Podoaa 19
19
Uwoi pepokomorina
19:1-22
1Mepau Ira i Ue ndi Musa ka ndi Haruni, 2”Ndiomo pompakosi songka anu Dopeparentaako i Ue saru mepau: Pauako iramo to Isaraeli, ka dompowawa ndi omue asa sapi waino motaha nahina tataano ka nahina makurano, ka napi hori pinasanga. 3Asalakono impeweengakono a sando mpesomba Eleasari. Sapi atuu asalakono winawa i bungkuno pekemaa ka isinumbele i arono sando mpesomba. 4Ka i'amba sando mpesomba Eleasari, asalakono mo'alaako tonisono tedei inso a reano sapi atuu, ka i'amba tumawisiakono tedei pepintu te'alaako i arono Kema Tepotowoa. 5Ka i'amba sapi atuu asalakono pingko tinunu i arono i Eleasari. Kuli, bau ka reano asalakono pingko tinunu meronga ta'ino. 6Sando mpesomba atuu asalakono mo'ala keu arasi, hisopi ka sawu motaha motu'a ka metadiakono i tonga-tongano api anu tumunuo sapi atuu. 7Ka i'amba sando mpesomba asalakono molombo sangkano ka koroino iwo'ohiakono uwoi. Umarino atuu ka ipewinso a mpekemaa, ka sando mpesomba atuu mokoburu hawe sumoo oleo. 8Mia anu montunu sapi atuu asalakono molombo sangkano ka koroino iwo'ohiakono uwoi, ka onae mokoburu hawe sumoo oleo. 9#Ibr. 9:13Mia anu morina asalakono pumpuo awuno sapi atuu ka numaao ia asa po'ianga anu morina i bungkuno pekemaa, kai tepekaria awu atuu tiado to Isaraeli gagi uwoi pepokomorina; onaemo po'onini hala. 10Mia anu mopumpu awuno sapi atuu asalakono molombo sangkano ka onae mokoburu hawe sumoo oleo. Onaemo asa pompakosi anu nahina tampulaano a nto Isaraeli ka a mia hawe anu mpo'ia i tonga-tongamiu.
11Isemamokoa mia anu tepodanggiako wata ngkoroi mokoburu i larono opitu oleo. 12Asalakono ipokomemporiakono uwoi atuu koroino inso a hala ia oleo ko'otolu, ka ia oleo ko'opitu onae morina. Sine tewala ia oleo ko'otolu nahi pokomemporio koroino inso a hala, ia oleo ko'opitu nahi morina. 13Sompo mia anu tepodanggiako wata ngkoroi, koroino mia anu mateomo, ka nahi pokomemporio koroino inso a hala, ipokomokoburuo Kema Mempori-Do i Ue. Mia atuu asalakono pinokotampula inso i Isaraeli. Hangano uwoi pepokomorina nahi siniwuiako ndi onae, onaemo kai mokoburu. Mokoburuno da metako ndi onae.
14Ndiomo songkano, tewala asa mia mate a laro asa kema: sompo mia anu mewinso a laro kema atuu ka luwuno anu i larono kema atuu mokoburu i larono opitu oleo; 15sompo bolusa anu te'ungkahi nahina sawu pontutuwi te'onggo i wawono manasa mokoburu. 16Sompo mia mbo'u i pada, anu tepodanggiako mia anu mate pinepateako ponai, ke wata ngkoroi, ke luwuno wukuno mia, ke kaburu, mia atuu mokoburu i larono opitu oleo. 17A mia anu mokoburu asalakono inala tedei awu inso a mpesomba po'onini hala anu pingko tinunu, ka i'amba i larono bolusa awu atuu tinawa uwoi waa. 18Ka i'amba asa mia anu morina, asalakono mo'ala hisopi, umemoo a laro uwoi atuu ka metawisiakono i wawono kema ka a luwuno bolusa, a luwuno mia anu mekongko i ra'ai, saru mbo'u a mia anu tepodanggiomo saru luwuno wukuno ke mia mate anu pinepate, wata ngkoroi ke kaburu atuu. 19Mia anu morina atuu asalakono tumawisio mia anu mokoburu atuu ia oleo ko'otolu ka ko'opitu, ka ia oleo ko'opitu atuu, asalakono ipokomemporio mia atuu inso a hala. Mia anu mokoburu atuu, asalakono molombo sangkano, ka koroino iwo'ohiakono uwoi, ka i'amba morina ia tempo sumoo oleo. 20Sine mia anu mokoburuomo, ka nahi pokomemporio koroino inso a hala, mia atuu asalakono pinokotampula inso i tonga-tongano bawaa atuu, hangano ipokomokoburuomo po'ianga mempori-Do i Ue. Uwoi pepokomorinaa nahi siniwuiako ndi onae, onaemo ka imokoburu mpiha. 21Onaemo anu asalakono gagi pompakosi ndi ondae anu nahina tampulaano. Mia anu monsiwuiako uwoi pepokomorinaa atuu, asalakono lumomboo sangkano, ka mia anu kona uwoi pepokomorinaa atuu, onae gagi mokoburu hawe sumoo oleo. 22Luwuno anu tepodanggiako mia anu mokoburu atuu gagi mokoburu ka mia anu tepodanggi saru onae gagi mokoburu mbo'u hawe sumoo oleo.”
Currently Selected:
Podoaa 19: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
