono anu mokomawongko Ira i Ue. 18Sine bauno onaemo tiamu mengkena kana rada pesomba ka pa'a ngkoana. 19Luwuno pesomba pinesusua inso a mpesomba mempori anu pinesombaakodo to Isaraeli ndi Ondae i Ue, Kuweeakomu ka a luwuno anamu tama ka beine anu pe'asa rahamu gagi asa pompakosi anu nahina tampulaano onaemo asa pedandia ohia i aro-Do i Ue ndi omue ka inulemu ranta nahina tampulaano.” 20Mepau Ira i Ue ndi Haruni, ”I witado nahi komohawe tia pusaka ka nahi komohawe tia i tonga-tongado. Ongkuemo tiamu ka tia pusakamu i tonga-tongado to Isaraeli.

21 # Ima. 27:30-33; Win. 14:22-29 Mentee ntu'u a inuleno i Lewi Kuweeako ira luwuno tia hopulu i Isaraeli gagi tia pusakado, gagi tambo a mpopekakaako anu inanggado, pompekakaako a Ngkema Tepotowoa. 22To Isaraeli siimo mbo'u dome'umpeda a Ngkema Tepotowoa, hangano mpontembi hala onaemo ka domemate. 23Sine to Lewi, ondaemo anu asalakono me'anggao pompekakaako a Ngkema Tepotowoa ka mentembio salado. Onaemo asa pompakosi anu nahina tampulaano ndi omiu hawe a inulemiu. Ondae nahi ira mpohawe tia pusaka i tonga-tongado to Isaraeli. 24Hangano pesomba tia hopulu anu pinesombaakodo to Isaraeli ndi Ondae i Ue gagi pesomba pinesusua, Kuweeako ira to Lewi gagi tia pusakado. Onaemo pu'uno mepau Akumo mongkona ondae: Ondae nahi ira mpohawe tia pusaka i tonga-tongado to Isaraeli.”

25Mepau Ira i Ue ndi Musa, 26”Omue asalakono mepau a nto Lewi ka potaeako ira: Tewala mpontarima komiu inso a nto Isaraeli tia hopulu anu Kuweeakomiu gagi tia pusakamiu, asalakono impesombaakono asa ntia inso ndi onae gagi pesomba pinesusua ndi Ondae i Ue, asa ntia hopulu inso a asa ntia hopulu atuu. 27Pesomba atuu ta rineke gagi pesomba pinesusuamiu, mengkena kana gandu inso a mposesaa ka mengkena kana hasilino pomporo'i anggoro. 28Anu kanandio maupo omiu asalakono mpowawa pesomba pinesusua ndi Ondae i Ue inso a luwuno tia hopulu anu tinarimamiu inso a nto Isaraeli. Hapa anu pinesombaako inso ndi onae gagi pesomba pinesusua ndi Ondae i Ue, asalakono impeweengakono ndi sando mpesomba Haruni. 29Inso a luwuno anu pineweengako ndi omiu, asalakono impesombaakono anu moiko ntu'u inso a luwuno gagi pesomba pinesusua ndi Ondae i Ue, tiano anu mempori inso ndi onae. 30Omue asalakono pauako ira mbo'u: Tempono impopesombaako anu lalu moiko inso a luwuno, ka mongkona a nto Lewi asalakono rineke gagi hasili ponsesaa ka hasili pomporo'ia anggoro. 31Moiko imengkaano ia sompo po'ianga, omiu ka luwuno pe'asa rahamiu. Onaemo tambomiu hangano mpompekakaakomiu a Ngkema Tepotowoa. 32Nahi komiu ntehalaakono, tempono impesombaakono tiano anu moiko ntu'u inso ndi onae. Kanandiomo nahi komiu mpokomokoburuo luwuno pesomba memporido to Isaraeli ka nahi komiu memate.”

Currently Selected:

Podoaa 18: XMZ

Highlight

Compare

Copy